WELCOME sa pagbalik mo, former Mayor Jed Mabilog! Indi ka lang ugaling anay magbalik sa Filipinas, sunu sa mga nagakabalaka gid sa imo nga mga sumulunod mo.
Indi ka gid kuno magpauli pa tungod nagabaga pa ang balatyagon ni President Duterte batok sa imo. Basi kuno masid-ingan ka pa sang riding-in-tandem, tapos ka gid!
Indi man guro, a. Basi makasandad lang kag mahulog sa manhole nga ginapabay-an nga bukas sang DPWH, lahog gani sang isa.
Matuod man, dira ka lang anay kon diin ka man subong, meyor, para segurado. Labi na gid karon sa sining paggwa na sang desisyon sang Court of Appeals nga naga-dismiss sang “ill-gotten” case nga gin-file sa imo sadtong 2014. Basi bala indi ini mabaton sang iban dira kag mag-amok.
***
Kinawatan mo kuno ang ginpatindug mo nga “mansion” dira sa Tap-ok, Molo. Kinawatan nga “mansion”? Daw indi man. Daw daku-daku lang diutay ina sa ginapatukod sang ordinaryo nga empleyado nga nakapangutang sa Pag-ibig.
Kabahin kuno ini sang imo “unexplained wealth” tungod sa daku nga pagtaas sang imo networth sing mga P8 ka milyon sa sulod lang sang isa ka tuig sa gindeklarar mo nga Statement of Assets, Liabilities and Networth (SALN) sadtong 2013.
Dapat pa tani dayawon si Mayor Mabilog, siling sang isa ka supporter, kay nangin “honest” siya sa pagdeklarar sining iya SALN. Subong ina ka daku kuno ang networth ni meyor tungod sa pagtaas man nga kinitaan sang ila negosyo ni Mrs. Mabilog kag sang kinitaan ni Mrs. bilang corporate accountant sa Canada.
Ang problema sadto kay indi magpati ang iban nga subong gid kadaku ang pagtaas sang gindeklarar nga SALN ni meyor, nga ginmalisyahan na sang iban tubtub naglab-ut ini sa akusasyon nga kuno tungod ini sa “ill-gotten wealth” nga naangkon niya.
Kon “ill-gotten wealth” yadto, tani ginsekreto lang ato ni meyor kag wala gin-include sa iya SALN, indi bala? Amo man gani ang pagpati sang Court of Appeals sa pag-dismiss sining kaso kontra kay meyor.
***
Balik kita sa kaakig ni Presidente Duterte batok kay anay Mayor Jed, nga indi gihapon seguro malipatan ni Presidente. Natabo yadto sadtong ila kampanya sang Mayo 2016 nga eleksyon.
Gin-sabotahe kuno ni Mayor Jed ang ila rally sadtong pagkampanya nila sa siyudad sang IIoilo. Ginpapatyan kuno sila ni meyor sing suga sa plaza, nga gin-deny ni meyor.
Kag tungod man seguro sa sining kaakig ni Presidente Duterte sa natabo nga ato, nalakip na si meyor sa listahan sang presidente sa kuno mga “protector” sang illegal drug activities diri sa siyudad.
Tubtub subong, ugaling, mga lima na ka tuig nga nagligad, wala pa sing formal nga akusasyon ang na-file batok sa kay meyor angot diri.
Ngaa ayhan? Ina tungod seguro kay indi man ebidensya nga nakapa-picture ka lang sa isa ka druglord kag tungod sa pagduging sang illegal activities diri sa siyudad sa panahon ni meyor.
Kon may suspetso man, suspetso lang kay indi ini mapag-on nga mga ebidensya agud mapasakaan sing kaso nga “protector” si meyor sang illegal drug activities diri sa siyudad.
Ining akusasyon nga “protector” sang illegal activities dala ini seguro sa salabton ni meyor sa idalom sang “principle of command responsibility”, sa diin may salabton siya sa pagpabaya ukon pagsugo gid gani sa iya mga tinawo nga pabay-an lang ining illegal drug activities.
Daw amo-amo man ini nga akusasyon ang gina-pensar nga ipasaka sang International Court batok kay Presidente Duterte sa pagkamatay sang madamo – sobra 10,000 – nga mga suspetsado sa ilegal nga droga.
Matuod, masiling naton nga wala ini nga problema nahatagan sing lubos nga pagtamod ni meyor, pero indi masiling nga gin-tolerar ini ni Mayor Jed.
In fact, wala man si meyor nagpabaya sa paghatag ang bulig sa kapulisan katulad sang mga patrol cars, dugang nga mga armas, galastuhon sa gasolina, dugang nga intelligence fund, kag iban pa.
Kon may problema dira, ina tungod lawlaw gid man ang mga pulis kag ang PDEA, ukon ang mga pulis mismo ang mga “protector”.
Wala man gani sang bisan isa lang ka pulis ang nakasumbong nga ginsugo ni meyor sila agud pabay-an lang ining mga drug personalities.
Ti, paano mo abe basulon si meyor?/PN
