GINAKASUBO naton nga bisan sa panahon pa nga ini ni Hesukristo, ang Anak sang Diyos nga kaisa sang Amay kag Espirtu Santo, may nagatudlo gihapon nga wala sing maluwas luas sa myembro sang ila sekta.
Salamat kay ang amon relihiyon, ang Romana Catolica, indi kalakip diri. Sa pagpaathag sang isa namon ka pari, ang tanan may oportunidad maluwas tungod sa Gugma kag Kapatawaran sang Diyos.
Tungod ini seguro sa kapatawaran nga ginhatag ni Hesukristo sa krus nga nagalakip sang mga “wala kahibalo sang ila ginahimo”.
Mas ma-intiendihan naton seguro kon ang pagkondenar sang mga Kristiyano kahimuan sang indi-Kristohanon nga mga grupo.
Katulad abe sang pagpamintas sa mga Kristiyano sang Tokugawa Shogunate sa Hapon sa panahon sang Filipino nga santo nga si San Lorenzo Ruiz kaupod ang mga misyonero nga Katoliko.
Gin-torture sila paagi sa pagbitay patuwad nga nakagapos sa baba sang daku nga buho. Apang wala sila malingkang agud bayaan ang ila pagtuo kay Hesukristo tubtub sa ila kamatayon.
***
Sala ining pag-kondenar sa iban nga tawo, labi na gid ang kapareho nga Kristiyano, katulad sang ginapapati ni Pastor Quiboloy sang Kingdom of God sa iya mga sumulunod. Siling niya mga myembro lang sang iya sekta ang maluwas, kag ang sa gwa sini matupa tanan sa Impyerno.
Ginsumpa pa gani sini si Brother Eli Soriano sang Dating Daan nga mapatay sa sulod sang anom ka bulan halin sa malala nga balatian, tungod naakig ini sa indi nila pag-intiendihanay sa ila pagbinaisay.
Wala matabo ining sumpa (curse) ni Quiboloy kay Soriano kag buhi ini tubtub sa karon, mga pitu ka tuig despues sadto.
Gani, gintawag ni Soriano si Quiboloy nga “paltik nga propeta” kag paltik man nga “Appointed Son of God” kay nagsulpot lang ini nga wala sing mga palatandaan nga ginapahayag sang Bibliya.
***
Indi man kita kumporme sa pagpati ni Quiboloy nga ang mga bakla gintuga ni Satanas. Lakip na seguro diri ang mga LGBT, sa kabug-usan, tungod sa ila pareho nga kahimtangan.
Simple lang ang aton rason dira kon ngaa indi sila tinuga ni Satanas. Kon sila tinuga ni Satanas, dapat malain nga mga bagay lang ang ila mahimo, indi bala? Pero, madamo sa mga bakla ang indi maka-Satanas ang batasan. Madamo sa ila nga nagahimo gani sing maka-Diyos nga mga buluhaton.
Kon may kalainan nga nahimo ang mga bakla, kita nga indi bakla madamo man nahimo nga kalainan. In fact, sobra pa gani ang nahimo sang mga rapist kag mga mamatay tawo nga indi mga bakla. Ti, paano abe sila mangin tinuga ni Satanas kag indi tinuga ni Satanas ining mga kriminal nga ini?
Siling sa Bibliya isa lang ang ginikanan sang tanan nga tawo – sanday Adan kag Eba. Wala duha-duha lakip na dira ang mga bakla.
Wala sing pagkapareho ang tawo. Sa kadugayon sang tawo sa duta sa lain-lain nga lugar kag kahimtangan, may naglutaw nga magkalain nga lahi – puti, itom, kayumanggi, kag sahi sang hitsura. May natawo nga may duna nga panimuot – mahipuson, may babaan, may komendyante. May maalam kag indi, kag may kilala sa kaisug kag pagka-mainubuson. Although, depende sa pagpadaku sa tawo, matun-an man ang kon ano ang bagay nga pamatasan kag panimuot.
May mga binabaye man gani pero indi man bakla. Syempre pa, may mga bakla man!
***
Indi man kita sugot sa panudlo ni Quiboloy nga myembro lang sang Kingdom of God ang maluwas. Ti, ano ya ang natabo sa mga tawo sang wala pa ang Kingdom nga God nga kon san-o lang gintukod ni Quiboloy? Sa Impyerno tanan?
Ang matuod, madamo sa sining mga tawo ang yara na nga kaupod sang Diyos sa Iya kaharian sadto pa. Mabasahan naton ini sa Bibliya, nga daw ginagamit man gani ni Quiboloy sa iya pagtudlo, nga wala lang ugaling sini ginagamit sing husto.
Sa matuod, ang Diyos lang ang makaluwas sa aton tanan, indi ang relihiyon ukon sin-o man nga pari ukon pastor. Matigayon lang naton ini paagi sa pagsunod sa Iya Kasuguan kag Kapatawaran sang aton mga sala, lakip na dira “ang wala kahibalo sang ila ginahimo” sunu kay Hesukristo.
Patawaron sang Diyos si Quiboloy sa sining sala niya nga pagtudlo! (w_mateojr@yahoo.com/PN)
