Padungol, pabungol!

PADUNGOL kag pabungol lang ang obra sang iban nga mga barangay officials sa syudad sang Iloilo.

Matapos ma-demolish sang Public Safety and Transportation Management Office (PSTMO) ang mga obstructions sa ila nasakupan, ila man gihapon nga ginapabay-an.

Pagkabos sang demolition team, balik naman ang iban nga sablag sa dalan.

May iban man nga bisan ginhambalan na nga magpangkakas sang sablag sa ila barangay apang wala gid naghulag, ginhulat pa ang demolition team sang syudad.

Ano ang rason ngaa nagapadungol kag nagapabungol ang mga opisyal sang barangay kag bisan ang mga may propedad nga nagasablag sa alagyan sang publiko?

Ini bala bangud duna nga matamad? Ukon may ginasandigan nga indi gid sila matandog bisan pa nga ang President na sang Pilipinas ang nagasiling nga tinluan ang ila lugar sang mga obstructions?

Pabungol kag padungol sila bangud kaalyado nila ang alkalde. Sila ang lyabe sang kadalag-an sini sang nagligad nga election. Basi nagasalig sila nga indi man sila pag-akigan sang alkalde sang syudad?

Pero sa isa sa mga interviews sang atun halangdon nga alkalde, ginsiling niya nga ang mga wala nagatuman sag mando itudlo niya sa Department of Interior and Local Government. Buot silingon kamo ang itum-ok bangud wala kamo nagahulag.

Kuntani ang tagsa ka barangay officials amo ang nagaboluntary nga magpatuman sang clearing operations sa ila barangay, indi na kinahanglan pa sang PDTMO nga maglibot. Indi na kinahanglan pa sang gobyerno nga maggasto sang gatong, tawo kag ti-on sa pagpaninlo sa mga sablag sa dalan.

Duha lang ka bulan ang ginhatag sa tagsa ka local government unit nga maninlo sa ila nasakuopan. Ang indi sini makatuman magapangatubang sang suspension ukon dismissal sa serbisyo.

Nahibaluan ta naman nga mahapos lang ini hambalon nga i-dismiss ukon i-suspend ang wala nagatuman. Masiling ang mga wala nagatuman nga may kasuguan pa man. Pero dapat ninyo dumdomon nga si Rodrigo Duterte na ang Presidente. Mahimo nya kun ano ang gusto nya basta mapatuman lang ang iya mando.

Kuntani makabugtaw ang mga barangay officials sa kamatuuran nga opisyal sila sang gobyerno. Ang ila trabaho wala lang nagatapos sa pag-conduct sang session kag magpungko sa ila opisina. Dapat nila paminsaron ang katungdanan nga ara sa ila abaga kag dapat nila ini nga tumanon.

Indi lang kita maghulat sang honorarium. Ang honorarium dapat balusan sang serbisyo nga matarong.

Tama na nga pabungol kag padungol. Magtrabaho man kamo, kap kag kagawad! (jpranco1975@gmail.com/PN)

LEAVE A REPLY

Please enter your comment!
Please enter your name here