Nabanhaw ang mga ‘bookies’

NAG-ABOT ang higayon nga ila ginahulat. Kaangay sa bampira nga uhaw sa dugo, nabanhaw ang mga “bookies”. Nagasandig sila sa ginalawag sa radyo nga resulta sang pagbola sa probinsya sang Guimaras.

Nangin sagunson man ang operasyon sang kapulisan sa nasakupan sang ila banwa agud nga dakpon ang ilegal nga pagpataya sang Small Town Lottery ilabi na nga wala pa sang legal nga naga-operate sa probinsya sang Iloilo.

Una na nga nakapanumbalik sa pag-operate ang STL sa Guimaras nga amo karon ang mabatian nga ginalawag sa radyo kag amo man ang ginabasehan sang mga imbolbado sa ilegal nga pasugal.

Nag-abot ang panahon nga ginakahangaw-an. Nagdata ang mga “bookies” sa probinsya sang Iloilo kag patimaan diri ang madamo na nga nadakpan sang kapulisan.

Kadungan sini, nagpaandam si Police Colonel Roland Vilela ang director sang Iloilo Police Provincial Office ukon IPPO sa mga illegal gambling operator nga wala sila sang lugar kag wala sila gina-abi-abi nga maghiwat sang operasyon sa iya lugar nga nasakupan.

Gin-alerto sini ang tanan nga police stations sa probinsya sang Iloilo kag ginmanduan ang mga hepe nga tapnaon ang ilegal nga pasugal sa tagsa nila ka nasakupan ukon mahimo sila nga magpangatubang sang kaso administratibo bangud sa kapabayaan sa ila katungdanan.

Nag-asud-asud ang report nga nagsulod sa IPPO kag sa PRO-6 gikan sa mga municipal police stations sadtong Setyembre 13 matapos makatikma sila sang mga naglapas sa Republic Act 9287 ukon “An Act Increasing the Penalties for Illegal Numbers Games, Amending Certain Provisions of Presidential Decree  (PD) No. 1602, and for Other Purposes.”

May nadakpan sadtong alas 6:00 sang gab-i, Setyembre 13, sa public market sang Poblacion Ilawod, Passi City. Ginsundan sadtong alas 5:40 kag alas 5:55 sang kasisidmon, Setyembre 16, sa Barangay Poblacion South, Oton. May nadakpan man alas 5:40 sang kasisidmon sang Setyembre 16 sa Barangay Padios, Sara, Iloilo; kag takna alas 5:00 sang hapon, Setyembre 16, sa Barangay Imbang Grande, Passi City.

May nadakpan pa gid alas 7:30 sang gab-i, Setyembre 16, sa Barangay Ungka II, Pavia, Iloilo.

Maathag nga may nagapangisog naman sa pagbanhaw sang ila operasyon sa ilegal nga pasugal. Posible nga may yara sang mga kapitalista nga nagabantay lang sang higayon kag nakakita sang litib rason nga liwat nga nagpasimpalad. Posible man nga ila luyag tilawan kon ano ka determinado ang bag-o nga IPPO director sa pagtapna sa ila ilegal nga buluhaton.

Kahibalo ang tanan nga wala sang kuridor nga magapangisog kon wala sang operator nga nagapasalig.

Lantawa ang mga lugar nga may presensya sang “bookies.” Maathag nga may nagahulag nga illegal gambling operatos sa primer distrito sang probinsya sang Iloilo, ilabi na sa banwa sang Oton; may nagahulag man sa cuarto distrito ilabi na sa Passi City; kag may nagapangisog sa banwa sang Pavia nga dolunan sang syudad sang Iloilo.

Kahibalo kita nga may madalom nga ideya si Colonel Roland Vilela sa kon sin-o ang mga illegal gambling operator sa probinsya sang Iloilo.

Indi na siya bag-o sa iya propesyon kag kahibalo siya maglantaw kag magdeterminar kon ano nga panit ang yara sa idalom nga ginatabunan sang maalwan nga kapa. (bertladera@gmail.com/PN)

LEAVE A REPLY

Please enter your comment!
Please enter your name here