INDI naton mapauntat ang korapsyon paagi sa paglamita sang mga wala sing sala. Daku man nga kasal-anan sa Diyos nga paantuson sila.
Wae ya sang mga kawatan nga nagahiting-hiting na ang bulsa nga indi man gani magutman ang ila pamilya. Samtang, kaluluoy matuod ang madamo nga mawad-an sang ila legal nga kabuhian kag ang indi na mabuligan nga mga pumuluyo.
***
UNFAIR matuod ang akusasyon sa kay Liga president Irene Ong, kag sa mga barangay captain sa iya idalom, nga kuno indi nila pagasundon kag ipatuman ang ordinansa nga nagatukod sang Anti-Dengue Task Force sa kada barangay.
“Wala ako ya nagsiling nga indi namon pagsundon ang ining ordinansa kay kasuguan ina nga dapat kilalahon sang tanan, labi na gid sa amon bahin nga yara sa gobyerno. Sobra naman ina ya nga sugid,” siling niya.
“Nag-explicar lang ako kon ngaa pasaran gid sing ordinansa nga nagatukod sang Anti-Dengue Task Force sa barangay, nga daw wala gid kami sing na-ubra parti sini. Wala pa ma-declarar ang dengue outbreak todo-todo na gani ang amon paninlo sa amon mga barangay,” paathag gani ni Kap.
Sunu sa iya, kon nagduging subong ang mga lamok, ina tungod, luas sa pagpaninlo, may bagay nga dapat pa himuon gid man agud lubos awayon ining mga lamok, nga ginpangutana man nila sa City Health kag sa Department of Health.
Nagpasalig man gani ang CHO kag DOH sa siyudad nga buylugan sila sa pagpatuman sang pila ka bagay. Lakip na diri ang fogging kon kinahanglan gid sa ila mga barangay, paggamit sang misting machine agud mapatay ang mga lamok sa palibut, kag ang malaparon nga pagpahibalo, upod sa media, sa publiko kon paano sila makaamlig batok sa dengue msquitoes.
“Indi kay daw wala kami sing gina-ubra kag dapat pa obligahon paagi sa sining ordinansa nga nagatukod sining Anti-Dengue Task Force sa kada barangay,” siling ni Kap nga may kasubo.
Gin-aku ni Kap Ong nga, sa matuod, indi masarangan sang task force lang ang pagpanglimpyo sa barangay.
“Indi lang ang task force ang dapat magpanglimpyo, kundi ang tanan gid nga mga pumuluyo. Indi ini masarangan sang task force lang. Ti, matanga na gid lang ang iban kag hulaton pa ang task force agud manglimpyo? Tinamad ina ya, samtang dapat ang obligasyon iya gid sang tanan kay napatad diri ang peligro sang tanan,” dugang nga paathag pa niya.
Okey man kay Kap Ong nga padumdumon sila sang Sanggunian paagi sa isa ka resolusyon nga naga-remind sa ila sang ila obligasyon, nga sa matuod ginahimo naman nila, kay sakop man ina sang ila katungdanan.
“Pero tani indi pag-limitahan ang pagpanglimpyo namon paagi sa task force lang. Sa nasiling ko na, gatudlo ini sing tinamad sa mga pumuluyo nga indi katapo sining task force, kag obligasyon gid man sang tanan nga manglimpyo sa barangay labi na gid sa sining padayon nga panghalit sang dengue,” alungay pa gani niya.
***
Wala natabuan si Kap Ong sadtong ginpapasar sang Sanggunian ang ining ordinansa nga gin-author ni Councilor Candice Tupas.
“Wala ako natabuan sang pagbinotohay sa sining ordinansa, kag kon yara ako wala gid man ako nagboto pabor sina,” siling niya.
“Pero indi buot silingon sini nga indi namon pagsundon ining ordinansa, ” dugang ni Kap.
Kasuguan ini nga dapat sundon sang tanan,”labi na gid sa amon bahin”, siling gani niya.
***
“Okey lang kon ginapilit gid man sang iban nga nagsiling ako nga indi namon pagasundon kag ipatuman ang ining ordinansa, nga, of course, indi matuod. Apang ina seguro kay luyag ko nga indi lang ang Anti-Dengue Task Force ang mag-trabaho, kundi pati na ang tanan-tanan gid nga pumuluyo,” hatag rason ni Kap.
Tuod man, ngaa limitahan naton ang pagpanglimpyo sa task force lang, samtang mas epektibo ang pagbinuligay sang tanan sa ining pag-away sa lamok nga nagadala sang dengue?
In fact, wala man sing ilegal ang paghingyo nga updan sang tanan ang pagpanglimpyo. Indi ka pa sina nga mapatuman ang Anti-Dengue Task Force kag may dugang pa nga pagduso sang tanan gid nga mga pumuluyo?/PN
