[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
BULONG SA AKTWASYON
Magatahaw ang imo paghingamo kon ang imo luyag ukon gusto igahatag gilayon sa imo. Magakalma ang imo balatyagon, mapahamtang ang imo paminsaron.
Kaangay ini sa nagakatabu sa karon nga panahon kon sa diin ang mga grupo sa sektor sang transportasyon ang nagahiwat sang transport strike sa tuyo nga sablagan kag hatagan sang huol ang gobyerno.
Ang ila katuyoan nga magtuga sang huol agud mabalikdan sila sang gobyerno ang nangin inutil. Ginapahangop sang gobyerno nga ang tanan nga pagsugilanon mahatagan sang atensyon kag solusyon kon istoryahan sa ibabaw sang lamesa kag kon bukas ang magtimbang nga bahin sa mga proposisyon sang tagsa-tagsa.
Naanad ang transport group sa ila ginahimu nga transport strike umpisa pa sadtong mga nagliligad nga administrasyon kag ginpayunan sila sang mga nagliligad man nga mga presidente.
Nagakabag-ohan sila karon sa sabat kag pagtratar sa ila ni Presidente Rodrigo Duterte. Sa tagsa ka maghiwat sila sang transport strike, gina-updan sila paagi sa pagdeklarar nga wala sang obra kag klase.
Nagaangkab sila nga wala sang ngipon. Paano makahalit ang wala sang dalit? Paano mo matublag ang wala nagakatublag? Paano mo maapektohan ang wala nagapaapekto?
Kaangay sang isa ka espejo ang akto sang gobyerno, kon ano ang imo hulag amo man ang makita mo sa espejo. Kon ano ang imo dagway, amo man ang makita mo sa repleksyon.
Ginapatumar lang sila ni Digong sang bulong nga luyag nila imnon. Ila na masaboran ang damil sang ila luyag. Indi man ina sila malipat nga may mga anak man sila nga naga-eskwela kag may mga transaksyon man sila nga maatrasar kon wala sang opisina sa gobyerno.
Makabig man nga pagkondisyon ini sang gobyerno sa pinsar sang mga tawo nga kon may transport strike wala sang klase kag obra sa gobyerno gani wala sang apektado kag mahimo sila makalagaw-lagaw sa mall ukon makapahuway-huway sa tagsa nila ka balay.
Bisan ano pa ang ibwal sang kalayo, sa paglipas sang tion, magatahaw ini kag mapalong. Kaangay ini sa init sang balatyagon sang nagasinggitan sang kawsa, maabot ang tion nga mareyalisar nila nga indi madala sa singgitan ang ila luyag, kundi paagi sa pag-istorya sa ibabaw sang lamesa.
Lunsay nagahandum sang reporma kag pagbag-o, apang kutob lang sila sa singgit bangud kon iduso na ang pagbag-o gilayon sila nga nagapalagyo.
Paano sila mabatak sa ila kahimtangan kon indi sila bukas sa bag-o nga panan-awan? Paano sila mabuligan kon sarado ang ila pinsar sa ginaduso nga pagbag-o.
Pila na sila ka tuig sa sina nga sitwasyon kag masami nga nagapanghakroy bangud sa kamahal sang gatong kag sa kagutok sang trapiko. Ginahatagan sila sang solusyon nga makakinot sa gatong kag agud indi mahigot sa presyo sang krudo kag gasolina. Ginahatagan sila sang solusyon agud nga indi na sila magreklamo sa gamay nga kita bangod sa tuman ka hinay nga lakat sang trapiko.
Maathag nga kon ang pasyente salawayon, iya ginawakli ang ginahungit mo nga bulong. Gusto niya nga mag-ayo apang ang bulong nga ginapatumar iya ginasikway kag nagakauyang./PB
[/av_textblock]
[/av_one_full]
