[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’Ang mga Pagpasimpalad ni Peter Valentine COSTAS’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”][/av_heading]
[av_textblock size=” font_color=” color=”]
Mga napulu ka minutos pagkatapus nagsandig ang iya likud sa pulungkuan, bag-u pa man nakalarga ang Blue Star Ferry halin sa pantalan sang Athinios, naghandukan na si Peter Valentine.
Kapuy gid sia kag medio lapyu pa. Malip-ut ang iya tulog sang nagligad nga gab-i. Kag temprano pa sia nagbugtaw kaina.
May diutay nga kasubu sa iya dughan bangud nahulug ang iya buot sa guapo nga si Nikolaos. Si Nikolaos, nga nagdala sa iya sa isa ka especial nga lugar agud bantayan ang pagbutlak sang adlaw. Apang si Nikolaos, nahigut sa Santorini; kag si Peter, natalana nga magpadulung sa Athens.
Kon may kasubu, daw luyag lang ni Peter Valentine nga mamiyuku, magpakuribung, magpahimunung, magtulug. Walo ka horas ang viaje halin sa pantalan sang Athinios, Santorini pakadtu sa Piraeus, Athens. Magahapit ang sakayan sa duha ka mga isla, sa Naxos kag Paros, bag-u magdungka sa pantalan sang Piraeus.
Sa Naxos na nakabugtaw si Peter. Nagbocina ang barko, nagkinarankaran ang mga pasajero nga nanaug kag nagsaka. Naghulat ang ferry sang makadali agud mapahamtang ang mga salakyan kag kon ano pa nga kinahanglan makalab-ut sa Parros kag Piraeus.
Naggua si Peter sa first class cabin kag nagkadtu sa balconaje agud magkuha sang litrato sang porto kag sang sunset. Agud makuha ang perfect view sang nagahinunud nga adlaw, ginhulat niya nga mag-idug-idug ang isa ka lalaki nga nagatabun sang iya line of sight. Nagkuha sia sang tatlo ka shots sang sunset, apang sa ikatlo niya nga tum-uk sang button, nagsulud sa frame sang iya iPhone camera ang lalaki. Photobomber!
“Sorry,” siling sang lalaki nga nagyuhum kag nagtangu kay Peter.
“It’s okay,” sabat ni Peter nga gilayun na-in love sa bigotillo kag daw brusquo nga lalaki. Ruggedly handsome, apang may aura sang kabuut kag pagkamainabyanon.
Nagpalayu ang lalaki. Gin-atubang ni Peter ang kahapunanon. Tuman na nga pagsalimuang sa mga Griego, hutik niya sa kaugalingon. Gin-isip niya: una, si Stelios sa Rethymno; ikaduha, si Dimitrios sa Panormo; ikatlo, si Nikolaos sa Santorini.
Ginhigugma niya sila. Bisan sing makadali lang. Kag ang gugma nga indi mabalikan, nagatuga man sang kaluya, sang kasubu.
Nakabatyag sia sang gutom, kag sang manugsulud na sia sa kalan-an sang mga first class nga pasajero, naabtan niya ang brusquo nga lalaki nga ginapangitaan sang first class ticket. Wala ini sang mapakita nga ticket. Gilayun nga ginsalu ni Peter ang kahigayunan. “He’s with me,” hambal niya sa maitre d.’
Nagtangu ang head waiter, nagyuhum liwat ang brusquo kay Peter, kag dungan sila nga ginpasulud sa restaurant sang barko.
“Will you share a table with me?” Wala na huyahuya nga pamangkut ni Peter Valentine sa brusquo.
Nagyuhum kag nagtangu ang bigotillo.
Nagpungku sila, nag-order sang beef bacon burgers nga ginahimu sang Goody’s para sa barko, kag ginsalohan nila ang isa ka botella sang Assyrtiko, ang bantug nga white wine sang Crete.
Nagpakilala si Costas. Taga-Naxos kuno sia, kag magapadulung man sa Athens. Madamu pa sila sang ginhambalan, lakip na ang nakaimprenta sa T-shirt ni Costas nga nagasiling “Don’t Even Try.”
Bag-u natapus ang ila pagkaun, gin-agda ni Peter si Costas nga makig-upud sa iya hotel sa Athens. Nagvoluntar sia nga magbayad sang tanan: pagkaon, mga flete kag tarifas; basta si Costas ang mangin tour guide kag kaupud niya.
“Do you like me?” pamangkut ni Costas nga may mapanglumay kag dalitan nga yuhum.
Nagyuhum kag nagtangu si Peter Valentine.
Dayon, dungan sila naghambal, “Don’t even try.” Kag gintuluk sila sang tanan sa restaurant sang sila nga duha mahagpuk nga nagharakhak./PB
[/av_textblock]
[/av_one_full]
