Isyu sa Committee on Moral Recovery

SA NAHIBAL-AN ta tubtub sa sining ulihi, bakante pa ang chairmanship sang Committee on Moral Recovery nga isa sang 28 ka komite sang subong nga Sangguniang Panlungsod sang Siyudad sang Iloilo.

Ngaa ayhan? Sin-o bala ang angayan nga magpamuno sa sining komite?

Sang gintudlo ini sa kay Councilor Eduardo Peñaredondo namiriphi siya. Nagsiling siya nga wala man siya nagapamalibad sang obligasyon apang daw indi niya kuno maintiendihan kon ano gid ang katungdanan sining komite.

Kon ang trabaho sini angot sa ginahimo na sang Task Force on Moral Values, daw wala naman kuno siya mahimo nga kasuguan dira kay halos tanan sini gakinahanglan na gid lang nga ipatuman.

Ang Task Force on Moral Values ang nagapatuman sang mga kasuguan sa mga establisimiento kalingawan (lakip na ang mga ilimnan); nagapanglagas man sang mga layaw nga mga babaye agud seguruhon nga may pink cards ang mga ini agud indi makadala sang STD (masakit sang mga lalake halin sa babaye nga nagabaligya sing kalingawan); kag iban pa.

“Daw wala naman ako dira mahimo,” siling gani ni konsehal.

***

Kon padalman naton kon ano gid ang obligasyon sang Committee on Moral Recovery para sa isa ka legislator, ukon tagdihon sang kasuguan, katulad sang isa a myembro sang SP, malawak ining obligasyon sang komite.

Halos tanan nga 28 ka komite may bahin dira kay ang tanan nga komite may isyu sang “moral recovery” – ang pagpaluntad sang maayo nga pang-gobyerno kag sang obligasyon man sang mga pumuluyo para sa kaayuhan sang sosyedad.

In other words, ang mga salawayon nga pamatasan (public morals) isa lang sang ginapatungdan sining komite, nga pwede matugyan sa isa ka ministro sang Diyos kon may yara sini sa konseho.

Ugaling lang kay halos tanan nga aspeto sang “moral recovery” nga yara sa iban nga komite na-specify na sa mga komite sa good government, public accountability, peace and order, social welfare, women and family, kag iban pa. Kag ang nabilin amo lang ang angot sa salawayon nga pagbinatasan.

Amo gani nga sang konsehal pa si Vice Mayor Jeffrey Ganzon, ang ini nga komitiba ginhatag sa iya bilang isa ka pastor sang iya simbahan.

Ginpasar sadto ni vice mayor ang ordinansa nga nagadumili sa mga kargador kag iban nga trabador sa merkado ang pag-uba sang panapton halin sa hawak pa-ibabaw tungod malaw-ay ini nga pamatasan sa publiko.

Sa pila ka okasyon makita ang mga bulbol (pubic hair) sang iban nga lalake nga nagalabaw sa ila brief sa pagkaluslos sang ila mga delargo nga malaw-ay sa panan-aw sang aton mga kadalagahan sa merkado. Makahaldlok man sa iban nga kadalagahan ang makita ang sobra ka dabong nga buhok sa dughan sang pila ka mga lalake.

Ang iban nalaw-ayan makita ang madamo nga pika (tattoo) sang mga lalake sa ila lawas. Sa mga may edad-edad gawa, ang pika gapadumdum sa ila sang mga kriminal nga masami nagapa-tattoo sa sulod sang prisuhan, nga dapat nila likawan.

Luas sa ining ordinansa, happy na lang gani si vice mayor agud magpasar sang mga ordinansa nga ang pagdihon gina-refer niya na gid lang sa pagpamuno sang iban nga konsehal.

Lakip sa sining iya ordinansa nga naga-prohibir sang pag-uba sang pang-ibabaw nga panapton amo ang masunod:

* Ordinance No. 2008-432, nga nagtukod sang City Council on the Welfare of Disabled Persons (CCWDP) and the Office of Persons with Disability Affairs (OPDA). Gin-amendar ini sang Ord. No. 2009-036 nga siya man ang principal sponsor;

* Ord. No. 2017-145, nga nagapatuman sa mga “malls, supermarkets, hospitals, hotels, universities and transport terminals” sang parking facilities, mag-install sang security system kag magpatuman sang security measures sa ila  parking garages;

* Ord. No. 2017-148 nga nagapatuman sang penalidad sa mga contractor sa ila pagpatumbaya nga mapatuman ang road-work safety rules sa ila mga site;

* Subong man ang Ord. No. 207-003, “An Ordinance Prohibiting the carrying of backpacks, glass bottled and canned drinks during festivals and big events in Iloilo City”, kag iban pa.

Seguro, kon amo gid man ang panan-aw naton sa Committee on Moral Recovery – nga tagbantay lang sang ikaayong pamatasan sa sosyedad – mas maayo nga ang tsirman isa ka talahaon nga iloy sa mga myembro sang konseho./PN

LEAVE A REPLY

Please enter your comment!
Please enter your name here