[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | NAHATAGAN SANG KAHIGAYUNAN’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
Friday, June 9, 2017
[/av_textblock]
[av_textblock size=” font_color=” color=”]
Tuhay na ang panahon. Madamo na sang pagbag-o. Nangin masulhay na ang pagsinarayo kag halos ang tanan imbolbado kag may ihibalo sa tanan nga nagakatabu sa aton nga palibot.
Sa pagsulod sang moderno nga teknolohiya, nahatagan ang tanan sang higayon nga mapahapos ang paglab-ot sa mga impormasyon. Ang tanan nangin aktibo sa pagtukib kag paghatag sang reaksyon sa mga nagakatabu sa iya palibot.
Sadto nga panahon ang tawo nagapamati lamang sa radyo, nagalantaw sa telebisyon kag nagabasa sang mga pamantalaan. Sila ang nagadepende sa kon ano nga mga impormasyon ang igatunghol sa ila kag limitado ang ila paghatag sang kaugalingon nga panan-awan sa isa ka hitabu ukon sa nabaton nila nga impormasyon.
Nagadepende sa istasyon sang radyo kon buksan nila ang ila linya sang telepono agud nga makapakigbahin ang mga tagpalamati sa diskurso, makaamot sang ila panghuna-huna ukon makahatag sang ila opinyon tuhoy sa topiko nga ginatalakay sa radyo.
Apang sa karon nga panahon, bangud sa pagtuhaw sang social media, ang tanan nga tawo ang mahimo nga makapahayag sang direkta kag indi na maghulat sa igahatag nga ligwa.
Mahimo na maka-komentaryo sa Facebook, makahatag sang opinyon ukon panan-awan sa gina-post sang mga news outlet – pamatalaan, telebisyon ukon radyo – agud makapahayag sang ila hibubun-ot sa nagakatabu.
Naglipas na ang panahon nga ang mga tawo ginabahugan lang sa kon ano ang luyag sang tagdala sang balita kag impormasyon ang ila igabahug sa tawo. Makapili na ang mga tawo sa kon ano ang ila luyag konsumuhon nga impormasyon. Mahimo na nila isikway ang indi nila naluyagan kag makaliso sa iban nga kuluhaan sang impormasyon kon ang ila ginakwaan ang indi na nila masaligan.
Mas nagahugot na ang kompetisyon sa mga katapo sang media. Madamo na sang alternatibo nga mapilian ang mga tawo. Mas nagahalong na ang mga media outlet sa ila ginabalhag nga balita bangud nga madali matukiban kon ini peke ukon himo-himo lamang.
Mas nagadamo kuno sang maalam, mga makahibalo mag-analisar, mas aktibo sa pulitika, kon halos may itugda sa tanan nga bagay nga ila masalapuan sa social media.
Ngaa nagatuhaw sila? Bangud nahatagan sila sang kahigayunan nga magpahayag sang ila panan-awan kag balatyagon. Makapautwas sila sang ila hibubun-ot kag nahibaluan.
Maathag nga ang mga katapo sang media wala sang monopoliya sang kaalam sa mga bagay nga nagakatabu sa palibot. Mas mga tawo nga indi mabatian sa radyo ukon indi makit-an sa telebisyon nga may mas masangkad nga ihibalo sa iya ka bagay labaw kaysa sa mga katapo sang media nga nagatalakay.
Dapat naton hangpon nga madamo sang nagahipos kag nagatulok lang sadto bangud nga wala sang gina-uyatan nga mikropono ukon ligwa sa pagsulat sang ila komentaryo.
Sa subong nga panahon, ang tanan may espasyo, kag wala sang may makapugong sa ila nga pagpahayag.
Dapat nga pabakuron kag pasanyugon sang mainstream media ang iya kapasidad sa pagdala sang balita kag impormasyon agud nga indi mawigit sa social media nga ginapakigbahinan sang kadamuan.
Paagi sa social media, ang tanan nahatagan sang kahigayunan./PB
[/av_textblock]
[/av_one_full]
