SA pagpahayag mismo ni anay Senador Ferdinand Marcos Jr. sa isa ka interbyu kay Boy Abunda, gin-ako sini nga ang “corruption”, katulad sang pagpangawat sa gobyerno, isa ka “human condition”.
Sa sining ginpahayag ni Marcos Jr., gina-admitir niya nga natabo gid man ang “corruption” sa panahon sang martial law regime sang iya amay.
Kag tungod sa panahon nga ini todo poderoso ang iya amay, indi ayhan sobra-sobra gid ang “corruption” sang gobyerno sadto?
In fact, napamatud-an ini sang Presidential Commission on Good Government (PCGG) kag sang Bureau of Internal Revenue (BIR), nga gin-confirm man sang Korte Suprema.
Sunu sa sining ila findings, ang natipon sang mag-asawa nga Marcos naglab-ut sa $658 ka milyon.
Samtang, sunu sa ruling ni Supreme Court Justice Renato Corona sadtong Hulyo 15, 2003, mga $304,372.43 lang ang lawful income sang mag-asawa Marcos halin sang 1965 tubtub 1985.
In other words, ill-gotten wealth ang sobra diri nga mga $354-M ukon mga P18-B (P52 kada dolyar). Na-forfeit na ini sang gobyerno.
Sulukton pa diri ang real estate (inheritance) tax sa propyedad ni Diktador Marcos Sr. sa pagtaliwan niya sadtong Setyembre 29, 1989. Sandig sa ulihi nga demand letter sang BIR sadtong Disyembre 2, 2022, nagalab-ut na ini sa P203.819 ka bilyon.
Hambalon pa, si Marcos Jr. kag iya mga utod nga sanday Imee kag Irene natural lang nga nag-enjoy gid sing todo sa ining bunga sang “corruption” sang ila mga ginikanan, regardless kon nahibal-an man nila ini ukon wala.
Kag kon nahibal-an na nila ini sang pag-imbestigar na sang PCGG kag BIR, dapat lang ginpangayuan ini sing patawad sa mga pumuluyo sang ila mga ginikanan Ferdinand (nga napatay sadtong 1989) kag Imelda. Kag sila man nga mga kabataan tungod nakaambit man sila sa pag-gasto sining ill-gotten wealth.
Dapat tani mahuya ini sila kag hinulsulan na lang ang ila kasal-anan kag maghimuyong na lang katulad ni Board Member Teves nga nag-resign bilang board member sa ila probinsya. Gin-aku ni BM Teves nga ginsakit niya ang isa ka sekyu sang ipilit sini ipatuman ang iya obligasyon sa mga nagasulod sa subdivision nga iya ginabantayan.
Apang wala gid! Kag luyag pa nila ihinago ini paagi sa malimbungon nila nga propaganda sa mga wala hinalung-ong nga mga pumuluyo, labi na gid ang mga ulihing tubo nga wala matabue sang Marcos martial law.
Notwithstanding sini, ginatulod pa gid sang ila propaganda nga “Least Corrupt” si Marcos Jr. sa tanan nga kandidato bisan wala sila sing matudlo nga corruption sa iya mga kasumpong.
Labi na gid kay VP Leni Robredo nga may distinction nga “free of corruption” ang iya upisina, may napakita madamo nga hinimuan kag ikasarang, nagapakita sing matuod-tuod nga pagkabalaka sa mga kubos, kag maka-Diyos.
Ti, ano man ya ang indi pagbayad ni Marcos Jr. sing buhis sadtong 1982-1985 samtang bise gobernador kag gobernador sang Ilocos Norte? Indi bala tax evasion ato?
Kag indi man bala “moral corruption” ang butigan mo ang mga pumuluyo sa imo Marcos official website nga ikaw ang “author”sang isa ka importante nga kasuguan?
Ining kasuguan amo ang RA 9522, ukon ang Philippine Archipelagic Baseline Law, nga na-enact sadtong Marso 10, 2009 sa panahon ni Presidente Arroyo.
Consolidation ini sang House Bill 3216 nga gin-file ni Congressman Antonio Cuenco kag Senate Bill 2699 nga gin-file nanday Senador Antonio Trillanes IV, Aquilino Pimentel Jr., Edgardo Angara, Rodolfo Biazon, Juan Ponce Enrile kag Miriam Defensor-Santiago.
Ginbalita ini nga kamatuoran ni Kristine Joy Patag sang PhiilStar.com sadtong Enero 18, 2022.
Wala man gani naga-attend si Marcos Jr. sa mga public debate sang mga presidential candidates, lakip na sang Comelec, tungod indi siya luyag maukayan ang iya baho sa question-and-answer sa ini nga mga public debate.
Ti, amo ina ang “Least Corrupt”? Nagalikaw mahibal-an ang iya “corruption” kag mga kapalpakan?
Panugyan ta nga sigehon ta lang ang aton paghibalo kay sa padayon nga kampanyahanay mahibal-an gid sang tanan kon ano gid ang pagkatawo ni Marcos Jr.
Kag mahibal-an man naton kon sin-o gid ang matarong kag masaligan. Indi kay ang kasosyo sang “corruption” kag pang-abuso sang Marcos martial law. Indi ang tax evader. Indi ang butigon. Kag indi ang halos wala kaugalingon nga proyekto kag programa para sa kaayuhan sang mga pumuluyo./PN
