[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | TAHOS KAG WALA SANG SABLAG’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
Friday, July 7, 2017
[/av_textblock]
[av_textblock size=” font_color=” color=”]
Matingil pamatian kag nagarinagingring pa sa aton dulunggan ang makapila ka beses na nga gintawag nga “shabulized’ ang Iloilo.
Halos indi malipatan kag masami nga mamitlangan ni Presidente Rodrigo Duterte sa iya mga pamulong-pulong ang ini nga tinaga nga nagatuga sang kapait sa panamil sang iban, nagatuga sang mantsa sa imahen sang iban kag nagapahuy-hoy sang abaga sang mga natungdan.
Sining ulihi lang, mas mabug-at ang pahayag nga ginhimu sang presidente bangod liwat sini nga gintawag nga “bedrock of illegal drugs” ang Iloilo.
Madamo sang naghatag sang tuhay nga reaksyon kag indi magpati sa pahayag sang presidente sa pagpati nga mas madamo pa ang nadakpan nga drug personalities sa iban nga lugar kaysa sa Iloilo. Mas madamo pa sang nagsungka sa kapulisan sa iban nga rehiyon ipaanggid sa Iloilo ukon sa bug-os nga Western Visayas.
Mismo si Presidente Rodrigo Duterte ang nagsiling nga ginapaagi sa mga pantalan sang Iloilo ang ilegal nga droga agud nga makasulod kag maglapta sa iban nga bahin sang isla sang Panay kag sa iban pa gid nga bahin sang Visayas.
Mabudlay magpati kon kulang kita sa ihibalo kag wala kita sang may nakita nga patimaan ukon ebidensya nga nagataklap sa aton mata. Apang mas masangkad ang ihibalo sang presidente santu sa mga impormasyon nga ginahatag sa iya sang mga tinawo sang gobyerno kag sia lang ang may pribilehiyo sa pagtukib sini.
Ginpat-od man ni PDEA-6 Assistant Director Levi Ortiz nga nahapusan ang mga drug traffickers nga magpasulod sang ilegal nga droga sa mga seaport sang Iloilo, Guimaras, Capiz, kag Aklan bangod nga tahos ang seguridad.
Sa sini nga mga pantalan nagasulod kag nagalapta sa magkatuhay nga bahin sang Western Visayas sa kutob sang malab-otan sini.
Madugay na nga natumod ang ini nga problema apang tubtob lang sa papel ang matan-ay nga solusyon.
Nagtukod na sadto sang task force sa Dumangas Port agud nga mabantayan ang pagsulod sang ilegal nga droga apang halos natunaw kaangay sang yelo kag napalid kaangay sang asu.
Bisan pa magsiling ang mga otoridad nga padayun sila nga nagabantay, apang ang matuod nga padayun man sila nga malutsan. Bangod sini, nagapangayo naman sila sang bulig sa pumoluyo sa paghatag sang impormasyon kag magbulig sa pagbantay bangod nga indi nila masarangan kon sila lang.
Madugay na nga ginarekomendar nga pabutangan sang gamit nga makatukib sa unod sang mga bagahe sang mga pasahero apang lunsay bungol kag bulag ang mga otoridad.
Sa ila pamatyag, mas maayo nga pasudlon kag lagson agud nga kon madakpan may mapakita nga performance kag may mapagkit sa accomplishment report. Magluwas pa ina sa pundo nga gamiton ukon gastuhon sa tagsa ka paglunsar sang operasyon.
Kon id-iron ang pantalan, ang makadakop amo ang nagabantay diri kag kon indi makasulod wala sila sang planuhan nga dakpon kag indi nila magamit ang ila pondo para sa operasyon.
Samtang may bulag nga mga otoridad kag may nagakasilaw sa inggat sang pilak, ang mga pantalan magapabilin nga tahos kag wala sang sablag./PB
[/av_textblock]
[/av_one_full]
