Hangpon ta

MASAKIT ang dalit sang nakaligad nga election. Masakit indi lang sa balatyagon kundi labaw sa tanan sa bulsa. Indi lahog ang gastohanay sang kwarta sang nagligad nga kampanya. Indi lang libo kundi milyon kag ginatos ina ka milyon.

Sa probinsya sang Iloilo madugay man nga nahibaluan nga nagdaug si Cong. Toto Defensor bilang Gobernador antes nagbaton sang kalutusan si Cong. Ferj Biron.

Apang ang pagbaton ni Biron hapaw lang kag may ginbasol pa sa iya kalutusan. Siling niya biktima sya sang “last minute manipulation” sang kasumpong.

Wala man ginpaathag kun ano ang ginatumod niya gani haum-haum na lang kita. Ang maathag lang nga gin-akusahan niya ang kapulisan sa pagpamuno ni Police Regional Office 6 director John Bolalacao nga private army sang mga Defensor. Makita ini sa mga posts sang iya supporters.

Apang sa mga inagihan sa kabuhi ni Biron, malampasan niya ining pinakapait nga kalutusan sa eleksyon. Mapait kag masakit bangud inadlaw na lang ang botohay, abanse na sya sa survey apang sa adlaw sang botohay kag sa isipay sang balota, nagtuwad gid ang tabungos.

Diri sa syudad sang Iloilo, natabu man ang pinakamapait kag masakit nga away sa politika. Masakit ini bangud magbilas ang nagaengkwentro. Pati ang mga sekreto sang pamilya nadalahig, mga asawa kag anak naumid.

Sa iya kadalag-an nga wala gani nakatunga si Mayor Joe III Espinosa, nagsiling si Mayor-elect Jerry Treñas nga indi pa sya handa nga makig-uli sang maayo nga buot sa bilas. Siling ni Treñas kaangay sya sang punyal nga ginpatalum sang mga pagpakalain sang iya kasumpong.

Sa bahin ni Espinosa sa adlaw mismo sang botohay, nagsiling na sya nga handa sya mag-reconcile sa iya bilas. Apang siling sang alkalde nahangpan man niya ang bilas. Panawagan niya, natapos na ang election ti-on na nga mag-move on.

Mahangpan man natun kun ano ang hugot ni Treñas. Masakit man matuod nga dalahigon ang pamilya sa gamo sang politika. Maluwas pa nga nangin makapoy sa lawas kag bulsa ang ila nangin kampanya.

Ang makalulooy karon amo ang mga regular nga empliyado kag department heads sang city government nga ginapatihan nagsuporta kay Espinosa. Ginhambalan na sila nga mag-resign kay kun indi pasakaan sila sang kaso. Ini ang mas masakit. Ang maipit ka bilang isa ka empliyado. Kun ikaw ginasugo sang imo boss, paano ka magbalibad? Makalolooy man nga mga empliyado.

Sa pihak sini, nagalaum kita nga magbag-o pa ang pinsar sang atun masunod nga alkalde. Si Treñas kilala man nga maayo nga lider kag may pag-ulikid sa iya mga tinawo. Kun ano man ang iya ginahambal subong, bunga lang ina sang dalit sang pulitika nga posible pa magbag-o kun mag-ugdaw ang kainit sang balatyagon.

Gani sa karon nga higayun, hangpon ta sila! ([email protected]/PN)

LEAVE A REPLY

Please enter your comment!
Please enter your name here