ANG administrasyon ni Presidente Duterte nagdaug sa isyu kontra droga, korapsyon kag kriminalidad nga wala masabat sang nagliligad nga mga administrasyon sa “satisfaction” sang mga pumuluyo.
Sa karon nga pagbutyog sang presyo sang mga balaklon, basi diri man mapierde ang administrasyon ni Duterte sa palaabuton nga mid-term eleksyon, labi na gid ang sa bahin sang mga kandidato sa pagka-senador.
Ina tungod ang gutom kag kapigaduhon daku nga isyu para sa mga imol, nga mayoriya sini ang mga botante.
Pati ang galunggong, ang “poorman’s fish”,nga sadto gabili lanng P140 ang kada kilo nagabili na sang P200 kada kilo. Ang bugas nagtaas pa gani ang bili sini nga kon mag-ariya gid man sa tig-alani dira lang ini sa iya daan nga mahal nga presyo.
Madamo man nga imported rice ang NFA nga gina-istaran na sang mga sapat-sapat nga kinahanglan ma-fumigate. Ti, bal-an ta man nga kon ma-fumigate ini may baho na ini nga indi mauyunan sang madamo, kag basi madunot lang sa bodega kag ihaboy nga indi mapuslan.
Diri gani sa siyudad sang Iloilo ang pletehan nagtaas na sing duha ka pesos, ukon mga P100 dugang nga plete ini sa isa ka bulan sang mga estudyante. Ang regular nga softdrink nga sadto P13 sa retail, P15 pesos na. Ang masami ko nga baklon nga probiotics sadto P35 lang, karon P45 na. Ang bugas nga masami ko baklon nagtaas na sing P3 kada kilo.
Ambot kon ano lang ang wala magsaka. Siling sang pirme gapamalakon sa merkado “wala na sing nagbarato”.
Sang sini lang ang Bangko Sentral nga Pilipinas (BSP) nagsiling nga ang “inflation”, ukon ang pagsaka sang presyo sang mga balaklon naglab-ut na sa 5.7 ka porsyento, samtang ang bagay lang sina amo ang 2-4 ka porsyento.
Posible kuno ining 5.7 porsyento sang “inflation” magapadayon sing pagsaka tungod sa pagpasaka sang buhis sa petrolyo kag iban nga “essential” nga kinahanglanon sang mga pumuluyo sa idalom sang TRAIN Law.
Of course madamo man nga isyu ang puede ihaboy sa administrasyon sa palaabuton nga eleksyon sa Mayo 2019 nga ang amat-amat na ginaduso sang taga-oposisyon.
Indi lang ang padayon nga “inflation”, kundi pati man ang nagalain nga relasyon sang Pilipinas kag Amerika, ang isyu sa Western Philippine Sea sa Tsina, ang isyu kontra sa extrajudicial killing, kag madamo pa.
Tungod sini, ginatan-aw naton ang masadya gid nga kampanyahanay para sa Mayo 2019 nga eleksyon. (w_mateojr@yahoo.com/PN)
