MAY BASEHAN bala ang election protest ni Biron?

HUNYO 12 subong. Nagapadumdum ini sa aton sang Philippine Independence Day sa sini nga adlaw.

Pero, matuod gid bala nga independiente ang aton pungsod – nga makahimo ini sang mga desisyon nga hilway kag indi kinahanglan diktahan, kag, kon bukas man kita sa ideya sang iban, kita gihapon ang masunod kay wala sang kadena nga nagagahum?

Tagsa-tagsa na gid lang kita seguro ang magsabat sining aton pamangkot. Ako ya wala nagapati nga independiente na ang aton pungsod.

Ngaa man? Man sige gihapon ang pagpahigot naton sa pagpamentaha sang iban nga pungsod, pagpa-ekslabo sang aton mga kauturan nga OFW sa mga mapiguson nila nga mga amo, kag bisan mismo sang pigos naton nga kahimtangan diri sa pungsod sa diin laptahon pa ang gutom, kapigaduhon kag kahadlok sa nagakalain-lain nga mga krimen sa palibot.

Nonetheless, wala kita nagakawad-an sing paglaum sa isa ka hilway kag mapagros nga ekonomiya diri sa pungsod para sa tanan.

Mabuhay ang Pilipinas sa iya padayon nga pagpanikasug sa pagpa-uswag sang mga tauhanon kag Diyosnon nga kinamatarong sang mga pumuluyo!

***

LUAS sa 99,899 ka boto nga wala kuno maisip (unaccounted for) ukon “missing”, gintudlo man ni Congressman Ferjenel Biron sa iya election protest ang pre-election survey sang Ranom Access Consultants Inc.

Sa ining survey, sunu sa ginpagwa nila sa tri-media, nag-abanse si Biron kay Congressman Arthur “Toto” Defensor Jr.

Tungod sini, kag iban pa nga rason, nangayo si Biron sa Comelec sing “manual recount” sang mga boto. Ambot lang kon entertenaron ini sang Comelec kay sa pagpati sang madamo daw drama lang ini sang kapaslawan nga wala sing basehan.

Abanse si Defensor sa mga nahauna nga survey sang Ramon Acess Consultants Inc. Sang ulihi na lang si Biron nag-abanse sa survey sang ini man nga survey firm. Apang indi ayhan ginpili lang ang mga respondent agud paboran si Biron?

Si Toto Defensor nagdaug batok kay Biron sing mga 87,678 ka boto sa ila pagpadalagan para Gobernador sang Iloilo sadtong Mayo 13 nga eleksyon. Nag-angkon siya sing 479,081 ka boto, samtang si Biron may ara lang 391,403 ka boto.

Sa lakat sang botohay sang nagligad nga eleksyon nga bisan sa pila ka lugar nga teritoryo niya napierde pa si Biron, malayo na ang bisan ang pinakamatayog nga speculation nga malagas pa ni Biron ining 87,678 nga abanse ni Toto Defensor halin sa kuno “unaccounted for” kag “missing” nga mga boto.

Pero paano natabo ang subong kadamo nga boto nga kuno wala maisip? Basi tungod wala mabasa sang election machine? Kon may ara gid man, sa aton pagpati, indi man seguro amo na kadamo. In fact, wala ako nakabati nga may nagsiling nga may boto nga “missing” sa kopya sang mga botante.

Kag paano na-“missing” ang pila ka balota? Wala man sing nabalita nga inagaway sing balota box.

Gin-akusar man ni Biron ang pihak nga kampo sing vote-buying. Pero daw sa kampo man gani ni Biron ang na-akusaran sing vote-buying mismo sa tion pa lang sang kampanya. Gapanghatag kuno sang binalde nga groceries sa mga pumuluyo. Kon indi ina vote-buying, ti ano ato? Wala man sunog ukon bagyo nga kinahanglan buligan ang mga pumuluyo.

***

Ang gintudlo ni Biron nga resulta sang survey pila ka semana bag-o mag-eleksyon, sa diin nag-abanse siya, indi ina ya resulta sang aktwal nga botohay. Survey lang ina ya.

Kon tuod man ining survey, laban-laban nabaliswa na ini sang pagpati sang iban sa padayon nga kampanyahanay kag sa padayon man nga “information cascade” sang pagsaylo-saylo sang suporta.

Ang daku seguro nga rason kon ngaa madamo ang nagbaliskad sing boto amo ang credibilidad sang pila ka block timers ni Biron.

Ang isa ka block timer ni Biron, sunu sa block timers ni Toto Defensor, indi mapatihan tungod ang iya ginabungat sa waragwagan pagbali mismo sang iya pinamulong sa nagligad nga naka-tape pa.

Kon san-o gintirada niya sadto si Biron, gindayaw na niya si Biron sa sining eleksyon. Ti, paano mo abe siya mapatihan sa iya isyu nga ginadala?

Para sa akon, isa ato ka rason kon ngaa madamo nga mga supporter ni Biron ang nagliso sang ila balatyagon pakadto kay Toto Defensor./PN

LEAVE A REPLY

Please enter your comment!
Please enter your name here