TALAWIT gid ining atun gobyerno. Maisog sa baba, bugok sa hulag.
Madasig magkontra sa US, nagabarikutot sa kahadlok sa China.
Masobra na duha ka bulan nga nag-init ang isyu sang 2019 novel coronavirus (nCoV)sa Pilipinas. Ini apisar madugay na nga natukiban sa China.
Huwebes sang ginkumpemar sang Health department nga may isa ka Chinese gikan sa Wuhan City, China ang nangin positibo sa nCoV. Apang antes sina may 27 na ka tawo nga ginakabig “person under investigation” ukon PUI.
Antes man sini, madamo na sang nagahingyo kay President Rodrigo Duterte nga kun mahimo magpatuman sang ban sa pagsulod sang mga Chinese sa Pilipinas. Sabat ni Digong, indi pwede kay kita makabyahe sa ila, ngaa punggan ang Chinese nga makasulod sa pungsod. Indi gusto ni Tatay Digong nga maglain ang buot sang China sa Pilipinas.
Bisan sadtong Huwebes nga may nagpositibo na nga Chinese, wala gihapon sang plano ang Malacañang nga dumilian ang mga Chinese gikan sa China nga makasulod sa pungsod. Panindugan gihapon, basi maglain ang buot sang China.
Ang pamangkot, kun madasig kita mag-utod sang mga kasugtanan sa US nga wala sila sang malain nga ginahimo sa atun, ngaa sa China nahadlok kita?
Madamo na sang pagtampalas ang China sa atun. Ginaagaw ang atun teritoryo sa West Philippine Sea, nagapangawat sila sang black sand sa Zambales, sa ila halin ang dako nga volume sang shabu sa pungsod, kag madamo pa.
Ano ang ginakahadlukan sang Malacañang sa China? Ano ang utang nga kabalaslan sang mga nagapungko sa palasyo sa China?
Sa sini nga higayun, makita na natun kun ano ang gusto amligan sang sini nga gobyerno. Sa baylo nga nga Filipino, mas ginaulikdan pa nila ang mga Tsino.
Diin ang ginasiling nga handa sila magpatay kag manginmatay para sa mga Filipino? Kun sa kaluwasan kontra sini nga virus, pasulabihon pa ang amigo nga China, makapati ka nga may pag-ulikid ang pungsod China sa atun nga mga Pinoy?
Kun wala nag-init ang panawagan sa social media, wala gid nagdesisyon ang Presidente nga i-ban ang mga Chinese sa pungsod. Pero hulat ka kay may malupok naman nga isyu agud mabaunan ang nC ov nga kontrobersiya.
Tani magmata na kita sa kamatuuran nga ginahimo kita nga hampanganan sini nga gobyeno para sa ila kalipayan kag kaayawan! (jpranco1975@gmail.com/PN)
