[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
SA PULONG, SA BUHAT KAG SA PAGPATUMBAYA
Mabudlay takladon ang bukid sang pagpangduha-duha. Masiot ang banas, puno sang pagkabalaka, madamo sang tunok, madamo sang bato nga naga-ulbo, makapoy ang pag-usoy tubtub nga makasaka sa mataas nga pukatod.
Tinuig man ang agwanta ni Mayor Jed Patrick Mabilog agud nga mapanas ang tap-ing sa iya nga guya.
Madamo sia sang ginhimu nga pamaagi, nagpabulig sa mga nakahangop sa kon ano ang angay nga himuon agud nga madistansya ang iya kaugalingon sa landong sang ilegal nga droga.
Nagpabulig sia sa mga gung-an sa propaganda agud nga mabatak ang iya lunod nga imahen kag malimpyohan ang iya landong sa mantsa nga wala niya ginahandum.
Makita ang pagnipis sang iya harong, ang paglupyak sang iya guya, ang pagkul-aw sang iya aura, kag ang daw ginakapoy niya nga ispiritu bangod sa mga gina-agihan nga mga pagtilaw.
Nasumalang niya ang mga mapait nga mga tinaga, nalukdo na niya ang mga mabug-at nga pahayag kag halos napilasan ang iya dughan sa mga pagtamay kag paghikay nga iya naagom.
Apisar sini tanan, nagpangita sia sang mahapos nga dalan agud nga madasig nga makalab-ot sa iya padulongan nga makasampay ang iya hagu nga kalag kag makahambilay ang mga kamot niya nga nagaalay, makapungko sa iya mabugnaw nga latagon, makahapa sang malum-ok nga hilamon.
Sa sagunson nga pagtupa sang ulan, naghumok ang duta kag nagpanalingsing ang binhi nga iya gintanum. Nag-amat-amat tuhaw ang resulta sang iya ginhimakasan, nagpamulak sang mahamot kag ang iya ngalan liwat nga nagpangamyon sang sini nga kahamot.
Gin-ugyonan sia sang mga opisyales sang Philippine Drug Enforcement Agency kag Philippine National Police, ginhakyaw ang iya dungog kag gin-uyatan nga may paghalong, gi-amligan nga indi maagsikan sang bisan gamay nga mantsa sang pagduda.
Madugay man ang pagligis sang bato antes ang balas nagpino. Madugay man ang paghimakas kag madamo sang resources na ang nagamit antes makita ang nagasanaaw nga paglaum nga ang iya integridad liwat nga mag-inggat.
Mabudlay gid man nga panason ang sala nga nahimu paagi sa pulong kon sa diin sadto hugot niya nga ginapanginwala nga naga-igsister ang problema sa ilegal nga droga kag ginpabutyag pa nga indi ini maka-alarna sa syudad.
Mabudlay man nga panason ang sala nga nahimu paagi sa buhat bangod sadto nakita sia nga nagapakig-upod sa mga tawo nga ginakabig nga mga drug lord kag indi malipod ang ila maayo nga kaangtanan sadto.
Mabudlay man nga panason ang sala nga nahimu paagi sa pagpatumbaya bangod sadto pa man ginasukot na sia sang pumuluyo kon ngaa wala sia nagahulag batok sa ilegal nga droga. Halos indi makita ang iya mga kongkreto nga tikang ukon mga padugi kon paano papason ang ilegal nga droga sa Syudad sang Iloilo nga sang ulihi nakamarasmas ang tanan kon ano kalala sang problema.
Nabansagan nga “shabulized” ang Iloilo sang makapila ka beses, nabansagan man nga “bedrock” sang ilegal nga droga kag bisan ang iya nga persona ang makapila na ginlawag ni Presidente Rodrigo Duterte.
Mabudlay nga makalampuwas sa sala nga nahimu paagi sa pulong, sa buhat kag sa pagpatumbaya./PB
[/av_textblock]
[/av_one_full]
