BY THE WAY, wala naton ginpaabot nga mabatian ining isa ka komersyal sa TV. Ang aton Olympic gold medalist nga si Hidilyn Diaz sponsor gali sang isa ka makahulubog nga ilimnon!
Pensar naton makapalain sa isa ka atleta ang makahulubog nga ilimnon. Aba, kag daw ga-toast pa siya sining ilimnon sa ina nga komersyal!
Ma-imagine na gani naton nga hubog si Hidilyn sa isa ka pagtililipon upod ang iya mga kabarkada nga tomador. Kag basi hugsoy gid sa kahulugbon kag front page pa sa pamantalaan nasyonal pagka-aga.
Huwag naman! Dapat role model ka sang mga tsampyon nga mga atleta sang pungsod. Buyukon mo na gid lang bala sila sa maayo nga pag-praktis kag buligan sila sang bagay mo nga mabulig agud basi maka-gold man sila sa Olympics.
Indi ka magsiling nga ga-sponsor ka lang sining ilimnon pero wala ka imo gainom sini. Indi sina magpati ang mas madamo. Pensaron gid nila nga ga-enjoy ka man sa pag-inom sini. Kag ngaa mag-sponsor ka sini kon wala ka gid man gainom sing makahulubog nga ilimnon? Indi bala?
***
Wala nag-ulhot si presidential aspirant BongBong Marcos (BBM) sa interbyu ni Jessica Soho sadtong Sabado sang gab-i sa GMA TV.
Kuno “biased”, ukon indi “fair”, si Jessica kon mag-interbyu sa Marcos family gani wala siya nag-ulhot sa sinang interbyu.
Ang matuod nahadlok siya sa landong sang mapintas nga pagginahum martial law sang amay nga diktador sa sobra 10 ka tuig sa pungsod. Lakip na dira sang iya mismo mga kasal-anan sa mga pumuluyo katulad sang indi pagbayad sang buhis sadtong 1982-1985 kag binutig sa kon ano ang iya naangkon nga dungog kag hinimuan.
Mas gusto gali niya ang interbyu sang iya ihada kon diin pagusto siya dayaw sa iya diktador nga amay kag sang ila bug-os nga pamilya.
Ina ya ang indi “fair” sa publiko nga luyag gid mahibal-an ang atubang, likod, kag wala kag tuo niya para lubos mahibal-an kon sin-o kag ano siya sa iya pagdalagan sa pagka-Presidente.
Ang nahibal-an sang publiko nga multi-awarded ini si Jessica kag nahingadlan pa nga “Most Trusted Media Personality”, indi lang sang mga respetado nga mga grupo diri sa pungsod kundi lakip na sa luas.
Kilala man si Jessica sa mga “no-holds barred” nga pagpamangkot. Labi na gid kon ang ginapamangkutan may mga pwesto nga sensitibo nga kinahanglan ang lubos nga pagkilala sa ila sang publiko, katulad sinang interbyu sadtong Sabado sa mga presidential aspirant para sa Mayo 2022 nga eleksyon.
Ang nag-abot lang amo sanday Bise Presidente Leni Robredo, Senador Ping Lacson, Senador Manny Pacquiao kag si Manila Mayor Isko Moreno.
***
Sa paglikaw ni BBM sa sinang interbyu, nagagwa nga may mga bagay nga indi siya luyag mahibal-an sang publiko, samtang importante nga lubos makilala siya nila kon ano gid ang iya pagkatawo kag masarangan kon makapungko na bilang presidente.
Indi lang basta magsalig ang publiko sa ginapangako sang kandidato. Dapat matuman niya ini sa klase sang iya karakter kag sang iya nahimuan na kag mahimo pa.
Gani, dapat tani nga kalakip si BBM sa sinang interbyu ni Jessica agud mahibal-an sang publiko kon ano gid nga klase ang iya pagkatawo kag masarangan nga himuon, nga masanagan sa sinang interbyu.
Kay wala siya magtambong sa sinang interbyu, ano na lang ayhan ang pensaron sang publiko? Nga may mga bagay nga indi niya mapahayag sa publiko kay makapalain ini sa iya kandidatura? Laban-laban!
Pensar ko maalam siya kag kayang-kaya niya sabton ang ano man nga akusasyon batok sa iya. Daw maayo man gani kuno siya nga debatedor. Pero, indi man gali!
Katulad bala ni Senador Ping Lacson nga nangisug gid nga sabton ang mabug-at nga mga akusasyon batok sa iya sa interbyu ni Jessica. In fact, ginpangapinan pa niya si Jessica, nga ginpatungod kay BBM, nga kon ano man ang ginapamangkot ni Jessica kabahin lang ina sang iya trabaho kag indi tungod “bias” siya.
Ti ano karon kay naglikaw ka sa sinang interbyu, Mr. BongBong Marcos? Luyag ka mag-Presidente pero nahadlok ka man mahibal-an gid kon ano ka. Indi ayhan magduha-duha na ang mga pumuluyo sa credibilidad kag ikasarang mo agud mag-Presidente?/PN
