Ti, ano na?

KUMUSTA na ayhan ang programa sang Sangguniang Kabataan sa pagpamuno ni SK federation president Leila Luntao?

Ano na bala ang iya nahimo agud matungdan niya ang iya katungdanan bilang lider sang mga kabataan?

Sa idalum sang kasuguan dapat may three-year plan na nga nahuman ang SK federation president. Ini ang mangin balasehan sang tagsa ka SK sa barangay sang ila man mangin programa.

Dapat nahuman na ini ni Luntao agud may basehan man ang kaangay niya nga mga kabataan sang mangin programa nga ipatuman sa ila barangay.

Sa pagpangusisa sa natungdan nga ahensya sang gobyerno, wala pa ini naobra ni Luntao.

May nadihon na bala nga bylaws ang SK Federation?

Siling sang nakahibalo, wala pa.

Ano ang ginasakuan ni Luntao?

Ang bylaws amo kuntani ang mangin bibliya sang SK Federation sang ila mga pagsulondan sa pederasyon. Ngaa wala pa ini ginaobra? Madala man ayhan ini sang utok ni Luntao?

Ginasakuan ni Luntao subong  amo ang Youth Congress nga pondohan sang syudad  pero tuhay nga tawo kag opisina ang nagapakilala nga nagapanguna sa pagpatuman sini.  Manugtapos na ang tuig ngaa hingagawon pa ang Youth Congress? Gamiton ini sa pamolitika?

Indi maghatag sang approval si Mayor Jose Espinosa III gani nagtindog gid kag nagpasar sang resolution si Luntao nga nagapanawagan kay Espinosa nga aprubahan na ang iya project proposal.  Ina kun sya ang naghimo sang proposal kag wala ginkopya sa isa ka konsehal?

Sa makapila na ka beses nga pag-interview sang City Hall Press kay Luntao, mabatyagan man ang kabuot niya. Makita man ang iya pagkamatinahuron. Apang ngaa sa mga opisyal sang syudad nga mas mataas sa iya daw tuhay ang iya akto? May tawo ayhan nga nagalyabe sa iya agud maghulag nga daw hamtong na nga politiko?

Pinakauna lang kuntani amo ang pagrespeto sa sa chief executive sang syudad kag sa mga tawo niya sa palibot. Pero maathag man nga daw kulang ang pagrespeto nga ginahatag. Kaangay lang nga sya pa ang yauban.

Indi sini makabatyag si Luntao bangud sya ang natungdan. Pero ginahangkat naton sya nga usisaon ang matuod nga unod sang iya tagipusoon. Kun bala ang iya hulag, iya gid ukon man nagadikta lang sa iya.

Kunsabagay dako man ang naggasto sang iban asta nga nangin SK federation president si Luntao. ([email protected]/PN)

LEAVE A REPLY

Please enter your comment!
Please enter your name here