Indi na dapat padayunon pa ang protesta ni Marcos

GINAPILIT ni anay senador Bong-Bong Marcos nga gindayaan siya, gani ginprotestahan niya ang pagdaug sa eleksyon ni Vice President Leni Robredo sadtong 2016 nga presidential election.

Dinayaan? May ebidensya siya? Wala man.

In fact, mabudlay mapatihan nga madayaan pa ang inisipay sang boto kay ang naga-isip sa karon amo ang computer nga wala sing ginaapinan.

Grabe man ang bantayanay sang militar kag mga pulis sadtong eleksyon sang 2016. Wala man sing nabalita nga inagaway sang ballot box, pagsulod sa presinto sang mga salawayon, ukon ano pa nga shenanigan nga indi matapna sang mga otoridad.

Okey, posible magsala ang computer, pero indi agud mangdaya. Matabo ini kon indi sini mabasa sing maayo ang pagpat-in (blackening) sang botohon, ukon nagsobra ang ginboto sangsa dapat lang botohon gani indi na mabasa sang computer, kag pila seguro ka minor lapses nga pwede kwestyunon sa manual counting.

Diutay lang ang abanse ni VP Robredo kontra kay Marcos – mga 263,473 lang – kag posible matuod nga makalusot pa si Marcos sa diutay nga ini nga abanse ni Robredo tungod sa ining minor lapses sa pag-inisipay.

Rason seguro nga daku kon ngaa ginpasugtan sang Pesidential Electoral Tribunal (PET), nga ginapangunahan sang Korte Suprema, ang protesta ni Marcos.

Gintudlo ni Marcos kon diin posible “gindaya” siya. Iya gintudlo ang mga probinsya sang Iloilo, Negros Oriental kag Camarines Sur. Ugaling, ang resulta nagpakita pa gani nga nagtaas ang abanse ni Robredo.

Karon, luyag naman ni Marcos nga isipon (manual counting) liwat ang mga boto sa mga probinsya sang Maguindanao, Lanao del Sur kag Basilan tungod kuno sa terorismo kag pinahugay sang mga botante.

Para sa akon, kag segurado sang madamo pa, indi na tani ginpasugtan pa ang luyag ni Marcos. Atong una nga pag-isip liwat bunga ato sang wala basehan nga “speculation” ni Marcos nga indi dapat tagaan pa sing importansya.

Gani, dapat pakitaan na kita ni Marcos sang ebidensya sa iya akusasyon nga may dinayaay sa ining tatlo pa ka probinsya.

Kon wala, pierde lang sang tiempo kag kwarta sang gobyerno ang padayunon pa ang recount kay pakot-pakot man lang ini gihapon ni Marcos nga wala ebidensya.

Dapat ipakita na niya ang iya ebidensya agud may basehan ang padayon nga liwat nga pag-inisipay. Kon wala man lang siya sing ebidensya, ano pa abe ang pulos sang padayon nga inisipay kay sa damgo man lang gali seguro nakita ni Marcos ang ining kuno dinayaay?

Sunu gani sa isa ka meyor sa Mindanao, indi katingalahan nga magdaug si Robredo sa mga gina-protestahan pa ni Marcos sa Mindanao kay madamo nga mga lugar diri nga si Robredo lang ang nakakadto sa pagkampanya. Wala kitaa didto sa Marcos, ti paano abe siya magdaug diri?

Sa ining liwat nga pag-inisipay nga ginapilit gid ni Marcos, may indi maayo gani nga suspetso ang iban. Basi bala naisip niya nga malisu pa ang resulta sa bulig ni Presidente Duterte paagi sa salsalon nga kamot sang martial law sa Mindanao sa idalom karon sang Presidente nga kaalyado niya.

Indi man seguro sina katarso si Digong. Masakit na ina ya nga tinarso!

***

PASIPLAT

Interesting Facts About West Visayas

By Atty. Rex S. Salvilla+

(President: Iloilo Historical Association and West Visayas Historical Research Foundation, Inc.)

‘Sports and Recreation – Post War’ – Part 6

(Halin sa Book 7, pahina 18)

Sa iban nga Field (paindis-indis):

* Nora E. Deslate sang Iloilo City – champion sa national lady marathon

* Jimmy de la Torre – Gindominar ang 1979 kag 1980 Alay nga Pangulo Marathon, ang 1979 Golden Gate (junior division) sa San Francisco (California), ang 40-km Milo Marathon sadtong 1981 nga gindaug liwat sini sadtong 1982 kag 1983, kag ang 1983 Palarong Pambansa

* Maria Sumagaysay – national record breaker sa girl’s running high jump sa taas nga apat ka tapak kag walo ka pugada (4 feet and 8 inches) sadtong 1948  

* Thelma Tirol – national record breaker sa 100-meter backstroke swimming sang 1950

* Dan Salvador – champion sang Pacific Coast sa backstroke samtang naga-eskwela sa kolehiyo sa Estados Unidos; naglangoy halin sa Cavite tubtub Parañaque (19 kilometro); kag coach sa swimming sang San Beda College. ([email protected]/PN)

LEAVE A REPLY

Please enter your comment!
Please enter your name here