[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’ PAUTWAS! ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI JOEL FRANCO
[/av_heading]
[av_textblock size=” font_color=” color=”]
Mapintas nga kritisismo
“MATARONG man ukon indi ang ginahimo, may indi gid kuntento.”
Sa sini nga hulubaton nabalay ang ugali sang tawo sa pagpakigsimpon kag pakigbagay. Bisan sa panghimanwa, kalingawan, pagpangalagad sa gobyerno kag bisan sa ordinaryo nga tawo, may nagadisgusto gid sa ginahimo. Malain man ukon maayo, may ara sang kritiko.
Ikaw, ano ka bala nga klase sang kritiko? Kritiko ka bala nga nagawangal kag nagapakamalaut sa imo makita? Ukon nagapakamalaut ka sa malain pero nagadayaw ka man sa maayo?
Ikaw bala ang kritiko nga tanan nga nakita malain pero wala ka man lang nagahatag sang maayo nga panugyan?
Ang aton sosyodad subong may tatlo lang ka sahi sang tawo. Kadampig kag kaaway, kag may ara nga daw wala lang labot bisan mag-ano ka pa. Ini nga mga tawo ang mas makatalagam. Indi mo mahibaluan kun ano ang unod sang ila dughan kag gahari sa ila paino-ino.
Pero kun panilagan ang nagakatabo subong sa atun pungsod, tanan nga tawo kritiko na. Ang problema lang kay makapakamalaut lang okay na bisan wala nakasayod sa matuod nga hitabu. Ini ang mahimo sang social media kun sa diin tanan pwede anonymous.
Ngaa bala mapintas kita magkondinar sa aton isig kapareho? Madasig kita maghusgar bisan wala kita makahibalo sang puno kag punta sang estorya. Puno lang sang “negativism” ang aton utok kag dughan.
Masakit kita magbungat sang tinaga sa tawo nga indi man gani natun suod gid. Basta lang makita natun nga may kapaltahan sya, halos tudok sa tul-an kun kita ang magkondinar. Pero ang matuod sina wala man gani kita nakasayud sang estorya sang iya kabuhi.
San-o pa ayhan kita makatuon sang batasan nga ginahibalo ang detalye sang isyu antes magpakamalaut? Kinahanglan subong sang tagsa-tagsa ang kritiko nga may konsensya. Buot silingon, samtang nagapakamalaut may punto kag matarong nga panugyan para sa kaaayuhan sang natungdan kag sa mga maapektuhan.
Dulugan na ang mapintas nga kritisismo. Suguran ta ang matarong, may pag-ubay nga pagsabdong sa may kapaltahan. (jfranco1975@yahoo.com/PN)
[/av_textblock]
[/av_one_full]
