SILHIGAN ANG SAGBOT

PAGKATAPOS sang pamalandong, dapat kita nga makamarasmas. Tion na agud nga aton mausoy ang husto nga banas nga may maathag nga paglantaw sa mga sitwasyon sa palibot nga aton ginahulagan.

Balikan naton ang mga bagay nga dapat tadlungon, mga sagbot nga dapat silhigon agud nga wala sang may matuga nga halit kag indi maglaw-ay ang aton palibot.

Kaangay sa sitwasyon sa palibot sang Land Transportation Office 6 nga nagadagya ang mga hurong, mga manugpatalang, mga manugtonto kag kwarta lang ang ginapaligban nga magan-it sa isig nila kapareho.

Samtang nagapasulod ang tawo agud nga magkwa ukon mag-renew sang iya lisensya, siya ang sugataon sang mga naka-uniporme nga may uyat nga lipak ukon stick nga nagapamangkot kon ano ang imo transaksyon, sila ang magatugda nga mapa-medical ka agud hitso na ang imo pag-proseso.

Bisan pa nga imo sila likawan kag magdiretso sa ugsaran sang LTO-6, apang sa imo pagpamangkot sa gwardiya sa imo katuyuan, ikaw ang gilayon man nga hambalan nga magpa-medical anay kag magkwa sang pormas nga dapat pun-an.

Kag bangud nga isa sa tatlo ka tuig, ukon karon mangin isa sa lima ka tuig, ang imo pagpadulong sa LTO-6, natural nga manibag-o ka sa sistema nga dapat tumanon kag nagapanglubaybay ka sa matugda sa imo sang mga naga-unay sa sina nga opisina.

Sin-o ka agud nga indi magtuman sa panugyan sang mismo gwardiya sang sina nga opisina? Natural nga reaksyon nga siya ang sundon mo bangud sa pagpati nga mas may ideya siya sa imo sa ila sistema.

Itudlo ka niya sa atubang nga building, tadlong sa ganhanaan nila kag didto may nakasulat nga ‘medical.’ Magakadto ka didto kag mamangkot, ikaw ang sukton sang 250 pesos, pabasahon sa mga letra nga nalikupan sang duag kag pamangkuton kon mamurutan mo pa ang magbasa. Wala sang anuman nga paghimulso kon nagapitik ang imo pulso, wala na sang iban pa nga eksaminasyon kag ikaw ang hambalan nga tapos na. Wala sila sang ginahatag nga sertipikasyon, wala man sang presensya sang doktor.

Ang nagaatipan sa imo isa ka babaye nga wala sang panapot nga kaangay sang isa ka umalagad sang medisina.

Nagabiya ka sa ila opisina nga nagalibog ang ulo bangud nga nagpungko kag nagbasa ka sa balor nga 250 pesos nga wala sang anuman nga resibo nga ginhatag sa imo.

Bangud nga nagadali ka nga matapos ang proseso, nagpadulong ka na sa gintudlo nila sa imo nga dapat kadtuan, nagkwa sang pormas nga dapat pun-an kag nagsunod sa proseso tubtub nga makwa na ang lisensya.

Wala man ginpangita ang ‘medical’ nga ginasiling nila, wala man sang ginpangayo ang nagaproseso nga mga ‘window’ sa LTO-6.

Pila pa ka tawo ang magasandad sa sagbot nga palibot sang LTO-6? Mabasol mo bala ang tawo nga wala sang ideya sa proseso kag ang ginpamangkutan nga gwardiya amo mismo ang nagtudlo sa imo kon ano ang imo himuon?

Ang LTO-6, city government kag iban pa nga ahensya sang gobyerno, nakahibalo bala sa nagakatabu?

Agud wala sang may makasandad, silhigan ang sagbot. (bertladera@gmail.com/PN)

LEAVE A REPLY

Please enter your comment!
Please enter your name here