MAGABATON sing dalagku nga mga premyo ang aton mga atleta nga nagpasakop sa 2020 Tokyo Olympics, nga nagtakop na sadtong Domingo, Agosto 8.
Una na dira ang apat (4) nga nagdaug sang gold, silver kag bronze nga mga medal.
Napulo’g siyam (19) ining aton Olympians nga nagpasakop sa Athletics, Boxing, Golf, Gymnastics, Judo, Rowing, Shooting, Skateboarding, Swimming, Taekwondo, kag weightlifting.
Sunu sa RA 10699 (Section 8), ang gold medallist magabaton sin P10 milyon, P5M sa silver medallist, kag P2M sa bronze medallist. Ang gobyerno – nasyonal kag LGU – nagpasalig man sang dugang nga mga premyo sa ila. Nagdugang man diri ang mga private donors.
Ang estimate sang bug-os nga mabaton nga cash ni Hidilyn Diaz, sa pagdaug sing nahauna nga gold sang pungsod sa 55k Women’s weightlifting, magalab-ut sa P50M. May house-and-lot kag salakyan pa.
Ang iya ni Nesthy Petecio (Women’s featherweight) kag Carlo Paalam (Men’s flyweight), sa ila pagdaug sing silver medal sa boksing, magalab-ut sa sobra P30M nga cash kada isa sa ila. May dugang pa nga premyo nga house-and-lot kag iban pa halin sa private donors.
Ang batunon naman ni Eumir Marcial (Men’s middleweight) sa iya bronze medal magalab-ut sing sobra P10M nga may dugang pa nga iban nga insentibo halin sa gobyerno – nasyonal kag LGU – kag mga private donors.
Ang mga wala nagdaug (15 sila tanan) magabaton sing P500,000 kada isa halin sa gobyerno nasyonal kag sing dugang nga mahatag pa sing ila mga probinsya kag siyudad.
Si Irish Magno sang Iloilo, nga nalugaw-an maka-bronze, magabaton man sing dugang nga P200,000 halin sa probinsya kag amo man nga kantidad halin sa siyudad.
In fact, mas daku nga mga premyo ang mahatag sang Filipinas sangsa iya sang United States: $37,000 (P1,850,000/P50 per USD) sa gold medal; $22,500 (P1,125,000) sa silver; kag $15,000 (P750,000) sa bronze.
Pero nga wala, ugaling, sing premyo ang mga training staff sang sining mga atleta haw? Wala man ini sila seguro nagdaug kon wala ining mga training staff, indi bala?
***
Si Hidilyn Diaz nagpasalig sang daku nga bulig halin sa iya premyo para sa sports development sa iya sports category kag sa sports sa Filipinas, sa kabug-usan. Partikular sa training sang mga atleta, kon diin nagreklamo gid siya sang kakulangan sini sa ila para sa Tokyo Olympics.
Tani makahatag man sing amot ang iban nga mga atleta nga nakabaton premyo, labi na gid ang nagbaton gold, silver kag bronze medal.
Sa Singapore, nga dalagku man ang ginahatag nga mga premyo sa ila international athletes, gina-require ang mga medal winners sa pag-share sang at least 20% sang ila dinag-an para sa ila sports development.
***
By the way, nakibut kita sa balita nga si Hidilyn Diaz, nga isa ka sarhento sa Philippine Air Force, naakusahan nga kabahin sang Oust-Duterte plot, ukon pagpatalsik sa Presidente, sadtong naga-training pa siya para sa Tokyo Olympics. Kag ina tungod gid lang kay nagreklamo siya sa kakulangan nga suporta nga ginahatag sang gobyerno sa ila pagpasakop sa Tokyo Olympics.
In fact, nalista gani siya sa “matrix” sang mga personalidad nga kuno naga-plot agud patalsikon si President Duterte. Pinahog pa siya nga ipa-court martial.
Pati gani ang amay ni Hidilyn Diaz ginsuspetsahan man tungod nakitaan ini sang kamiseta sang Magdalo group.
Ining Magdalo Group, nga nagapakila nga mga “Bagong Katipuneros”, ginapasakupan sang mga myembro sang Armed Forces of the Philippines. Nagatindug ini sila sa kawsa sang pag-reforma sang gobyerno batok sa corruption, kag ang pag-promote sang good governance kag social justice sa pungsod.
Pasista nga pamensaron ini ya nga akusasyon kay Hidilyn Diaz nga nagakatabo sadto sa panahon sang martial law ni Diktador Marcos, kon diin sa diutay mo lang nga pagreklamo target ka na sang military surveillance.
Salamat kay wala pagsapaka ining akusasyon batok kay Sgt. Hidilyn Diaz sang PAF. Gin-promote pa gani ini pasaka sa Staff Sergeant (SSgt) tungod sa daku nga kadungganan nga gindala sini sa PAF kag sa pungsod sa iya pagdaug sing gold.
Well, nag-apologize ang Malakanyang parti sa sining wala pulos nga akusasyon sang kon sin-o nga Herodes dira sa Palasyo batok kay karon SSgt. Hidilyn Diaz nga palangga sang PAF.
Mga hangag nga nalatnan sing pagka-ulianon ining mga Herodes nga mga ini! Pensar nila martial law gihapon./PN
