SABADO sang nag-umpisa ang Pag-ulikid program ni Mayor Jose Espinosa III. Una ini nga nagdala sang serbisyo sa mga pumuluyo sang Barangay San Juan, Molo kag Barangay Tanza Baybay, City Proper.
Dala sang syudad ang mga serbisyo legal, ikaayong lawas kag iban pa nga mga social services.
Mismo si Mayor Joe III ang nagpanguna sa pagdala sang serbisyo sa barangay. Siling ni City Administrator Hernando Galvez, may masunod pa nga barangay nga padulungan sang city government agud dal-on ang serbisyo sa pubiko.
Gindala ini nga programa sa mga barangay sa ti-on nga nagahilapit na ang election indi lang sang Sangguniang Kabataan (SK) kag barangay kundi mismo ang midterm election. Bangud sini ginaangut naman ang programa sa pamulitika.
Tuhay gid ang panggobyerno sa sa PIlipinas. Kun nagahimo sang maayo ang politiko, ginaakusahan sya sang pamolitika. Ginagamit nya ang poder kag pondo sang gobyerno agud mapahamot ang ngalan sa mga botante. Kabudlay gid ang panggobyerno sa Pilipinas. Kun himuon mo, malain ka; kun dini mo paghimuon, malain ka man! Sa diin na lang pakadto ang mga pulitiko?
Pero diin bala naghalin ini nga panan-awan sa mga politiko? Ngaa tanan nga hulag sang politiko ginaangut sang mga tawo sa ila personal nga interes?
Ini tanan nag-init sa panahon sang reheming Marcos. Ini ang ti-on kun sa diin amat-amat nga nadula ang pagsalig sang mga Filipino sa mga politiko. Diri man abi nag-umpisa ang isyu sang kagarokan sa gobyerno.
Mas ginpalala pa ini sang panahon ni President Corazon Aquino. Ang malain kay sang panahon ni ousted president Joseph Estrada napahalin sya sa isyo mismo sang korapsyon.
Naglaum ang mga tawo nga sa pagbulos ni Gloria Macapagal-Arroyo matapos na ang malala nga kinawatay sang kwarta sang banwa. Pero ang natabu, mas ginpalala pa gid sang ikaduha nga babaye nga president sang pungsod. Sya man mismo napriso bangud ginkasuhan sang plunder. Uagling sang nagdaug si Presidente Rodrigo Duterte, ginhilway na sya kag ginbasura pa ang mga kaso batok sa iya.
Hay, wala na gid siguro sang pagbag-o ang panan-awan sang publiko sa mga politiko. Masami gid nga ginaangut sa ngalan sang politiko ang korapsyon. Bisan tampad pa ang katuyuan sang politiko, ginbutangan gid sang du-ag sang politika kag isyu sang korapsyon. Pero ang makatilingala, sa gihapon ginaboto man sila sang mga reklamador nga botante.
Sa bahin ni Mayor Joe III bisan ano pa ang iya himuon, indi nya madula ang isyu sang politika gikan sa iya mga kritiko. Bisan gani ang pagpaninlo sang mga job hires nga wala man nagatrabaho sang husto ginabasol gihapon sa politika.
Ang mga nagareklamo sang tuman ka damo nga job hires amo man ang nagareklamo kay ginpahalin ang iban nga mga job hires.
Politiko, san-o ka magbag-o sa panan-awan sang mga tawo? (jpranco1975@gmail.com/PN)
