Moderno nga jeep

MAGATARIS na gid man sa dalan. Magasalidad na gid man sa panulukan. Maeksperyensyahan na gid man sang kadamuan.

Matestingan na sang mga pasahero ang kinaiya sang ginapabugal nga moderno nga jeep sa subong nga adlaw, matapos ini ang anum ka bulan nga atrasar.

Ginapabugal sang Iloilo City Alliance of Operators and Drivers Transport Cooperative ukon ICAODTC nga maga-operate na gid man ang ila moderno nga mga jeep kag ang minimum nga plete amo ang Php 10.20 para sa una nga apat ka kilometro kag dugang nga Php 1.20 sa tagsa ka masunod nga kilometro.

Umpisa subong nga adlaw, Nobyembre 28, magataris na sa dalan ang una nga pito ka air-conditioned unit nga magaserbe sa ruta gikan sa terminal sa Ungka, Jaro padulong sa City Proper nga magalabay sa atubang sang Central Philippine University ukon kaangay sa ruta sang Jaro CPU Ungka.

Hiwaton ang seremonya sa Ungka Terminal alas 7:00 sang aga nga patimaan sang paglarga sang moderno nga mga jeep nga pagatambungan sang mga tiglawas gikan sa LTFRB, LTO, DBP kag Iloilo City Government.

Lauman ang dugang nga walo ka yunit nga magataris man sa dalan paglipas sang semana ukon mangin 15 na sa pangkabug-usan samtang ang nabilin nga 13 ka yunit ang igasunod pa gid sa masunod pa gid nga semana agud makumpleto ang 28 tanan ka yunit nga gin-aprubahan para sa sini nga ruta.

Nahibaluan nga ang LTFRB nagtugot sa ICAODTC nga magserbe sa tatlo pa ka ruta kag maga-operate sang kabug-usan nga 104 ka mga moderno nga jeep. Ang tatlo kadugang nga ruta ginalakipan sang Villa Baybay, Ungka-ITGSI via Diversion kag Jaro Plaza-Mandurriao apang indi pa masiguro kon san-o magaumpisa ang pagserbe sa sini nga mga ruta.

Makaakomodar sang 25 ka pasahero ang tagsa ka yunit sang moderno nga jeep nga mabugnaw, kombenyente kag mapabugal sang mga Ilonggo.

Kaangay sa anuman nga pagbag-o, may yara sang pagpanginpadlos nga nagakatabu gikan sa mga grupo nga nagasupak, nagakahangawa, kag nagapang-alang-alang sa ginaduso nga mga ideya, pagbag-o ukon pagligwat sa mga kinaandan.

Indi kita malipat sa natabu sadto nga pagpataris sang mga moderno nga salakyan sang isa ka mall sa nasakupan sang banwa sang Oton, nagreklamo man ang mga grupo sang transportasyon sa Pavia kag sa City Proper apang sa ulihi naglinong man ang tanan.

Makita sadto nga malaka ang nagasakay sa ila salakyan apang sa karon halos nangin alternatibo na sang kadamuan, pirme na puno kag makita sa mga larawan sa social media nga may nagatindog na sa tunga kag magutok na sa sulod sang sini nga moderno nga salakyan.

Madamo sang magapangduha-duha apang ang may positibo nga panan-awan para sa masanag nga palaabuton ang nagatulok sa husto nga direksyon, wala nagapatublag sa mga negatibo nga opinyon kag nagapadayon sa pag-usoy padulong sa ginahandom.

Kon makumpleto na ang tanan, lauman naton nga bisan ang pagplete sini ang magagamit na sang tap cards ukon ang ginasiling nga automatic fare collection system kaangay sa octopus card nga ginagamit sa Hong Kong.

Mangin mahapos bangud wala na sang kambyuhan, sang sensilyuhanay sa tunga sang pasahero kag sang nagamaneho. Wala na sang baisay sa kulang nga kambyo ukon sensilyo bangud ang tanan nasandig na sa electronic payment kag ang waki sini ang indi na mabudlay pa nga isipon.

Tion na nga maghakus sa moderno nga transportasyon. Hatagan sang higayon ang tanan nga makaambit sa kasulhay sang teknolohiya, mapasanyog ang pagpangabuhi, kag mapabugal ang pagginawi. (bertladera@gmail.com/PN)

LEAVE A REPLY

Please enter your comment!
Please enter your name here