SALAMAT sa Diyos nga wala nagdangat sa “wara data”, sunu pa sa kinaray-a ni anhing lola, ang protest rallies sang Nobyembre 30.
Now, pwede na kita liwat mag-seryoso sa imbestigasyon angot sa anomaliya sa pagtukod sang multi-Bilyon nga flood projects.
Sa ulihi nga balita nga nabaton naton may 16 na nga nahulogan sang warrant of arrest agud mapasakaan na sang kaso sa Ombudsman kag Sandiganbayan. Kag gasalig ang mga pumuluyo nga mapadali man nga mapaatubang ining mga akusado sa husgado, samtang sige man ang pagdiskubre sa kon sin-o pa ang dapat manabat.
***
Madugay man kag nakatugda diri sa aton kolum ang aton abyan nga si Pedro.
Siling niya nabuwisitan na gid siya sa isa ka kongresista nga gapahero-hero nga wala man sing maayo nga nahimuan sa Kamara. Akusar kag akusar lang siya kuno sang kon ano ukon sin-o ang paukpan sang naiskandalo nga kapalpakan sang linibo nga flood control projects, samtang wala naman sing piho nga matudlo luwas sa tinikal.
Wala man lang siya sing nakadtuan kag nakita sang bisan isa lang sining mga proyekto agud mapamatud-an ini bisan sa iya lang kaugalingon. Wala man lang siya nagtomar interes nga magpakigkita sa isa man lang ka eyewitness agud makasugid sini sa iya sang kon ano.
Pero kon mag-akusar siya, dugang ni Pedro, daw nakapangusisa gid siya sa natabo sa bisan isa lang sining mga flood project.
Daug pa niya si Senador Ping Lacson nga nakakadto gid sa pila ka proyekto sa Bulacan kag Oriental Mindoro kag nangutana dira kon sin-o ang may responsibilidad kag mabasulan sang kamalamalahan.
Tinamad kag pinalagpat ina ya ang imo congressman, tugda pa gani ni Pedro.
Ginapakamalaut pa gani siya sang iya pamilya, siling ni Pedro, nga amo tani ang una magdepensa sa iya kag magkilala sang iya maayo nga hinimuan kon may ara gid man. Ginsikway man siya sang iya partido kay gindalahig pa niya sila sa kalainan sang iya tinikal sa Kamara nga tani makaunong pa sa iya bisan paano.
***
Well, siling ko kay Pedro, pabay-i lang da siya sa iya tinikal. In fact, indi man gani kinahanglan pa akusaran siya sang Sedition ukon Inciting to Rebellion. Kon may madala siya nga mga pumuluyo, amo gid lang ang diutay nga grupo nga nagpasaway sa Forbes Park kon diin ginpakamalaut niya ang mga maggaranon dira, lakip na si Manny Pacquiao nga aton pambansang kamao nga kilala sa iya kaalwan sa mga kubos. Hala ka Manny, korap ka man gali, sunu sa sining bulyaw nga ini!
***
Agud madugangan ang ihibalo ni Pedro parti sa flood projects, i-share ko na lang diri sa iya kag sa iban nga luyag man makahibalo sing dugang parti sining problema naton sa flood control projects nga nahibal-an naton.
Una nga gin-expose ni PBBM sa iya 2025 SONA sadtong Hulyo 28 ining flood control project anomaly, nga ginsalo man sang media kag gin-updan pa nila sing dugang nga mga detalye sa ila mga investigative report.
Sunu sa expose ni PBBM, may 15 gid dira ka mga flood control projects nga daku ang nahul-ab, mga 20% gid, sang mga 10,000 ka proyekto nga gintukod sugod sadtong pagpungko niya sang 2022.
Mga 5,500 dira ang allegedly “completed” , samtang madamo gali sini mga “ghost projects”.
Obviously, indi masarangan sang Presidente ang tanan nga resposibilidad sa iya pagdumala sa pungsod.
Sa aton Demokrasya, may ginasiling nga delegation of power nga paagi sini matugyan niya ang pila ka responsibilidad sa iya mga salaligan. Ang problema kay igu murahon indi man masaligan ang madamo dira kag korap man.
Balor PhP545.64 ka Bilyon ining tanan nga mga proyekto nga gintukod sadtong Hulyo 2022 tubtub Mayo 2025 nga na-award sa mga sumunod nga 15 ka contractors: Legacy Construction Corporation, Alpha and Omega Gen. Contractor and Development Corp; St. Timothy Construction Corp;
QM Builders; EGB Construction Corporation; Topnotch Catalyst Builders Inc.; Centerways Construction and Development Inc.; Sunwest, Inc.; Hi-Tone Construction and Development Corp.;
Triple 8 Construction and Supply, Inc.; Royal Crown Monarch Construction and Supplies Corp.; Wawao Builders; MG Samidan Construction; L.R. Tiqui Builders Inc.; kag Road Edge Trading and Development Services.
Samtang, 10 ka probinsya ang nakaagom sang mas madamo nga flood control projects halin Hulyo 2022 tubtub Mayo 2025. Ini sila amo ang masunod:
Bulacan, may 668 ka proyekto; Cebu (414); Isabela (341); Pangasinan (313); Pampanga (292); Albay (273); Leyte (262); Tarlac (258); Camarines Sur (252); kag Ilocos Norte (224). Ini tanan galab-ot sa 3,297 ka proyekto.
Nanotaran ugaling sang Presidente nga madamo sa sining mga flood control projects ang nahamtang sa mga probinsya nga indi man flood-prone.
Samtang ang pila ka probinsya nga “most flood-prone” wala nakabaton sang kadamuon nga mga proyekto nga bagay sa kinahanglanon nila.
Galakip ini sila, sunu sa Presidente, sang: Nueva Ecija, Metro Manila, Maguindanao, North Cotabato, kag Oriental Mindoro. Nga, expectedly, mas nag-antos gid sa pagbinaha nga dala sang nagligad nga mga bagyo!
Ngaa ayhan? Sa aton nahibal-an nga abilidad sang mga pulitiko, fuera los buenos, posible tungod sang mas daku nga kitaon dira ukon agud mapalipay ang ila ale-ale nga mga supporter para sa ila personal nga benepisyo!/PN
