PASALAMATAN naton ang mga pumuluyo nga nanindugan kag nangisog sa pagpahayag sang ila nahibaluan nga ila ginapatihan amo ang kamatuoran nga dapat mabuyagyag sa kadamuan kag agud nga matapna kag indi na pag-abusaran.
Gintuad nila paagi sa pagreklamo nga ginabuhinan ang ginahatag sa ila nga Assistance to Individuals in Crisis Situation (AICS) sa Iloilo City. Magabaton sila kuntani sang 10,000 pesos suno sa natalana nga benepisyo para sa ila, suno sa ila napirmahan, kag suno sa pasalig sang gobyerno, apang pagkatapos nga ila mabaton ang 10,000 pesos, ginahapit nila sa nagakolekta ang 8,000 tubtob tubtob 9,000 pesos kag ang ila lang gid mauyatan nga benepiesyo amo ang 1,000 tubtob 2,000 pesos.
Gina-uyatan na sang Department of Social Welfare and Development (DSWD) ang 24 ka reklamo gikan sa 16 ka mga barangay nga kalabanan yara sa distrito sang Jaro kag Arevalo.
Nakadangat sa igtalupangod sang DSWD ang ini nga reklamo. Gilayon nga nagtukod si DSWD Secretary Rex Gatchalian sang fact-finding team para imbestigahan ini.
Sa inisyal nga pagpangusisa, natukiban nga sistematiko ang nasambit nga pagbuhin sa cash aid sang mga barangay official.
Mismo si DSWD Assistant Secretary for Regional Operations Paul Ledesma, nga nagapanguna sa fact-finding team, nagsiling nga organisado kag tuman ka planado ang ini nga lihok.
Masakit batyagon para sa mga benepisyaryo tungod nga nabiktima na sila sang kalamidad, dapat sila nga buligan para makabangon gikan sa ila naaguman nga sitwasyon kag ang ila ginalauman nga magbulig sa ila amo pa ang nagtiklod sa ila agud magmuno liwat sa lutak sang kapigaduhon. Duha ka beses ila nga nabiktima kag ina paagi sa kalamidad kag sa kadalok sang ila mga opisyales.
Maathag sa sini nga imbestigasyon nga may nagapadihot agud nga makakabi gikan sa benepisyo sang mga pumuluyo.
Maathag man nga ang mga barangay official nga amo ang nagamandu kag may ginauyatan nga kopya sang listahan sang mga benepisyaryo kag sila ang nakahibalo kon sin-o sa ila pumuluyo ang natalana nga magabaton sang AICS.
Kon nagapangisog ang mga barangay official sa paggan-it sa benepisyo sang mga pumuluyo, ayhan may yara sang nagbasbas sa ila ukon may nagpasalig sa ila nga wala sang may matabu nga malain sa ila kon himuon nila ang ginmandu sa ila nga paglabu sa AICS?
Kon plano kag sistematiko suno sa DSWD, ayhan may mga tawo nga nagakumpasan sa mga barangay official agud nga himuon ini? Kon nabuhinan na ang AICS, kay sin-o nga kamot nagakadto ang kwarta? Sin-o ang nagakolekta sang tanan? Sin-o ini siya nga mas gamhanan pa kaysa sa mga barangay official?
Madamo sang palamangkutanon nga dapat maathagan agud nga maklaruhan ang mga pumuluyo, agud nga magbalik ang ila pagsalig sa mga barangay official, sa mga lideres sang syudad kag sa kada pay-out nga ginahimo sang national government.
Kon indi ini maathagan, padayon nga magaduda ang mayoriya sang mga pumuluyo sa ila barangay official kag sa mga tinawo gikan sa Iloilo City Government nga amo ang nagamandu nga ipanghatag ang ini nga benepisyo para sa pumuluyo.
Luyag man tukibon sang DSWD kon sin-o ang nagakontrol kag nagahatag sang instruksyon sa mga barangay official kon paano sabton ang mga katapo sang media nga nagapamangkot tuhoy sa sini nga kontrobersiya.
Indi ako magpati nga mangisog ang mga barangay official sa pag-angkab sa sini nga pondo para sa benepisyo sang ila pumuluyo tungod sa kahadlok nga ireport sila sa media kag sigurado nga mabalahuba ang ini nga lihok.
Nagapati ako nga may yara sang instruksyon sa mga nagalista nga ang batunon sang benepisyaryo 2,000 pesos lamang sa ila pirmahan nga 10,000 pesos sa AICS.
Nagapati man sila nga tungod ang iban nga pumuluyo matinumanon kag wala na nagakwestyon, mahapos ang ila pagbuhin sa kwarta. Apang indi tanan mapahog kag mapasunod, ilabi na nga nakahibalo sila nga gina-abusaran sila sang mga kurap nga opisyales.
Sa pagkamatuod, sadto pa sang Marso kag Abril ukon antes ang eleksyon sang Mayo sa sini nga tuig, madamo na ako sang nabaton nga mga impormasyon kaangay sini. Apang, tungod panahon sang eleksyon, ginakabig ini nga isyu sa pulitika. Wala masyado ginsapak sang tawo ilabi na nga tuman na sadto ka init ang kampanyahanay.
Karon nga tapos na ang kampanya, nagtahaw na ang init sang pulitika, mas nabatian na ang tingog sang mga ginapamentahaan, sang mga ginadaug-daog, kag sang mga mahuyang.
Nagalaum kita nga paagi sa sini nga imbestigasyon sang DSWD fact-finding team mapasakaan sang kaso kriminal kag admistratibo ang mga salawayon, bentahuso, mapiguson kag wala pasunaid nga mga barangay official kag matumod kag malakip sa kaso ang mga puguso nga mga opisyales nga nagamandu sa barangay officials.
Kabay pa nga makasuhan kag mapanabat ang mga tawo nga yara sa likod sang sining sistematiko kag planado nga pagtunto sa pumuluyo sang syudad sang Iloilo. (bertladera@gmail.com/PN)
