SA PAGPADAYON pa sang mga hearing sang Senate Impeachment Court, gapati kita nga indi gihapon pagasabton personal ni VP Sara Duterte ang mga ebidensya nga gina-presentar sang Prosecution batok sa iya.
Kag itugyan lang ini sa iya mga abogado sa Depensa kon paano malikawan sabton direkta ining mga ebidensya sang Prosecution paagi sa ila diversionary tactic gamit ang technicalities nga mapasugtan man sang korte, half-truths kon indi gid man binutig gid, kag pagwaon nga “biktima” pa si VP Sara sang political oppression.
Ina tungod ginpili niya ang iya “right to remain silent”, kag isalig lang sa iya mga abogado ang diskarte kon paano siya maapinan nga indi siya madalman, kon indi gid man malampuwasan ang mga ebidensya sang Prosecution.
Ina man tungod indi gid man niya seguro mapangapinan ang ginapapas-an sa iya nga mga akusasyon sang Prosecution.
Nga daan mabug-at ang mga akusasyon batok sa iya – PhP817 ka Milyon nga Unexplained Wealth, ang nadiskubrihan nga manggad nga na-launder out nila nga mag-asawa sa foreign deposits, ang indi pag-divest sa iya mga negosyo nga gina-requirer sa nakapungko sa poder, ang daku nga discrepancy sang gin-deklarar niya nga mga SALN sa pila ka tuig ikumparar sa aktwal nga income sandig sa iya tax declaration, nadiskubrihan pa nga mga undeclared nga mga propiedad, etcetera!
Kag tungod sini, isalig na gid lang niya ini sa abilidad sang iya mga abogado sa pagpalusot ukon pagbinutig na gid lang nga basi pa lang mapatihan.
Well, hambalon pa, mahimo sang isa ka abogado ang pagbinutig agud luwason ang iya kliyente. Kag mahimo man sang abogado ang panindugan ang Kamatuoran kag ang Hustisya sa kaso sang iya kliyente.
Apang kon ang ginapanindugan amo ang “verifiable evidence”, mabudlay ini seguro ipangwala paagi lang sa binutig kag bisan pa sa abilidad sa pag-debate.
Nadumduman ko pa ang kilala naton nga si Atty. JJ – Bless his soul! – nga sang gindangop sang kliyente ang kaso sini sa iya, kon diin gin-aku niya sa abogado ang pagpatay sang iya biktima, nagbalibad ini nga batunon ang kaso tungod indi niya mahimo butigan ang korte nga inosente ini. Pobre nga abogado nga sa kaakig sang kliyente doble bukol ang iya naagom.
***
By the way indi man kinahanglan nga pamatud-an ang “Guilt” ni VP Sara tubtub sa “beyond reasonable doubt”. Sa Impeachment Trial pwede na tubtub lang sa “probable cause” sa Indictment Phase agud mahusgaran ang “impeachable official” sing “Not Guilty” ukon “Guilty” agud mapatalsik na sa pwesto. Kag ugaling ipasaka ang kaso sa regular court (Sandingabayan) kon gustuhon sang Prosecution.
Rason nga nagatuluhaw na sa kalye ang mga mass demonstration batok sa corrupt kag abusado nga mga public officials nga ginapangunahan sang mga Gen Z – mga estudyante sa kolehiyo – nga dala ang ila sentimiento sa ila mga placards kag pagsinggitan nga “Ikulong ang mga Corrupt!” kag “Convict VP Sara!”
***
Indi kita malipat sang Gen Z revolt sang Septyembre 2025 sa Nepal nga nangin-violente kag nagpalayas gid sang gobyerno lakip pa gani ang Prime Minister tungod hayag na sa ila ang indi mabatas nga nepotismo, panuhol (bribery), pagpabaya sa kahimtangan sang mga pumuluyo, kag pagpakabal sa sige-sige nga pagpangawat sa gobyerno with impunity.
Nga daw amo man gani ang nagakatabo na sa pang-gobyerno naton sa Filipinas sa karon, nga indi matapna sang “Legalistic” nga pagpalakat sang aton kasuguan nga indi maintiendihan sang “common tao” sa ila “common sense” kag pilion na gid lang ang mag-alsa sa dalanon.
Sa ina nga sitwasyon, nga daw dira kita padulong, ano ayhan ang resulta sang palaabuton nga desisyon sang Senate Impeachment Court?
Ang magpakabal sa ila bulag nga pag-simpatiya kay VP Sara agud ihatag ang ila boto nga “Not Guilty” sa iya bisan indi nila matulon ini sa ila konsyensya?
Ukon ang “Guilty” ruling sa bahin sang gapanindugan sa Kamatuoran kag Hustisya para sa pumuluyo?
Ukon ang mass demonstration sa kalye nga ginapangunahan sang mga Gen Z, nga tani indi lang kasubong ka-violente sangsa natabo sa Nepal sadtong Septyembre 2025 nga pati ang mansyon sang Prime Minister gintutdan pa, kon diin na-trap kag napatay pa sa sunog sang ila mansyon ang asawa sini? Ipalayo lang!/PN
