SO FAR, samtang ginasulat naton ining kolum, pila pa lang ka bilog ang naka-file sang ila kandidatura sa palaabuton nga eleksyon sa Mayo 2022.
Pero nangin makawiwili na sa publiko ang mga panindugan sang pila sa ila.
Nauna gid file diri sa Iloilo City ang aton abyan nga si Mel Carreon sa iya luyag nga magdalagan sa pagka-konsehal sang siyudad.
Hambalon mo na ang luyag mo hambalon kay Mel, pero bilib gihapon ang madamo sa iya padayon nga pagdalagan sa sulod sang sobra na sa 10 ka eleksyon bisan pirme lang pierde.
As always, ginapahayag niya nga siya “wala partido kag wala partida”. Wala man siya kuno kwarta agud igasto sa kampanya. Matuod man kay ikaw pa gani ang maagda sa iya sing pamahaw sa inyo pagkit-anay.
Wala siya mag-athag sang iya programa del gobierno. Basi ugaling ang pag-insure (insurance salesman siya) sang tanan batok sa gutom kag kon mawad-an trabaho. Indi bala, Mel?
Nagdalagan siya sa pagka-konsehal kag pagka-meyor. Diutayan pa gani magdalagan sa pagka-presidente. Napunggan lang siya ugaling sang isa ka abyan nga nagsiling nga imposible ini para sa iya kay wala siya inuggasto sa paglagaw sa bug-os nga pungsod agud mag-kampanya.
Nonetheless, ginapabugal gid niya nga siya ang naga-hold sang record sang pinakalawig nga pagpang-kampanya sa kasaysayan sang kalibutan bisan wala ini gina-recognize sang Believe it or Not.
Man, pagkatapos pa lang sang isa ka eleksyon, yara na siya nga nagabulad sang iya kandidatura nga nakasulat sa nawong sang iya portpolyo samtang nagalagaw.
“Hala bira!” Toto Mel a!
By the way, sadtong isa ka eleksyon para konsehal sang siyudad, nagkuha man si Mel sang sobra 3,000 ka boto. Natabo ato sang may nagpusta nga indi siya makakuha sing sobra 3,000 nga boto.
Pero nagboto ang iban indi man lang tungod sa pusta. Madamo man sing abyan si Mel nga nagapati nga mas masadya ang konseho kon yara siya.
***
Tumalagsa man ang plano sang isa nga nag-file sa pagka-presidente. Himuon niya kuno performe ang ihi sang mga lalake kag organic fertilizer ang ihi sang mga babaye.
Ugaling basi sa lugar nga performe kag organic fertilizer ang mahatag sini sa mga pumuluyo, ang kapangsot lang ang maghari sa palibut.
May isa man ka kandidato sa pagka-senador nga nag-propose butangan sing mataas nga pader ang kilid sang mga suba agud malikawan ang pag-awas sini sa mga nagapuyo dira nga mga imol kon malain ang panahon.
Daw pader ini seguro ni Trump sa tunga sang USA kag Mexico agud ma-kontrol ang illegal entry sa USA.
Indi ta man seguro kinahanglan ini kay wala man kita sing problema sa dulunan sa iban nga pungsod. Arkepelago man kita. Kag diin ta abe maagi kon mamunit ukon maligo sa suba?
Ang nakita nga solusyon dira sang isa man ka tarso amo ang pagpatindug sang madamo nga mga suba agud magsalo sang tubig halin sa madamol nga ulan kag kabukiran pakadto sa dagat. Mas maayo kuno ini kay mangin City of Rivers kita, nga daan City of Bridges na gani kita nga naluyagan sang mga turista.
***
Samtang, naga-dramatics man ang iban nga mga kandidato.
Sa Dumangas nag-file pagka-meyor si 4th D Congressman Biron kag pagka-Bise Meyor na lang ang first-timer nga Mayor Golez. Meyor ka na Onal, ma-Bise Meyor ka na lang? Oh no!
Si Senador Bong Go, nga ginaduso sang PDP-Laban Cusi-wing sa pagka-presidente nag-file lang sa pagka-Vice President. Ngaa, padalaganon gid si Sara Duterte nga anak ni Presidente sa pagka-Presidente, haw?
Nagpahayag man si Presidente Duterte nga kapoy na siya sa pulitika kag maga-retire na lang. Ayhan? Indi ayhan tungod may duha ka survey (SWS kag Veritas) ang naga-reject sang iya plano nga madalagan sa pagka-VP?
***
Samtang, wala pa man kaseguruhan ang pagdalagan sang mga nag-file sang ila kandidatura kay pwede pa sila magbaylo kandidatura tubtub sa deadline sa Oktubre 8. May substitution pa man gani tubtub sa Nobyembre.
By the way, kon sa manubo nga lugar ang kandidato mo sa sining una nga mga survey, may tion pa man nga makabawi.
Nag-abanse 9-1 ang kontra ni US President Truman sadto. Apang nakabawi ini sa sige nga survey kag dugang pa nga mga isyu sa kontra tubtub nagdaug pa sang eleksyon na./PN
