[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’‘Ang Bakunawa’ kag ang ‘Gugma sa Panahon sang Bakunawa’’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”][/av_heading]
[av_textblock size=” font_color=” color=”]
Martes, agusto 1, 2017
[/av_textblock]
[av_textblock size=” font_color=” color=”]
Panamyaw sa labing pinalangga ko nga mga bumalasa!
May duha ako ka balita nga igapaalinton sa inyo.
Una sini amu ang akon nga pagduaw sa Pilipinas sumugud Agosto 17. Magaabut ako sa Iloilo sa Agosto 18, apang indi man kamo kinahanglan magsugat sa akon sa airport. Magatener ako tubtub Septiembre 9 bangud indi ko luyag ma-9/11 sa akon pagbalik sa Estados Unidos.
Ginapahibalu ko ini sa inyo bangud mangin masaku na naman ako samtang ara sa Pilipinas. Bal-an n’yo na, soltero na naman ako. Siempre, mapaduding man ako sing diutay. Basi pa lang makakita sang novio nga daku. Bwahaha!
Apang sa pagkamatuud, madamu na ako sang mga nahandu kag napanug-anan nga mga seminar kag lectures indi lang sa Iloilo, kundi pati na sa Mindanao; didto halimbawa sa Koronadal, kon luyag n’yo gid mahibal-an.
Ginasugid ko man ini bangud sa akon mga paghanda kag mga kaladtuan, daw wala na ako sang tion nga makasulat gid para sa inyo.
Apang indi kamo magkahangawa. Ang akon ikaduha nga balita amu nga igapaambit ko man ang isa sa akon mga labing pinalangga nga sugilanon sa Hiligaynon. Ini wala sang liwan kundi ang sugilanon “Ang Bakunawa” nga magasugud gua sa pagina sining aton tampad nga Panay Balita sa Jueves, Agosto 3. Tayuyun ini nga magagua sing utay-utay (sunu sa schedule sang “Campeon sang Hiligaynon” nga Martes-Jueves-Sabado/Domingo) tubtub Agosto 31, ang katapusan sang bulan. Huo, trece gid tanan ka bahin!
Sa akon pagpahuway kag pagvacacion sining bulan sang Agosto, kabay nga mahatagan man ako sang inspiracion kag mga idea para sa mga butang nga akon pagasulatun para sa inyo sa maabut nga Septiembre.
Kon wala pa ninyo nahibaluan, ini nga sugilanon una ko gid ginsulat sa Hiligaynon. Ginpadala ko man ini sa Palanca Awards, apang wala ini ginpalad nga makadaug. Apang nagapati gid ako sa gahum sining sugilanon, gani ginlubad ko man ini sa English.
Sa gihapon, wala man ini ginsuerte nga magdaug sa paindis-indis sang Palanca. Apang sa gihapon, nagapati gid ako sa gahum sang sugilanon nga ini gani ginsulat ko man ini sa Filipino o Tagalog bilang script sang pelicula. Apang wala man gihapon ini ginpalad nga magdaug sa Palanca.
Sang 2011, nagpanawagan ang Film Development Council of the Philippines sang mga script sa pulong sang mga region sa Pilipinas. Dalidali ko nga gintranslate o sulat liwat sang akon Tagalog nga script sa pulong Hiligaynon agud marepresentar man ang Iloilo kag Western Visayas.
Sang ulihi, nagdaug gid man ini nga sugilanon. Gintagaan ako sang labaw lang diutay sa tunga sa million ka pesos nga padya kag seed capital agud himuun ini nga pelicula.
Wala na ako nagduhaduha. Namat-ud ako nga mangin director kag producer. Amu, kag natigayun ko kag himuon ang sugilanon sang Bakunawa bilang isa ka pelicula nga may tig-ulo “Gugma sa Panahon sang Bakunawa.”
Nangin finalist sa nahauna nga Sineng Pambansa National Film Competition ang “Gugma sa Panahon sang Bakunawa” didto sa Davao City sadtong June-July 2012. Ginrecommenda man sang Pilipinas ang akon pelicula sa Thessaloniki Film Festival didto sa Greece.
Kag may mga screenings man ang pelicula sa SM City Iloilo, UP Film Center, Cinematheque Iloilo, sa Singapore, kag sa California, kag Maryland sa America. Ginpasalida man ini sa Cinema Rehiyon 5 didto sa Los Baños, sa Karay-a Arts Festival sa Antique, sa Bacollywood Film Festival sa Bacolod, kag siempre may mga special screenings sa akon banwa sang Dumangas, sa Miag-ao, sa Tanza, Lapaz, kag kon diindiin pa nga indi ko na madumduman.
Ti, kabay pa nga bantayan n’yo gid ining love story nanday Mateo, Dulce Amor, kag Emilio. Kag kabay mapakut ninyo kon ngaa nangin “Gugma sa Panahon sang Bakunawa” ang tig-ulo sang akon pelicula. Tubtub sa Jueves!/PB
[/av_textblock]
[/av_one_full]
