MAKAHALAM-ot ang ginpalayag nga report sang bise presidente sang pungsod. Madamo sang ulo ang nag-ulong-ulong samtang nagapamati sa iya mga ginabungat. May pila ka tawo nga wala na nag-uyang sa pagpamati sa iya pahayag bangud sa pagpati nga wala man ini sang esensya.
Sa iya 40 ka pahina nga report, ginsiling sini nga uno porsyento lang sang suplay sang druga kag kwarta ang nakumpiskar sa nakalipas nga tatlo ka tuig sa giyera kontra-druga nga paghimakas sang Duterte administration kag makabig ini nga paslaw.
Sa sulod sang 18 ka adlaw nga pagpungko sini bilang co-chairperson sang Inter-Agency Committee on Anti-Illegal Drugs ukon ICAD, gintipon niya ang mga impormasyon gikan sa istadisdika sang Philippine National Police lakip sang Philippine Drug Enforcement Agency kag diri nagsandig sa iya konklusyon sa paghatag sang grado nga uno ukon paslaw ang paghimakas sang gobyerno.
Dismayado ang kalabanan sa ginbungat ni Robredo. Natandog ang balatyagon kag pang-ino-ino sang mga otoridad nga nagpulaw-bugtaw agud nga madakpan ang mga imbolbado sa ilegal nga druga.
Maathag man nga tuman ka daku ang natigayon nga kadalag-an sa pag-away sa ilegal nga druga ilabi na nga mas luwas na ang pagpanglakaton sa kada magkagat na ang dulom sa mga dalanon. Mas kumpiyansa na ang mga tawo nga wala sang may maghalit sa ila nga adik kag wala sang samong nga magatublag sa kalinong.
Ginpangapinan ni Police Lt. General Archie Francisco Gamboa, ang officer-in-charge sang PNP, ang ila organisasyon paagi sa pagsiling nga indi daku nga kapaslawan ang ila anti-drug campaign bangud ila natigayon nga marumpag ang operasyon sang 14 ka likom nga laboratoryo kag 419 ka mga drug den. Ang 14 ka narumpag nga likom nga laboratoryo indi amo ang 1% nga gintumod ni Robredo kundi posible amo ang 100% nga kadalag-an bangud wala na sang local production sang shabu sa pungsod.
Indi kapaslawan ang napapas nga kapin sa 5.1 tons sang shabu, 2.2 tons sang marijuana, 500 kilograms sang cocaine kag 42,473 ka ecstacy pills nga tanan ginabulubanta sang Dangerous Drugs Board nga nagabalor sang 40.39 billion pesos.
Sumugod nga ginlunsar ang krusada kontra ilegal nga druga sadtong 2016 tubtub sa ikaapat nga bahin sang 2019, may kabug-usan nga 151,601 ka mga separado nga anti-drug operations nga nahiwat nga nagresulta sa pagkatikma sang 220,728 ka taglapas nga ginalakipan sang 8,185 ka mga high value target kag kamatayon sang 5,552 ka mga drug personalities.
Nagresulta man ini sa pagka-drug cleared sang 16,706 ka mga drug-affected barangay sa magkatuhay nga lokalidad.
Natigayon man nga matratar sa idalom sang PNP-initiated kag ginasakdag nga community centers recovery and wellness programs ang 421,724 ka drug patients.
Maathag man nga walo sa 10 ka mga Filipino ang lubos nga nagasuporta kag naga-aprubar sa away kontra sa druga sang gobyerno.
Kuntani makita man sang bise presidente nga 55 ka pulis ang naghalad sang ila kabuhi sa pagpakig-away batok sa druga kag isa ka pagtampalas kon ibungat nga napatay sila nga wala sang pulos bangud napaslawan nga mauntat ang problema sa druga.
Maathag nga gintakus nga kulabos sang bise presidente ang paghimakas sang gobyerno kon sa diin siya man ang kabahin.
Mabudlay maghusgar sa nahimo sang iban, ilabi na kon ang nagahusgar wala man sang nahimuan. (bertladera@gmail.com/PN)
