Daw indi na sya!

“DAW INDI na ina sya ang nagahambal haw? Daw indi ko ma=imagine nga amo na ina sya maghambal kontra sa iya kasumpong,” siling sang isa ka tigulang  sa isa ka merkado sang syudad.

Ini ang akun nabati-an sa isa ka tigulang nga nagabaligya sang utan samtang nagapamati sa interview sa RMN Iloilo sang isa ka politiko. Sang akun ginpalapitan kag ginpamati-an, gina-interview gale si Cong. Jerry Treñas.

Sa interview daw indi masagang ang akusasyon kag yawyaw ni Treñas sa iya bilas nga si Mayor Jose Espinosa III nga kasumpong niya sa pagkaalkalde sa Mayo 13 nga election.

Bisan aku natingala ngaa mahigko na ang mga nagakawas nga tinaga sang halangdon nga kongresista. Sang nagaeskwela pa ako sa kolehiyo sang nangin konsehal pa lang sa syudad si Treñas, ginaidolo ko na ini sya. Ngaa man? Isa sya ka maalam nga tawo nga kun magbuya sang tinaga, puno sang kinaalam kag pagtulon-an.

Sang nag-engkwentro sya kay anay Cong. Raul Gonzalez Jr., ang anak ni anay Justice secretary Raul Sr. daw indi man amo ni kahigko ang iya ginapanghambal. Apisar nga ginatira sya sang mga Gonzalezes, wala sya masyado nagasabat sang masingki nga pahayag.

Apang subong ngaa nga kun sa diin nga bilas pa niya ang iya kasumpong ngaa mas mahigko ang ginabuy-an nga tinaga ni Treñas?

Ginalakip na niya sa iya mga interviews kag campaign sorties ang pinamilya nga estorya. Kuntani panumdumon ni Treñas nga ang election magalipas apang ang ila relasyon sang bilas dapat ginadampigan.

May rason bala si Treñas nga maakig kay Mayor Joe III Espinosa bangud nagpadalagan ang bilas sa pagkaalakalde apisar nga ginaduso sya nga mangin kongresista?

Kun basehan ang una nga deklarasyon ni Treñas, indi na sya magdaalagan kag si Mayor Joe naman ang mabulos. Ginlaragway pa niya si Mayor Joe III nga maalam, mabuot kag wala sang gamo nga tawo. Pero subong ginapaggwa niya nga daw may sungay ang bilas.

Maathag nga ang tuman nga ang handum ni Treñas nga magbalik sa renda sang syudad amo ang nagbag-o sang dalagan sang iya utok kag pagbag-o man sang iya estilo sang kampanya.

Kuntani, antes ang politika, paminsaron ni Treñas ang relasyon sang pamilya. Kampanya lang sa plataporma, indi pagdalahigon sa pagyudyud sa lunang ang pamilya.

Dulogan na niya ang pagpakamalaot sa asawa ni Mayor Joe III. Awayon lang nila ang election, indi lang pagdalahigon ang asawa sang alkalde.

Kuntani ang handom sa politika indi rason agud talikdan ni Treñas ang relasyon sang pamilya.

Nagapati kita nga dungganon nga tawo ang kongresista gani kabay pa ulikdon nya ang relasyon sang pamilya. ([email protected]/PN)

LEAVE A REPLY

Please enter your comment!
Please enter your name here