Ano ayhan ang mangin bili sang imported NFA rice?

KARON nga nagsugot na ang Pilipinas sa pagbakal sang bugas halin sa Thailand kag Vietnam, pila ayhan ang mangin bili sining imported rice sa pagbaligya sang National Food Authority (NFA)?

Sadto tag-P27 ang kada kilo. Amo man bala ang presyo sini para sa aton mga pigado nga mga pumuluyo sa pungsod, nga nagadamo sang mga 6 tubtub 10 ka milyon?

Duha ka klase sang bugas ang nahisugtan ta nga baklon – ang bugas nga may 15 porsyento nga broken rice (bugas nga ginautod-utod sa galingan) nga bulubarato, kag ang may 25 porsyento nga broken rice, nga medyo mahal-mahal diutay.

Ang baklon ta nga mga 250,000 ka metrica tonelda nga bugas amo ang 120,000 MT halin sa Thailand kag 130,000 MT halin sa Vietnam. Government-to-government ini nga transaksyon agud mas madasig ang pagpatigayon sini agud makahingabut sa lean months sang tag-talanom sa Hunyo tubtub sa pagsugod sang tag-alani sa Setyembre.

Ang NFA spokesperson nga si Rez Estoperez nagsiling nga ang una ang tranche (pauna nga padala) magasugod indi maglapaw sa Mayo 31 tubtub Hunyo 15 sang sini nga tuig.

Ang mga discharge port patigayunon sa mga puerto sang Bacolod, Cebu, Iloilo, Metro Manila, Poro Point kag Tacloban.

Ang Bacolod ga-expectar sa pagbaton sang inisyal nga alokasyon nga mga 80,000 ka sako (bags) halin sa Vietnam sa palaabuton nga Hunyo 10.

Si NFA-Negros Occidental manager Frisco Canoy nagsiling nga ang iya upisina nakabaton na sang notisya halin sa NFA central office nga suguran na ang pagkarga sang bugas sa puerto sang Vietnam sa Hunyo 9.

Matapos ini, siling niya sa sulod sang lima ka adlaw, kag magaabot ang barko sa Bacolod sa sulod sang lima ka adlaw nga byahe. Sa aton pa, maabot na ang una nga tranche sang bugas sa Bacolod sa palaabuton nga Hunyo 19.

Ang ikaduha nga tranche nga 80,000 ka sako man ginapaabot nila nga magtupa sa Bacolod sa masunod nga bulan sang Hulyo.

Tungod sining pag-abot na sang bugas halin sa Vietnam kag Thailand, ginapaabot sang NFA nga ma-stabilize na ang presyo sang bugas sa pungsod.

Sa karon, ang bili sang well-milled nga bugas, nga pulos commercial, sa pungsod nagalakat sa P43 tubtub P45 kada kilo. Ang bulubarato mga P39 kada kilo. Masakit ini para sa mga kubos ta nga mga pumuluyo nga sadto gabakal sang NFAa rice sa tag-P27 lang kada kilo.

Ano ayhan ang bili sining bag-o nga importasyon sang bugas halin sa Vietnam kag Thailand?

Sadtong ginabaligya pa sang NFA ang iya bugas sa tag-P27 kada kilo, ginabakal naman sini sa mga mangunguma sang tag-P17 kada kilo. Karon, ugaling, indi na ini mabakal sang NFA sa amo gihapon nga bili sa mga mangunguma. Ginabakal na ini sang tag-P25 kada kilo sang mga pribado nga mga rice trader, nga wala kita sing kontrol tungod sang free enterprise.

***

Sa una nga impormasyon halin sa NFA central office, puede ini mabaligya sang NFA sa tag-P25 tubtub P30 kada kilo, depende sa klase sang imported nga bugas.

Pero, wala pa kita sang opisyal nga pahibalo parti sini.

Ginpatigayon sang NFA ang rebidding sang mapaslawan ang bidding sadtong Abril 27 tungod ang offer sang Vietnam kag Thailand naglapaw sa reference price sang NFA.

Sang mag-rebidding na, ang NFA nagtanyag nga magbakal sing bugas sa presyo nga USD (US Dollar) 531 kada MT nga may 15 porsyento nga broken rice kag USD520.50 kada MT sang bugas nga may 25 porsyento nga broken rice.

Sa ginhisugtan, ang Thailand ang maga-supply sang 120,000 MT nga may 25 porsyento nga broken rice sa bili nga USD517.50 kada MT.

Ang Vietnam ang ma-supply sang 50,000 MT sang bugas nga may 15 porsyento nga broken rice sa bili nga USD 526.50 kada MT kag 80,000 MT nga may 25 porsyento nga broken rice sa bili nga USD 517.50 kada MT.

Ini nga mga offer sang duha ka pungsod pulos kabos sa repference price sang NFA.

Wala masiling kon bala kinahanglan pa magbayad ang NFA sang gasto sa pagbyahe (freight), insurance kag iban pa nga balayran agud malakip ini sa sumada sa aktwal na nga pagbaligya sang subong nga NFA rice sa mga pumuluyo. (w_mateojr@yahoo.com/PN)

LEAVE A REPLY

Please enter your comment!
Please enter your name here