PSN’s ‘Si Padre Olan at ang Diyos’, Part 6

IF I MAY say so, one of the strengths of the Padre Olan story is the God question.

To deal with this theme in the 21stcentury is a big thing for me.

I feel that people are so alienated from God.

Some people pretend to do godly things, but their hearts are just pure evil.

I mean, I have been a victim to these people with evil goals.

So I feel strongly about this.

*

I guess my only point is that we should just do the best thing we can.

Try not to hurt other people.

When I say be nice, I really mean be kind.

And do not do things for show.

Not all our good works have to be flaunted on social media.

More importantly, we should not cultivate a saintly image in social media if in truth our hearts want the destruction of others.

*

Si Padre Olan at ang Diyos

© Peter Solis Nery

(continued)

*

“Magtiwala ka, Padre Olan. Manalig ka na parang batang musmos. Naniniwala ako na kung hihilingin natin, ibibigay ng Mahal na Poon ang ulan.”

“Subalit paano kung hindi ako magtagumpay?”

“Hindi ikaw ang mabibigo. Ang Diyos! Ang Diyos ang mabibigo kung buo sa iyong pananampalataya na ibibigay Niya ang pinapanalangin mo, at hindi ito matutupad.” 

“Monsenyor!” 

*

Lubhang ikinagulat ni Padre Olan ang kanyang narining mula sa arsobispo, ngunit tumango lang si Monsignor Lagdameo, ang katiwala ni Kristo at prinsipe ng Simbahang Katoliko sa Jaro. Magkagayon pa man, naramdaman ni Padre Olan ang katapatan, ang simple at napakalalim na pananalig ng arsobispo sa Mahabaging Diyos.

*

Ngumiti si Arsobispo Angel Lagdameo, “Tutulungan kita sa pagdasal.” 

Halos hindi makapagsalita si Padre Olan, “Ang ibig mong sabihin, Monsenyor, maari kong ipagpaliban ang liturhiya sa kapistahan ni San Juan at palitan ito ng naiibang seremonya?”

Muling ngumiti ang arsobispo bago nagtanong, “Para kanino ang liturhiya, Padre? Nalimutan mo na ba ang iyong Griyego?” 

*

Hindi nakalimot si Padre Olan. Nag-aral siya ng Latin at Griyego sa seminaryo. Ang salitang Griyego na ‘leitourgia’ ay mula sa mga katagang ‘leitos,’ na mula sa ‘leos’ o ‘laos,’ na ang ibig sabihin ay ‘mga tao;’ at ‘ergo,’ na ang ibig ipagkahulugan naman ay ‘gawain.’ Gawain ng mga tao. At dahil isa siyang pari, tumutukoy din ito sa gawain niya para sa mga tao. 

Tumayo si Arsobispo Lagdameo at lumapit kay Padre Olan. “Buksan mo ang iyong puso sa kusang loob ng Maykapal, Padre Olan, para magawa mo ang nararapat na mga gawain upang mabigyang puri ang Diyos.” Tinapik ng arsobispo ang balikat ng pari, “Sa nasabi ko na, tutulungan kitang magdasal.” 

*

Nagpasalamat si Padre Olan. Nakaramdam siya ng pagkagaan ng kalooban. Nang mga sandali ring iyon, naunawaan niya kung bakit ‘Angel’ ang pangalan ng kanyang arsobispo. Noon din, naunawaan niya na ang Diyos ay patuloy na nagkikipag-usap sa sangkatauhan sa pamamagitan ng kanyang mga propeta at mga pastol ng kawan.

Nakahalik lang si Padre Olan sa singsing ng arsobispo at pumasok si Padre Dayaday para ipaalala sa monsenyor ang nakatakdang panayam nito sa Bombo Radyo tungkol sa panukalang batas sa kongreso hinggil sa Reproductive Health.

***

Alinsunod sa ipinangako nina Knight Kiko at Knight Caloy, umikot at nagpatalastas ang Knights of Columbus noong Biyernes at Sabado. Naging abala naman ang Legion of Mary sa pagpalamuti at pagpaganda ng simbahan. Ang Catholic Women’s League ay nangulekta ng abuloy at donasyon para sa maliit na salu-salo pagkatapos ng liturhiya at padasal. 

Sinabihan sila ni Padre Olan na huwag gawing sirko ang liturhiya, na tiyaking walang maglalako ng mani at mga kakanin, o Tru-Orange at singkamas kahit sa labas ng simbahan.

Tumawa lang ang mga babae. Nasiyahan silang nagpasiya ang kanilang kura paruko na magdaos ng natatanging araw ng pagdarasal para nawa’y umulan. Kahit si Aling Paquit, nagpakita din ng panibagong sigla sa paninilbihan sa pari matapos magbago ang panindigan ng huli. 

Nang inusisa siya ni Padre Olan, inamin ni Aling Paquita na sang-ayon siya sa ideya ng espesyal na araw ng pagdarasal para sa ulan. Kung bakit hindi niya ipinahayag ito sa pari, iyon ay dahil sa kusinera lang naman daw siya. Tinamaan si Padre Olan kaya niyakap niya si Aling Paquit na lumuha-luha rin ang mga mata.

*

Buong araw ng Biyernes, sumulat ng kanyang sermon at nagtabi ng mga banal na babasahin si Padre Olan. Lumikha siya ng mga bagong dasal.

Maaga pa ng Sabado, tinulungan siya ng mga kasapi ng Apostolado ng Panalangin sa pagpili ng mga himig pagsamba para sa natatanging liturhiya. Sinanay niya ang Youth Ministry na nakatakdang manguna at mamuno sa mga awitin bilang koro.

*

Nagulat na lang siya nang lumabas siya sa simbahan dahil marami ang mga taong nagsidatingan galing sa kung saan-saan. Galing daw ang iba sa kanila sa sari-saring kabayanan ng isla at nais lamang sumali sa natatanging araw ng pagdarasal para umulan. 

Bisperas ng patronal na pista sa kalapit na bayan ng Jordan subalit maraming taga-Jordan ang dumayo sa kanyang simbahan sa Baryo Navalas. Nagtirik sila ng mga tolda, umupo sa damuhan at nagtipon sa parke sa gilid ng simbahan.

Ipinatawag ni Padre Olan sina Grand Knight Enying at Inday Alice ng CWL. Hiningan ng paliwanag. 

*

“Padre,” sabi ni Inday Alice, “wala tayong magagawa kung nais nilang manalangin kasama natin.”

“Higit na mabuti nga na marami ang magdadasal, Padre, hindi ba? Mas malakas ang mga panalangin,” tugon ni Knight Enying. “The more, the merrier,” dagdag pa niya sa Ingles. 

“Hindi tayo magkasya lahat sa simbahan,” sagot sang pari. (To be continued; 500tinaga@gmail.com)/PN

LEAVE A REPLY

Please enter your comment!
Please enter your name here