GAMURUG-OT gid ang abyan naton nga abogado batok sa mga binutig nga propaganda sang mga “trolls” sang isa ka presidential candidate batok kay VP Leni.
Surprisingly, indi gani niya kandidato sa pagka-Presidente si VP Leni sa sining pagsugod na sang “campaign” sa subong pa lang.
Tungod sini daku gid ang pagpasalamat sa iya sang mga sumulunod ni VP Leni.
Samtang, ginapasalamatan man nila ang iban nga mga abogado, upod dira ang pila ka bar topnotcher kag ang former IBP president, nga nagpahayag gid sa social media sang ila pagsuporta kay VP Leni.
***
By the way, indi pa man sa karon maakusaran ining mga kandidato sing “illegal campaigning” sa ila pakighambaro na sa mga pumuluyo sa ila paglibut-libot sa pungsod.
Ina tungod ang opisyal nga kampanyahanay (campaigning) para sa mga kandidato sa pagka-Presidente, Bise Presidente, senador kag partylist nga mga grupo sa Pebrero 8 pa tubtub Mayo 7 para sa Mayo 9, 2022 nga eleksyon.
Ang opisyal naman nga kampayahanay para sa mga myembro sang House of Representatives kag ang nagadalagan sa regional, provincial, city kag municipal posts nakatalana pa sa Marso 25 tubtub Mayo 7.
Indi tugot, sunu man sa Comelec, ang kampanyahanay sa Holy break sa Abril 14 (Holy Thursday) kag 15 (Good Friday).
Ang mga kandidato gina-prohibir man sa ini nga tinion sa paghatag sang donasyon in cash or kind. Indi man tugot sa ila ang pag-appoint ukon paggamit sang mga special policemen or confidential agents. Indi man tugot sa ila ang pag-hire sang mga bag-o nga empleyado, pag-construct sang public works, kag ang pag-release sang public funds.
***
Indi ta na seguro kinahanglan ipahayag diri kon sin-o ang luyag nga kandidato, nga indi si VP Leni, sang aton abyan nga abogado sa sining pagsugod pa lang sang “kampanyahanay” sa subong kay basi magliwat pa ang iya pensar sa ulihi.
Strange though nga ginapangapinan niya si VP Leni nga indi man niya kandidato sa karon.
Ina, tungod kay grabe gid kuno ining mga “trolls” ka butigon kag sobra-sobra kon mang-insulto, gani luyag sini pasugtan ang iya (VP Leni) mga sumulunod agud e-boycott ining kontra kandidato sa kon diin man ini luyag mangampanya.
Ugaling, sang mahibal-an ini ni VP Leni samtang nagalibut upod si vice-presidential candidate Kiko Pangilinan sa isa ka lugar sa Luzon, nagpanugyan gid ini nga indi nila pagahimuon ato.
Indi matarong, sunu sa iya, ang pag-boycott sa iya mga kasumpong kon diin man luyag nila magduaw kag makighambaro sa mga tawo kay kinamatarong ina sang bisan sin-o nga kandidato sa aton Demokrasya.
Kinahanglan gid, sunu man sa iya, nga magdaug kita sa matarong nga paagi, which we owe sa aton mga pumuluyo, sa aton Demokrasya kag sa Diyos.
Kon parti sa masakit nga binutig sang mga “trolls” sa ila malisyoso nga propaganda, upod kita dira kay attorney.
Sa nahibal-an ko sa aton Christian Faith, daku nga kasal-anan sa Diyos ang pagbinutig, labi na gid agud pakalainon ang reputasyon kag patu-patuan lang sing kasal-anan kon sin-o man.
Tungod sini, sa dugang naton nga sabat sa aton abyan nga abogado, dapat matuod mahadlok ining naga-fake news batok kay VP Leni, kag sa iban pa nila nga kasumpong sa pulitika.
Pero, ngaa ayhan wala sila nahadlok sa ining binutig nila nga mga isyu, dugang ta pa nga tugda. Basi seguro may nagapasalig sa ila nga sa ila pensar mataas pa sa Diyos, sugpon ko pa.
May isa nga nagsabat sa aton nga nahibal-an niya kon sin-o ang nagapasalig sa ila agud magtomar sing kaisug sa paghimo sining binutig nga isyu batok sa mga kontra kandidato.
Wala sing liwan kuno kundi sa Satanas, nga kontra sang Diyos nga ang hampang sini amo gid ang magsugyot sa tawo agud maghimo sing kalainan.
Tani mapensar man sining mga “trolls” nga ini ang kasuguan sang Diyos sa pagsugid sing wala limbong kag pagyamuhat agud magdala lang sang isyu nga sandig sa kamatuoran.
Indi kay patu-pato agud manghalit lang. Which we owe to our reverence for the Most High and fear of His punishment for our evil deeds!/PN
