Iloilo International Airport, ipabugal

MADUGAY man nga ginhimakasan. Nagbunga na ang ginpangabudlayan. Daku nga katungdanan ang naagom nga kadungganan.

Dapat ipabugal kag hatagan sang daku nga pasulani ang pagkilala sa Iloilo International Airport bilang isa sa mga Best Airports in Asia for 2019 suno sa airport sleeper’s guide kag resource website nga sleepinginairports.net nga naglista sa aton airport kaupod ang Mactan-Cebu International Airport.

Duha ka mga airport nga nagpat-in sa pungsod Pilipinas nga mangin kabahin sa mga listahan sang mga airport sa bug-os nga kalibutan nga may mapabugal man kag natalupangdan man sang mga nagabiyahe.

Kahibalo kita nga sadto ang Ninoy Aquino International Airport ang nalakip sa listahan sang mga malala nga airport, base man sa sini nga travel website. Gin-imprubar ang NAIA 1 kag 2 lakip ang bug-os na nga operasyon sang Terminal 3 rason nga nadula ini sa listahan sang mga malala nga airport sa kalibutan.

Daku nga kadungganan ang aton nabaton bangud sa kaangay nga website natalupangdan ang duha naton ka airport kag nalakip sa 20 best gateways in Asia, kon sa diin ika-16 ang Cebu-Mactan International Airport kag ika-18 naman ang Iloilo International Airport. 

Gintukod sadtong 1996 ang nasambit nga website nga nagakalaging sang mga Best kag Worst airport gikan sa ila tuigan nga survey kag airport reviews nga ginsumiter sang mga bumalasa kag nagahatag sang rating suno sa ila eksperyensya sa airport.

Sa sini nga tuigan nga survey, ang mga nagabiyahe ginapamangkot nga hatagan sang rate ang ila airport experience base sa mga factors kaangay sang kakomportable, mga serbisyo, mga pasilidad kag mga bagay nga pwede mahimo, pililian sang mga pagkaon, immigration/security, customer service, navigation kag ang kasulhay sang transit, katinlo, kag angay matulugan.

Nagakinahanglan sang tayuyon nga pag-imprubar ang aton airport sa Iloilo. Indi naton pagpabay-an kag pagpabuyan-buyanan bangud ang pag-imprubar sini ang wala katapusan nga paghimakas.

Kahibalo kita nga ang mga nagabiyahe mas una nga makaangkon sang impresyon sa kon ano ang isa ka lugar sandig sa ila una nga pagtapak sang nagpanaog na sila sa eroplano kag nagapasulod sa airport. Ang ila pamatyag kag ang metikuluso nga paglantaw sa sitwasyon ang nagahatag sa ila sang impresyon sa isa ka lugar rason nga dapat kahibalo kita kon paano naton sila maamuma suno sa ila ginalauman sa aton, ilabi na nga nagapati sila nga pinasahi ang pag-abi-abi sang mga Ilonggo.

Ginduso sang sini lang ni Atty. Helen Catalbas, ang regional director sang Department of Tourism – Western Visayas nga kinahanglan na nga pasangkaron bangud nalab-ot na sini ang iya kapasidad sadtong walo ka tuig na ang nakalipas.

Sang ginbuksan ang airport sadtong 2007, ang orihinal nga desinyo sini amo ang pag-akomodar sang 1.2 million ka mga pasahero suno sa datus sang Civil Aviation Authority of the Philippines.

Sa karon, ang airport nagaserbe sa 2.4 million ka mga pasahero sa kada tuig kag nagagutok na ang passenger terminal building ilabi na nga ang tuyo sini sadto para lang sa domestic passenger, apang karon may mga biyahe na padulong sa Hong Kong kag Singapore.

Samtang aton ginapabugal ang aton airport, indi kita malipat sa pag-imprubar sini bangud diri nasandig ang pagpabilin naton sa listahan sang mga pinakamaayo nga airport sa Asya kon sa diin nagapanguna diri sa listahan ang Changi International Airport sa Singapore. ([email protected]/PN)

LEAVE A REPLY

Please enter your comment!
Please enter your name here