ISA AKO sa madamo nga nadulaan sing trabaho tungod sa COVID-19 pandemic sugod sadtong Abril 2020.
Natabo ini sang manira ang semanal nga English weekly, sa diin naga-part-time online editing ako, tungod halos wala na sing nagasulod nga advertisement, nga amo lang ang ginapangabuhian sini.
Syempre nadula man ang akon ginakita diri. Pero wala na ako nangayu pa sing separation pay tungod pigado man ining akon gina-trabahuan.
Okey lang kay may iban pa man ako nga source, although pang-survival lang kag pangbakal sang akon mga bulong.
Salamat man kay ang gamay nga mahanda namon sa kapanganakan sang aton Manunubos nga si Hesukristo igakalipay man gihapon Niya, nga wala sing kulang sa iya pagtamod sa pagtililipon namon sa amo nga okasyon.
Malipayon nga Paskwa sa tanan!
***
Samtang nagalanog na ang mga balita nga pwede na tagaan sing otorisasyon ang madamo nga mga manufacturer sa paghatag sang COVID-19 vaccine, ang problema na lang kon diin makakuha sining bakuna.
May yara na ang Pfizer sang United Kingdom, ang Chinese vaccine, Sputnik V sang Rusya, kag iban pa nga pwede na ma-commercialize, ukon mabakal, ukon maangkon sing libre halin sa World Health Organization para sa mga kubos.
Ugaling, ining otorisasyon isa lang ka Emergency Use Authorization (EUA) tungod indi pa sapat ang kadamuon sang mga subject sa Clinical 3, ang final nga bahin sang experimento, although pwede na ini ipatuman tungod sa maka-alarma na nga sitwasyon sang pagpang-atake sang COVID-19.
Sa kaso sang Pfizer vaccine sang United Kingdom (Great Britain), por ejemplo, mga 40,000 pa lang ang ila natestingan nga madinalag-on, nga kon may problema pa nahandaan man sini base sa ila experiencia sa nagliligad nga mga vaccine sa iban nga balatian sang ila pumuluyo.
Ang dugang nga pag-experimento sini sa sulod pa sang dugang nga anom ka bulan, sunu sa mga siyentipiko, pwede na maka-confirm nga lubos na nga “effective and safe” ang bakuna sini.
Samtang, nahibal-an man nga ang China kag Russia may EUA na sang ila FDA agud mangbakuna.
***
Siyempre pa indi ang tanan ang may lubos nga pagsalig sa pagpabakuna.
Una, tungod gani nga EUA pa lang ang nauyatan nila nga otorisasyon. Kag, ikaduha, tungod man sa credibilidad sang mga manufacturer.
Indi man malikawan nga iangot diri ang pulitika kag economic interest sang mga nasyon kon sa diin sila makakuha sining bakuna.
Ang United States kag Canada nagpahibalo na nga makuha sila sang bakuna sa ila kaalyado nga United Kingdom sa Free World, samtang naghulat pa sila sang ila EUA. Ang iban, sa kaalyado man nila sa Komunista nga mga pungsod.
Ang pila naman ka mga pungsod luyag lang mag-co-exist sa iban nga pungsod nga wala nagapasin-o kon ano ang pamulitika ukon ideolohiya sini, ukon bisan pa may conflicto sa iban nga interes. Nothing personal, negosyo lang. “Kon diin makabakal sing bakuna, okey lang!”
Si Presidente Duterte, nga sosyalista (apang indi komunista), may pasalig na nga makakuha ang Filipinas sing bakuna sa China kag Russia. Pwede man kuno sa pila ka pungsod sa Free World, katulad sang UK.
Ano naman ayhan ang luyag matabo sang mga political opposition?
Gapati kita nga indi luyag sang political opposition nga magkuha sing bakuna sa China. Una, tungod sa record sang China sa ila substandard nga mga produkto, nga basi amo man sina ang klase sang bakuna sini.
Ikaduha, importante sa Demokrasya nga may alternative position ang political opposition agud malikawan nga matuga ang diktadurya.
Tungod identified na gid man sila sa pamulitika ni anay Presidente Cory Aquino nga maki-Kano, nagapati ako nga ang maki-Kano nga position ang ila tindugan.
Wala man sing pwersa pulitikal nga makuha ang grupo ni VP Robredo sa tulod-butong (ambivalent) nga foreign policy ni Presidente Duterte, kundi sa solido lang nga panindugan sang United States kag sang iya kaaalyado sa Free World angot sa interes sang Filipinas sa South China Sea kag sa isyu sang human rights sa pungsod.
Gani, gapati kita nga kon sila lang ang pamangkuton luyag nila palabihon ang pagkuha sang bakuna sa United Kingdom, sa US kag Canada, kag wala bisan isa ka bakuna sa China, nga kaaway sang United States kag sang iya kaalyado. Ano abe sa inyo?/PN
