SAMTANG nagahilapit na ang May 2022 nga eleksyon, makapahuway-huway na seguro ang Diyablo, ang hari sang mga Panulay, sa iya ginharian kag indi kinahanglan anay manabad pa ini sa katauhan.
Ina tungod madamo na ang magadala kag magahimo sang iya malain nga mga buluhaton diri sa duta sa ini nga eleksyon nga pwede na niya itugyan sa mga Sungayan nga mga kandidato.
In fact, indi naman kinahanglan tudluan pa ang mga Sungayan nga ini sa ila kabutigan kag pagpakuno-kuno nga mga matarong sila. Duna na ini sa ila.
Ang masakit pa kag masubo kay kon matamad ka sa paghibalo, nga nagakatabo pa sa madamo, kon ano gid sila kag kon ano ang ila kaya himuon nga kalainan, mahulog ka gid sa ila bubon nga may suyak nga nagahulat sa idalom.
Indi man gani kinahanglan mag-problema ang Diyablo sa kon ano ang mahimo sang mga Matarong nga mga kandidato. Tutal yara naman ining mga Sungayan nga mga kandidato agud palinginon ang mga ulo sang ila mga kasumpong.
In fact, bisan pa gani magdaug ang mga Matarong nga mga kandidato kag patihan sang mga pumuluyo indi na ini mangin problema sang Diyablo.
Kalipay na sini nga nangin sumulunod niya ining mga Sungayan nga ini, dugang pa ang mga naintuan nila tungod man sa pagpabaya sang ila obligasyon moral sa Diyos. Ang importante lang sa Diyablo amo nga mabulag ini sila sa grasya kag pag-inakop sang Diyos nga kontra gid niya halin pa sa ginsuguran.
***
Sa bahin sang mga Matarong nga mga kandidato, indi gid kamo magpadaug sa hingyo sangDiyablo kag, bisan ano pa ang matabo, upod kamo sa Diyos gihapon kay Siya lang ang makapasalig sang aton kaluwasan diri man sa duta kag tubtub pa sa katubtuban.
Gani, gamiton lang pirme ang Kamatuoran sa inyo pagdala sang isyu kag ang pamatuod sang inyo matarong nga pagkatawo, ikasarang kag hinimuan, kag mga programa nga “doable” nga wala sing limbong. Ubayan kamo tani sang Diyos sa inyo Matarong nga pagpangampanya!
Sa panugyan gani ni VP Leni Robredo sadtong Easter Sunday, “Sundon naton ang panugyan ni Kristo nga buligan gid ang mga kubos”, katulad sang ginhimo niya sang iya panahon sa duta.
Kilala si VP Robredo sa iya pagkabalaka sa mga kubos. Sadto pa nagabulig libre na siya bilang abogado sang mga kubos kag ginadaug-daug. Maabtik siya magbulig sa mga problema sang mga kubos samtang kongresista pa. Kag tungod sini ginpadaug siya sang mga pumuluyo sa pagka-Bise Presidente sadtong eleksyon sang 2016. Nangin programa niya bilang VP ang Angat-Kabuhayan para sa mga kubos. Nagalaum gani ang kadam-an nga siya gid ang madaug bilang Presidente sa sining 2022 Election.
***
Sa bahin sang aton mga kubos nga mga pamuluyo, indi kamo magpati sa ining kandidato nga ginapabugal gid ang pag-upod sang may “kulang sing kinaalam” sa iya, sunu sa resulta sang ila kwesyonable nga survey. Ginkalipay man sini nga wala nag-upod sa iya ang madamo nga “may dugang nga kinaalam”.
Ang tanan nga tinuga sang Diyos gintagaan Niya sang ikasarang agud hibaluon kon ano ang matuod kag bagay sundon, maalam man ukon indi.
Gani insulto ini sa inyo nga nag-upod kamo sa sining kandidato tungod gali kulang kamo sing kinaalam.
Indi rason ang “kulang sing kinaalam” agud updan siya. Basi napapati lang niya kamo nga matarong siya nga tawo tungod sa iya malimbungon nga propaganda.
Gani kinahanglan mag-isip-isip dugang agud mahibal-an gid ang kamatuoran kon bagay bala siya botohon sa nahibal-an gid naton nga pagkatawo kag track record niya.
Hibalua anay kon ngaa wala mag-upod sa iya ang may tinun-an sing mataas, katulad sang nag-endorso gid sa Leni-Kiko tandem nga madamo nga mga propesor, ekonomista, doktor kag mga health workers, abogado kag bisan SC justice, manunudlo, kag bisan ang mga workers kag mangunguma nga nakakilala gid sa Sungayan nga ini.
Ina kay indi sila luyag matontohan sang isa ka butigon, wala nagabayad sing income tax, luyag maglikaw sa pagbayad sang P203 ka bilyon nga estate tax, kag nagapalapaw lang sing sugid sang iya programa samtang wala man sing nahimuan nga maayo samtang yara pa sa gobyerno sing madugay.
Basi husto man sila kag dapat updan naton sila sa pagsikway sa sining Sungayan nga kandidato sa pag-abot sang May Election./PN
