MAKABULUNGOL ang kalinong sang Iloilo City Government. Tuman ka kinot, mahipid, kag wala sang magahod nga kumpas gikan sa City Hall angot sa kaso nga ginpasaka sang Department of Social Welfare and Development (DSWD) batok sa barangay officials kag mga empleyado sang City Hall.
Nagahalong sila sa paghatag sang pahayag, nagatihin kon ano ang angay nga himuon, kag indi nila luyag magbalod ang suba samtang sila nagapanakayon.
Nagakatingala lang ako tungod nga kon sa iban nga isyu kag hitabu, dayon waras sang city hall kag ginatutukan gid, wala ginaluatan, halos dugmukon ang isyu agud ipakita ang poder kag kusog, luyag ipasundayag ang makabulungol nga tingog.
Sa sini nga hugada, tuman ka kinot ang tinaga, hulaton na lang kuno ang kopya sang reklamo nga ginpasaka sa Office of the Ombudsman.
Kon sila ang nagapangatubang sang isyu, hulaton ang kopya. Kon sila ang nagapang-ukay sang isyu, indi sila kahulat sa dokumento, gina-unahan bisan may ginahimo nga imbestigasyon. Madamo sang palupok, kalabanan amido, ang ginasindihan agud balikdon sang mga pumuluyo. Apang, lunsay palpak ang ginapalupok nga mga isyu tungod wala sang mapag-on nga balasehan kag mahuyang ang tindog sa kamatuoran.
Pamulitika ang kaso suno kay Kapitan Irene Ong. Nalipat si Kap nga ang kaso nga ginpasaka gintun-an sang mga abogado, gin-usisa sing lubos, nakita nga may bug-at, kag napasaka na sa Office of the Ombudsman. Indi man siguro mag-uyang sang tion ang DSWD kon wala sila sang may nakita nga dapat ipasaka ang kaso.
Kon ginalantaw ni Kapitan Irene Ong nga pamulitika, ngaa nagalinong sila? Diin ang mga masingki nga pahayag, ang mga nagawaras nga hulag?
Isa pa gid sa makatilingala kon ngaa wala sang akto nga ginahimo ang Office of the City Mayor batok sa duha ka empleyado nga gintumod kag naulamid sa sini nga kaso.
Ngaa daw nagapaningkoy ang alkalde? Ngaa wala gid sang athag nga lihok?
Ginapanganinaw ko ang mga sitwasyon sadto nga kon may ginatudlo nga nakasala ukon may nahimo nga indi manami para sa imahe sang syudad, gilayon nga gina-anunsyo ang pagpatawag sa ila, nagatambong ang media, kag ginapisa-pisa sa atubang sang alkalde. Gilayon nga may mandu kon ano ang himuon sa ila. Apang subong, daw gina-ili-ili sila, ginahabulan sang malum-ok nga tela, kag halos indi mahugpaan sang langaw.
Nakalab-ot na sa tanan nga hilit-hilit sang pungsod ang balita tuhoy sa 14 ka mga indibidwal gikan 16 ka barangay sa syudad sang Iloilo nga ginpasakaan sang kaso sa Ombudsman ni DSWD Sec. Rex Gachalian bangud sa alegasyon nga gin-ibanan ang ayuda para sa mga benepisyaryo sang Assistance to Individuals in Crisis Situation ukon AICS nga programa sang Department of Social Welfare and Development (DSWD). Tap-ing ini sa manaya-naya nga dagway sang syudad.
Nalakip sa listahan sang mga ginkasuhan sa Office of the Ombudsman ang mga Barangay Kapitan, Kagawad, kag personnel sang Iloilo City Government:
1. Joebert Lim (personnel sang Iloilo City Hall Government)
2. Johnny Paul Dizon (personnel sang Iloilo City Government)
3. Kapitan Gina Elauria sang Taytay Zone 2, Jaro, Iloilo City
4. Kapitan Amadeo Sultan sang Simon Ledesma, Jaro, Iloilo City
5. Kapitan Visamin Cañal sang Quezon, Arevalo, Iloilo City
6. Kapitan Remedios Bedia sang Lanit, Jaro, Iloilo City
7. Kapitan Rizaline Delmo sang Quintin, Salas, Jaro Iloilo City
8. Kagwad JingJing Pineda sang Taytay Zone 2, Jaro, Iloilo City
9. Kagawad Juntado sang Brgy. Lanit Jaro Iloilo City
10. Kagawad Gonzales sang Brgy. Lanit Jaro Iloilo City
11. Kagawad Victoria Ruel sang Quintin Salas, Iloilo City
12. isa ka John Doe nga barangay kagawad sang Simon Ledesma, Jaro
13. isa ka John Doe nga barangay kagawad sang Quezon, Arevalo
14. isa ka John Doe nga barangay teasurer sang Simon Ledesma, Jaro.
Nahibaluan nga ang mga kaso nga ginpasaka amo ang grave misconduct, paglapas sa Section 3 sang Anti-Graft and Corrupt Practices Act (RA 3019), abuse of authority, kag paglapas sa code of conduct and ethical standards for public officials and employees.
Wala sang pagkondenar nga nabatian batok sa mga gin-akusaran. Wala sang matigdas nga pahayag batok sa ila ang Iloilo City Government. Suno sa akusasyon, ginpatawag pa sila kag gindalu-dalo, gin-alay-ay, ginpasaligan nga buligan, kag gingiyahan kon ano ang dapat himuon batok sa akusasyon.
Pinasahi ang pagtratar sang Iloilo City Government. May yara bala sang landing nga ginakahadlukan? Ngaa nagkunol ang dila? Ngaa napun-uran kag husto na lang magkulo sa higad?
Samtang nagalikop ang kalinong, mas nagadalom ang palamangkutanon. (bertladera@gmail.com/PN)
