Kampante

Kinaandan na ang sitwasyon. Nagapati nga wala sang may matabu nga malain. Natural lang ang dapya sang hangin kag hampak sang balud.

Nangin indi na sensitibo sa patimaan sang panahon ang mga nagapadalagan sang sakayan sa sitwasyon sang kalalawran. Ginakabig nila nga ila masweto ang kahimtangan sang panahon, nga masarangan nila nga atubangon ang dapya sang hangin kag hampak sang balud.

Ginasugo sila sang pagkinahanglan pinansyal nga dapat makalarga agud nga makakwarta. Ginasugo sila sang mga pasahero nga luyag gilayon nga makatabok nga wala nagalantaw sa peligro nga ituga sang ila pagpasimpalad sa kalalawran. Nagapati ang tanan nga malip-ot ang 15 minutos nga pagbiyahe kag makita man ang padulungan kag makaabot nga wala sang huol ukon sablag.

Napaslawan ang tanan sang naglahog ang kapalaran. Masakit nga lahog dala sang mapintas nga pugada.

Indi na mabalik ang kabuhi sang mga gindemalas. Madamo sang sugilanon ang wala napahayag. Madamo sang mga tinaga ang wala nabungat. Lunsay handurawan na lang ang nabilin. Ginlamon sang dagat ang mga handom kag damgo sang mga nagtaliwan. Kasakit, kahadlok kag katagam ang ginbilin sa mga nakasalbar.

Tion na nga balikan kag imprubahon ang sahi sang transportasyon. Basi nalipat ang Philippine Coast Guard sa protocol nga dapat ipatuman. Ginapangabay man ang PCG nga kon kaangay sini nga panahon kuntani indi sila magpanimuron kag magpokus sa kape nga mainit, kuntani uyatan nila ang ila largabista kag lantawon ang hulag sang mga sakayan nga nagabiyahe sa kalalawran. Sa sini, mas una sila nga makakita kag una nga makarespondi nga wala na nagahulat pa sa tawag ukon singgitan nga nagapangayo sang tabang.

Dapat nga imprubahon ang transportasyon agud nga sa tagsa ka panahon sang habagat wala sang kabuhi nga mautas. Batunon naton ang kamatuoran nga ang karon nga sahi sang sakayan indi na makasarang sa pwersa sang hangin kag balud. Tuhay na ang sitwasyon karon kaysa sa mga naglipas nga panahon. Mas makusog na ang habagat, mas peligroso bisan wala sang bagyo, bangud ini na ang ginasiling sang mga eksperto nga ‘the new normal’.

Tion na nga hatagan sang katumanan ang pagpatindog sang taytay sa tunga sang Iloilo kag Guimaras. Sa tagsa ka tion nga malain ang panahon, nagakunol ang pag-uswag sang Guimaras, wala nagahulag, lunsay nagahulat sa paglipas sang panahon. Indi makatigayon sang transaksyon kag gutom ang lauman kon wala naga-ugyon ang panahon.

Buksan ang panimuot kag hakson sang mga mananagat ang pagbag-o. Magpauyon sa lakat sang pangabuhi ilabi na kon may taytay na nga nagaangot.

Samtang nagapahigot ang Guimaras sa biyahe sang sakayan, wala sang pagtin-ad nga lauman, magapabilin nga wigit ang palangabuhian, kag maiwat ang kauswagan.

Dapat nga iduso ang pagtukod sang taytay para sa benepisyo sang tanan, agud nga wala sang sagang sa pag-agom sang kauswagan, wala sang panahon nga makapauntat sa paghimakas, kag magatayuyon ang ginalauman nga pag-uswag.

Liwat kita nga nagmurarat sa kamatuoran bangud sa masubo nga hitabu nga aton nakit-an. Pila pa ka kabuhi ang mautas antes kita maghimo sang tikang nga makahas agud nga maamligan ang kabuhi sang kadamuan?

Untatan ang binasulay bangud ang may salabton sa madamo nga nadisgrasya amo ang aton pagka-kampante. (bertladera@gmail.com/PN)