Kaya ayhan ihingadlan ni Duterte mga ‘loyalist’ niya nga artista sa drug list?

SINING ulihi lang ginhingadlan ni Presidente Duterte ang 46 sang mga 80 pa sa iya listahan sang mga pulitiko nga sa suspetso niya may kaangtanan sa ilegal nga droga.

Madamo ang nag-protesta sini, labi na gid sa bahin sang oposisyon kay natoon ini sa panahon na sang kampanya para sa eleksyon sa Mayo 13.

Ina tungod igu gid sila sang Presidente sa iya pagpabugal nga ang iya mga kandidato sa Mayo 13 wala tanan sing kaangtanan sa ilegal nga droga, nga ang buot man silingon sini amo nga ang mga kandidato sa iya druglist iya sang oposisyon. Posible ugaling nga ginpatu-patuan lang sila.

Ang oposisyon ginapangunahan sang mga kandidato para senador sang Otso Deretso nga sanday Roxas, Alejano, Bam Aquino, Makalintal, Hilbay, Diokno, Tañada, kag Gutoc.

Wala na kita mahimo sini tungod privelegio sang Presidente nga mang-akusar bisan wala sing mapag-on nga ebidensya tungod sang iya “immunity from suit”.

Tungod sini, sa lugar nga kinamatarong sang akusado agud kilalahon nga inosente siya kag dapat pamatud-an gid ang akusasyon sa iya sa korte, siya pa ang nagapamatuod nga indi siya “guilty” tungod yara siya sa druglist. In fact, madamo na sa ila ang nagpanginwala sa sining akusasyon sang Presidente.

Ang ining 46 sa druglist ni Presidente galakip sang 35 ka mayor, pito ka vice mayor, isa ka provincial board member, kag tatlo ka kongresista.

Ang siste kay ang duha ka alyado sang Presidente mismo – si Senador Tito Sotto kag isa niya ka kandidato para senador – ga-insistir nga hingadlan man ang mga artista nga yara sa druglist sang PDEA.

Mga 31 ini sila, sunu kay PDEA Director-General Aaron Aquino. Galakip ini sang 11 ka mga artista.

Tungod may 35 gid ka celebrities ang nagpakilala nga sila mga”loyalist” ni Presidente, indi ayhan lakip ang iban sa ila sa sining druglist sang PDEA, nga daan daw mga langu ang iban sa ila kon mag-asta?

Kon kalakip sila, kaya ayhan ni Presidente nga ihingadlan man ini sila? Aber, tingnan natin sa kurbada.

***

TO BE fair kay Vice Mayor Jeffrey Ganzon, wala kita makabalibad nga sabton niya ang pila ka isyu kontra sa iya sang masugata ta siya sa city hall sang sini lang.

Ginpanginwala niya ang akusasyon nga wala siya sing nabulig sa pagtukod sang Iloilo City Community College.

Sa matuod, siling niya, siya mismo ang author sang orihinal nga hagna (proposed ordinance).

Ugaling lang, paathag niya, sadtong ginpasa niya ang hagna yara siya sa minoriya nga grupo sa Sangguniang Panlungsod. Tungod sini, naaprubahan ang ordinansa sa pagpanikasug na sang grupo sa mayoriya.

Bisan pa amo ina ang natabo, gapasalamat gihapon si Vice Mayor Ganzon nga nangin kasuguan gid ang ining ordinansa bisan pa indi na siya ang nanguna sa pagpasar sini, kay makabulig ini  sa mga “timawa” nga palangga gid ni anay Senador Roding Ganzon nga iya amay.

Ang pamatuod nga siya ang nanguna sa pagpasa sang hagna amo ang pagpasalamat sa sulat (Mayo 19, 2011) sa iya nanday Mayor Victor James B. Yap, Sr. sang banwa sang Glan sa probinsya sang Saranggani, kag ni sadto Congressman, karon Senador, Emmanuel D. Pacquiao.

***

Ginpanginwala man ni Vice Mayor Ganzon nga wala siya sing may napasar nga mga ordinansa para sa kaayuhan sang mga pumuluyo sa siyudad.

Sunu sa iya, siya ang principal sponsor sang Ord. No. 2008-432, nga nagtukod sang City Council on the Welfare of Disabled Persons (CCWDP) and the Office of Persons with Disability Affairs (OPDA). Gin-amendar ini (Ord. No. 2009-036) nga siya man ang principal sponsor.

Principal sponsor man siya sang Ord. No. 2017-145, nga nagapatuman sa mga “malls, supermarkets, hospitals, hotels universities and transport terminals” sang parking facilities, mag-install sang security system kag magpatuman sang security measures sa ila  parking garages.

Principal author man siya sang ordinansa (Ord. No. 2017-148) nga nagapatuman sang penalidad sa mga contractor sa ila pagpatumbaya nga mapatuman ang road-work safety rules sa ila mga site.

Subong man ang Ord. No. 207-003, “An Ordinance Prohibiting the carrying of backpacks, glass bottled and canned drinks during festivals and big events in Iloilo City”, kag iban pa. (w_mateojr@yahoo.com/PN)

LEAVE A REPLY

Please enter your comment!
Please enter your name here