MALAWIG na nga tinuig ang akun pagtrabaho sa media. Kun isipon ko masobra na sa duha ka dekada.
Apang ang akun pinangabudlayan sa malawig nga panahon kag gintun-an sa hulot-klasehan, kaangay lang nga gusto panason sang mga tawo nga may personal nga interes. Sa handum nga mabusog ang kaugalingon, gub-on ang imahen sang matuod nga media nga naga-alagad sang matarong kag nagapangapin sang kinamatarong sang mga tawo.
Sa malawig nga panahon, pila na ka media ang ginkasuhan bangud sa pagdala sang mga isyu sang iban nga tawo, ilabi na ang mga kubos nga biktima sang indi patas nga hustisya. Madamo sa mga media ang dyutayan lang napriso bangud sa kaso apang sila gintalikdan sang ila ginpakigbato nga kawsa.
Sa gihapon madamo ang mapadala sang mensahe nga iwaragwag ang ila kawsa apang hinauguon lang ang ila pagkatawo. Kaangay bala nga ibala nila sa kanyon ang media. Paano abi madala ang isyu kun wala sang magreklamo? Maghimu-himo na lang sugilanon?
Sang nangin malapnagon na ang paggamit sang social media kaangay sang Facebook kag Twitter nga amo ang pinaka-uso nga palaagyan sang opinion kag mga panan-awan sa isyu, halos lasakon pa nila ang matuod nga media (mainstream media).
Pamatyagan sang iban kay may Facebook na sila, hilway na ang ila pagpasundayag sang ila kaugalingon nga panan-awan. Ginapagwa pa nga malain ang media (demonizing the media) kesyo bayaran ukon may ginadampigan. Posible may ara gidman kag indi man tanan nga tawo matarong. Kaangay sang isa ka panimalay, may tuhay gid sang panimuot.
Pero ang dapat kakulbaan sang tanan kun ang media nangin mahipos na kag nagayaob sa sin-o man nga ara sa pwesto. Kun tanan na lang pagdayaw sa gobyerno, ini na ang delikado. Mentras nga may kritiko ang gobyerno, hilway pa kita nga mga Filipino.
Kuntani imbis nga pakalainon, amligan kag suportahan ang hangaway sang katarungan kag kahilwayan!/PN
