[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
NAGALIBOD SANG BATO
Samtang ginakugos sang hugot kag luyag nga pigaran, ang ginakugos nagapanginpadlos kag luyag makabuhi gikan sa nagakugos.
Kaangay sini ang sitwasyon sa tunga sang kapulisan kag mga tawo nga imbolbado sa ilegal nga droga. Nagabutongay sila sang lubid, nagapa-indis-indis kon sin-o sa ila ang mas makusog kag magadominar.
Halos tanan nga diskarte ang nahimu na sang kapulisan agud nga madakpan ang mga nagabaligya sang ilegal nga droga, nagarisgo agud nga matultolan ang ila ginahukmungan, kag wala nabalaka sa kon sin-o ang ila matapakan, lamang nga mapapas ang pagdata sang ilegal nga droga kag mahilway ang komunidad sa ginatuga sini nga halit.
Halos napapas na ang mga drug den ukon roro-an sang mga durogista sa pila ka mga barangay, namutikan man nga wala na sang may nagabaligya sang aluminum foil nga nagunting na nga nagabalor sang lima ka pesos kag handa gamiton para sa pagsuyop sang ilegal nga droga. Nakabatyag sila sang katagam, nahadlok sila nga madakpan.
Makabig nga nasilhigan na ang mga sagbot sa sosyudad. Ang mga mahapos matumod nga nagagamit sang ilegal nga droga ang nagpanago na kag halos ginakibang nga sila ang madakpan.
Nagbulos ang mga mga tawo nga wala naton ginalauman nga may likom nga lihok. Indi mo mahambal nga nagagamit ukon nagaduso sang ilegal nga droga magluwas lang kon madakpan na. Sa subong nga panahon, makakilibot ang sitwasyon bangod kon sin-o pa ang ginatangla nga magaaway sa ilegal nga droga amo pa ang nagagamit sini.
Mas makatalagam ang sosyudad nga ang kaupod naton nga nagahulag indi naton mamulalungan nga may likom nga ginahimu, nagapakuno-kuno nga matinlu apang kon wala na ang aton mata nga nagalantaw sa ila, sila ang nagalusong sa lunang sang kalautan.
Sa subong nga sitwasyon, mga himata sang prominente nga mga tawo ang nagakadalasa sa buy-bust operation, mga may kwarta kag mga propesyonal ang iban sa ila.
Matuod, wala sang pili ang nagabisyo sang ilegal nga droga, basta may ikasarang nga magbakal sini kag naga-tripping lang upod sa ila mga abyan, sila ang nagatilaw, nagakabuyo tubtob nga sila ang nahigot na sa makabuluang nga asu gikan sa puti nga bato.
Apang, mas mabudlay karon ang pagtultol sa ila bangod nga nagahulag sila kag wala sang pat-od nga lokasyon. Lantawa ang natabu sa Arevalo kon sa diin may nagkaladakpan sa sulod sang isa ka nagaparada nga van sa kilid sang dalan. Samtang nagadulog, ang mga tawo sa sulod ang nagapakahubog sa asu nga makailibog.
Mas nangin masibod kag pinasahi na ang ila padugi, mabudlay nga tukibon kon kulang sa diskarte ang kapulisan.
May mga nagabaligya sa mga lugar nga may kalingawan, nagadungan sa mga nabaligya sang makahulubog nga ilimnon kag sang hingalit nga kalipay.
Mabudlay sila makilala magluwas lamang kon maka-establisar ka sang koneksyon sa ila mga ginabaligyaan.
Dapat nga maglagas sa diskarte ang kapulisan, mangin abanse sang isa ka tikang sa mga padugi nga ginahimu sang mga nagaduso sang ilegal nga droga.
Tukibon kon kanday sin-o ang nagalibod sang bato./PB
[/av_textblock]
[/av_one_full]
