LAIN gid kon may “foresight”, ukon maalamon nga antisipasyon, ang aton opisyles agud maunahan ang posible matabo nga problema sa aton kinahanglan nga bakuna sa COVID-19.
Ginpakita ini ni Iloilo City Mayor Jerry Treñas kag Iloilo Governor Arthur “Toto” Defensor Jr. sa pag-antisipar nga ma-preparahan nga daan ang kinahanglanon nila nga bakuna.
Wala na sila naghulat pa nga may na-producir na nga bakuna. Nagsulod na sila nga daan sa kasugtanan sadtong Enero 2021 upod sa British AstraZeneca Pharma samtang gina-clinical trial pa lang ining ila bakuna.
Wala man naghipos-hipos lang ang Western Visayas, sa pagpanguna ni Mayor Treñas, agud mapamatian sang gobyerno nasyonal ang ila kinahanglanon sa bakuna halin diri.
Halos wala na sadto gani gasapak ini sa kinahanglanon sang WV samtang gatutok lang ini sa NCR kag sa Davao City kag pila pa ka banwa sa Mindanao.
Tungod sining makusog nga pagreklamo ni meyor, napaabtik ang aksyon sang gobyerno nasyonal sa sining ila kinahanglanon sa WV.
***
Sa nasiling na naton, sang Enero 2021 pa lang nagsulod na si meyor kag si gob sa kasugtanan upod sa AstraZeneca Pharma agud magpa-reserba sang bakuna kag makakuha sini sa tion nga mangin available na ini.
Mga 600,000 doses ang ginpa-reserba sang siyudad. Ginbayaran dayon sini sang mga P200 ka milyon ang 300,000 ka doses.
Upod sa mga donasyon halin sa Covax kag pila pa ka donor-nation, siling ni meyor gani nga pwede na ining makuha naton nga mga bakuna para sa “herd immunity” nga makahilway na sang tanan sa siyudad batok sa COVID-19. May mga 500,000 ang populasyon sang siyudad.
Ang probinsya naman nagbaton na sing mga 271,000 doses halin sa AstraZeneca.
***
Kon ngaa nagpa-reserba gid ang Iloilo sang bakuna, ina tungod paniguro ini agud indi kita mawad-an kon matabo kay basi maunahan kita sang iban kag mabilin kita sa tabtaban.
Indi man dale-dale makahatag direkta nga bulig ang iban nga pungsod nga naga-producir sang bakuna kay unahon man nila ang ila mga pumuluyo.
In fact, na-antisipar man ni meyor kag ni gob nga indi makapasalig ang WHO nga makahatag gid sing daku nga bulig sa ila, kag kon san-o sila makabaton sining bulig.
Ang ining bulig sang WHO halin sa Covax, kon diin naga-donate sing libre nga bakuna ang may ikasarang nga mga pungsod.
Gani, para segurado, nakig-angot na ang Iloilo sa AstraZeneca Pharma nga nagahimo sang mga bakuna, agud magsulod sa kasugtanan, upod ang gobyerno nasyonal as a matter of requirement, nga mahatagan sila sang bakuna kon available na ini.
Sa sining kasugtanan, ginpaabot nga pwede na makabaton ang siyudad kag ang probinsya sang EUA-approved sang WHO nga bakuna sa Hulyo tubtub Agosto 2021.
In fact, nagpahibalo na si Mayor Treñas nga ma-administer na sa siyudad sa Agosto 2, 2021 ang nauna nga 17,000 doses sang AstraZeneca nga ginbakal sadtong Enero 2021.
***
Madamo sing reklamo kon ngaa gapabungol-bungol lang sadto ang gobyerno nasyonal sa pagkinahanglan sang bakuna sang Iloilo.
Daw may madyik kuno ang pagtalana sang priorities sa paghatagay sang bakuna.
Unahon kuno ang mas may malala nga mga kaso sang COVID-19, gali kay gina-madyik man lang sang iban ang ila case report. May pinilian man gani kuno ang pagpanghatag bakuna sa pila ka lugar, labi na gid kon malapit ining mga lugar sa luwag.
Kon may dagdag-bawas sa eleksyon, may dagdag-dagdag man nga nagakatabo sa pag-allocate kuno sang bakuna halin sa gobyerno nasyonal. In other words, dagdag nga report sang mga kaso para sa dagdag man nga mabaton nga bakuna!
Amo gani nga nagreklamo gid sing todo si Mayor Jerry agud matagaan sing dugang nga bakuna. Samtang ang iban halos sobra 50% na ang ila fully vaccinated, diri sa Iloilo kag iban nga banwa sa Western Visayas halos 10% pa lang ang natagaan sing bakuna halin sa gobyerno nasyonal.
Namati gid man sang ulihi ang nagapabungol-bungol nga gobyerno nasyonal sa ginapangayo nga dugang nga bakuna sang Iloilo kag iban nga mga banwa.
Kag salamat kay nag-abot man ang aton order nga mga bakuna halin sa AstraZeneca despues sina. Tungod sini, nagasalig gid kita nga tayoyon na ang pagpang-bakuna sa Iloilo.
Indeed, lain gid kon may “foresight” ang aton opisyales sa pag-atubang sa mga problema!/PN
