[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
PAGBAG-O
Nabalhag na sa bisan diin nga libro sang kaalam nga ang tanan nga ginaduso nga pagbag-o ang pagapamatukan sang mga indi luyag magbiya sa ila naandan.
Malawig na nga dekada nga nakita naton ang mga pampasahero nga jeep sa dalan, ang iban makapila na nga pintahan ang kaha, ginkondisyon ang makina kag madamo na sang higayon nga ginmasilya, apang ang buga sang tambutso ang nagasugid sang ikasangkol sang makina, nagarinagurongrong na ang dalagan sang jeep kag halos daw mahambal na sa driver nga kapoy na sia sa matag-adlaw nga linas sa dalan.
Masami nga nagareklamo ang transport group sang gamay nga kita sa ila pagbiyahe bangod sa naga-igod nga lakat sang trapiko, bangod sa mahal nga balor sang gasolina ukon krudo, bangod sa mahal nga piyesa sang salakyan kag bangod sa kamahal sang ila arkila.
Pila na ka dekada ang ini nga problema, sa tagsa ka magsaka ang balor sang gatong nagareklamo sila, sa tagsa ka magpatuman sang bag-o nga ordinansa angut sa polisiya sa ila pagbiyahe sila ang nagareklamo man kag kon ano man nga ginaduso para sa ila kaayuhan ang ila ginabalabagan sa rason nga sila ang mahul-an kag maapektohan ang ila palagabuhian.
Ang ila mga problema ang nabatian na sa pila ka tinion, ginsinggit sa pila ka higayon kag sa karon sila ang nagakapaos na, nagaluya, kag ang ila ginatuad nga kawsa ang kaangay sang nagatukar nga guba nga plaka, masami mabatian apang sila ang indi luyag nga masolusyonan.
Nagatan-ay ang gobyerno sang moderno nga salakyan nga komportable para sa pasahero, salakyan nga mainabyanon sa palibot, ang driver makakinot kag mabulong ang ila ginasinggitan nga solusyon nga luyag nila maagom.
Ang mga salakyan nga nangin tanda sang aton pagpanugod ang amat-amat na nga nagagabok, ang tanan nga bagay nagalipas kaangay sang aton ginapabugal sadto nga manami nga mga salakyan. Ang ila kaanyag sa dalan kaangay sang rosas sa hardin nga matapos magbuskag, magpasundayag, ini ang magalayong kag sa duta maga-ulon.
Batunon naton ang pagpanghangkat sang pagbag-o. Hakson naton ang ginatan-ay nga kaayuhan kag kasulhay para sa tanan. Nahangpan naton ang paghimakas sang mga driver kag ang kahugod nila sa pagbiyahe sang jeep. Naapresyar naton ang ila kabudlay rason nga ang gobyerno nagatalupangod kag sa ila nagatan-ay sang angay nga solusyon.
Nagatuhaw ang kahadlok sa ila panimuot bangod nga wala nila nahangpan ang katuyoan, wala nila nakita ang padulungan kag wala nila masaboran ang kasulhay sa pagpadalagan sang bag-o nga mga salakyan.
Kon mangin bukas ang ila panimuot sa pagbaton sang mga ginatan-ay nga solusyon, ang tanan makabenepisyo, ang tanan makaagom sang masulhay nga pagbiyahe sa dalan.
Makapoy na ang magutok nga dalanon, makapoy na ang madugay nga tion sa pagbiyahe; untaton na ang paghaklo sang maitom nga asu gikan sa buga sang tambutso.
Hatagan naton sang higayon ang ini nga mga plano, gamiton ang paminsaron labaw sa balatyagon. Aton lantawon ang masanag nga palaabuton nga nagapanuktok sa paghatag sang higayon.
Buksan ang paminsaron, ang pagbag-o aton pasudlon./PB
[/av_textblock]
[/av_one_full]
