NAGATUKAL sa ila panit ang mayoriya sa Sangguniang Panlungsod. Nasilawan sa gamay nga kadalag-an nga naagom sang ila kaangay nga public servant. Daw mapaso sa kainit sang pagdayaw kag paghangad sang pumuluyo sa ila kaupod sa konseho.
Wala na-aprubar ang resolusyon nga nagapanginbulahan kay Iloilo City Vice Mayor Love Baronda nga napilian bilang chairman sang National Movement of Young Legislators (NMYL). Mabug-at para sa mayoriya ang magpabor sa sini nga resolusyon. Ayhan, tungod sa likop sang pulitika kag ayhan may yara sang naglaygay nga indi dapat ini nga suportahan.
Makabig naton nga daw kaangay sang bata-payaon. Nahadlok gawan sang dulsi, indi luyag nga may kaambit.
Indi hamtong ang panimuot kag balatyagon bisan mga may tinapusan, bisan may mga propesyon, bisan pa nga ang iban madugay na sa panghimanwa.
Indi ayhan insult para sa konseho sang syudad sang Iloilo ang mga resolusyon nga ginpasar sang Sangguniang Bayan sang Pavia kag Sangguniang Panlalawigan sang Iloilo nga nagapanginbulahan sa kay Iloilo Vice Mayor Love Baronda nga napilian bilang chairman sang NMYL?
Ang wala nakita kag gina-apresyar sang mayoriya sang mga konsehal sang syudad, nakita kag gina-apresyar sang iban nga legislator sa iban nga sanggunian.
Mas kahibalo pa ang Pavia kag Kapitolyo kon ano ang angay nga himuon kag ano ang angay nga ipasar nga resolusyon.
Maathag nga ang basura nga resolusyon para sa grupo sang mayoriya sang konseho sa syudad, ginakabig nga malahalon kag makahulugan para sa iban nga legislative body.
Kon nagapati sila nga wala sang impact sa pumuluyo ang nasambit nga resolusyon, ngaa ginsakdag kag ginpasar sang SB sang Pavia kag SP sang Iloilo ang nasambit nga resolusyon?
Kon nagapati nga dapat obrahan kag ipakita ni Baronda nga takus siya sa iya posison, ngaa ginsakdag kag ginpasar sang SB sang Pavia kag SP sang Iloilo ang nasambit nga resolusyon?
Dapat ipahigad ang pulitika. Ang resolusyon nga nagadayaw kinaandan na nga ginapasar sang mga legislative body. Pagkilala ini sang nadangatan sang isa ka indibidwal ukon grupo, pagkilala ini sa kadungganan nga nahatag sa mga Ilonggo, pagkilala ini sa kadalag-an sang Ilonggo.
Ano nga impact ang ginapangita?
Ang tanan nga ginhatagan sadto sang resolusyon sang pagpanginbulahan wala man nagpasa sang ila accomplishment report. Sang san-o ina mangin requirement para pasaran sang resolusyon?
Ano ang talaksan nga ginapangita?
Pinakauna nga babaye nga chairman sang NMYL si Baronda. Naglab-ot sa 900 ang boto nga nakuha sini sa ila ginhiwat nga eleksyon sa Metro Manila sadtong Pebrero 23 tubtob 25, 2026.
Padalagan man kamo didto, lantawon naton kon pila ang makuha ninyo nga boto.
Gina-isgan lang ang babaye nga ang tuyo amo lamang ang magserbisyo sa pumuluyo.
Mas gung-an, mas hangkilan, mas hamtong, kag mas propesyunal kag wala nagapahigot sa pulitika ang mga Sangguniang Bayan sang Pavia kag ang Sangguniang Panlalawigan sang Iloilo.
Kamo mismo ang nagahukas sang inyo panit, ginabulad ninyo sa mata sang pumuluyo kon ano nga sahi kamo sang puitiko. Ginapahibalo ninyo sa mga Ilonggo kon ano kalip-ot ang inyo panan-awan para sa kaayuhan kag kadungganan.
Ang pagbasura sa ginduso nga resolusyon nga nagapanginbulahan kay Vice Mayor Baronda indi kahul-anan para sa iya. Repleksyon ini sang indi hamtong nga panimuot sang mga nagbasura sa resolusyon. Repleksyon ini nga mas nagapangibabaw ang pulitika kaysa sa ila katungdanan kag katuyuan para sa syudad.
Nagapakilala gid ang mayoriya sang mga konsehales sa syudad kon ano ang dalagan sang ila paminsaron kag kon ano ang sahi sang ila panghimanwa. (bertladera@gmail.com/PN)
