Palpak nga bulong dalhon sang kandidato konsehal

NALIPAY gid kita nga makita ang anay bantogon nga broadcaster nga si Soc Abonado sa isa ka supermart diri sa Mandurriao sadtong Hwebes.

Indi lang tungod suod ta nga abyan kag upod sa propesyon sa tri-media si Soc nga madugay wala ta makita sang nagsaylo ini sang interes sa pangabuhi, kundi tungod man kay isa siya sang mga komentarista sa radyo nga kahidlawan mo.

Kilala siya sa iya matandus kag maisug nga pagpangapin sa mga ginapigos kag sa pagpakamalaut sa mga salbahe sa gobyerno sa iya mga komentaryo.

Nangin matonog iya ngalan sa madamo nga mga eksposey (expose) nga galakip sang anomaliya sa bulong nga substandard nga ginpanagtag sa Iloilo, kag bisan sa anomaliya sa pagpalusot sang sinako nga kalamay nga nakalab-ut pa gani sa Senado.

Sa karon, isa siya ka kandidato sa pagka-konsehal sa banwa sang Janiuay, Iloilo upod sa linyada ni Congressman Toto Defensor sa pagka-gobernador sang Iloilo sa Mayo 2019 nga eleksyon.

Wala siya nagsiling kon ano ang pagdala niya sang mga isyu kag sang iya grupo sa kampanya, apang naseguro naton nga dalhon niya ang mga isyu parti sa mga kamalamalahan nga maangot sa ila kasumpong, lakip na seguro ang isyu sa substandard nga bulong nga kuno nagpatambok sang iban dira.

Namuno niya ang parti sang pagpamakal sang raw materials sang bulong sa bili nga isa ka milyon ka pesos (P1 million) nga sang ginluad sang makina nabaligya sing P50 ka milyon! Hamak mo ran, banwa? Ang masakit dira kay madamo sini mga substandard nga bulong, nga gintunaan sang paglala sang masakit kag kamatayon gani sang madamo nga pasyente.

Segurado maubo gid sina ang kasumpong mo sa pulitika sa palaabuton nga eleksyon sa Mayo 2019 kon ma-expose mo ining mga anomaliya.

Good luck sa imo masaligan nga pagdaug, Soc!

***

SAMTANG wala pa matapos ang final counting sang United States midterm elections, maathag na ang pagkapierde sang Republican Party ni President Donald Trump sa House of Representatives, nga gin-dominar niya sadto upod sa Senado.

Sang Nobyembre 7, isa ka adlaw pagkatapos sang US midterm elections, 219 na ka pulungkuan (seats) sa House ang nadaug sang Democratic Party ni sadto Presidente Barack Obama. Sobra na ini sa katunga sang 435 ka seats sa kabug-usan sang House.

Nagdaug liwat ugaling ang Republican Party, ang  tradisyonal nga kasumpong sang Democratic Party sa two-party system sang Estados Unidos, sa Senado.

Sa amo man nga pag-inisipay sadtong Nobyembre 7, may yara na nga 51 ka seats nga nadaug ang Republican Party sa 100 ka seats nga yara sa Senado, samtang nagapaabot pa sang dugang nga manugdaug.

Ano bala ang buot silingon sini sa pagpalakat sang administrasyon  ni Trump?

Mga observer nagapati nga daku gid ang epekto sini sa karon nga mga programa kag polisa sang Trump administrasyon. Labi na gid sa iya ginapatuman nga US-Mexico border sa tunga sang duha ka pungsod batok sa mga illegal immigrants pasulod sa US, sa tax cuts nga iya ginadihon, kag ang programa sa health care.

Ang House may eksklusibo nga poder sa mga revenue bills kag pagpalakat sang buhis.Tungo sini laban-laban maapektuhan gid ang plano sa pamuhis ni Trump kag ang kon diin patup-on ang funding sa mga program kag proyekto, lakip na ang pondo sa pagtukod sang US-Mexico border batok sa mga illegal immigrants.

Tungod sini, ga-expect kita nga mangin mahumok na gawa ang relasyon ni Trump sa mga Democrats kag untaton na niya ang sige bombardiyo sa mga Democrats nga sa karon yara sa mayoriya sa House.

Ukon dungol gid siya iya, nga labi gani magabaris sa paggamit sang gahum sang Presidente upod sa mayoriya sa Senado sang mga kaupod niya sa Republican Party. (w_mateojr@yahoo.com/PN)

LEAVE A REPLY

Please enter your comment!
Please enter your name here