[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’Panugdaon ni Matt | Pulis kahimbon sa ilegal nga pangisda?’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni Wenceslao “Matt” E.Mateo Jr.
[/av_heading]
[av_textblock size=” font_color=” color=”]
Thursday, July 6, 2017
[/av_textblock]
[av_textblock size=” font_color=” color=”]
DAW wala katapusan ang ilegal nga pangisda sa Northern Iloilo labi na gid sa mga banwa sang Carles, Estancia kag Concepcion.
Luas sa pagpanikasug sang mga munisipyo, ang gobyerno probinsyal nagatusmog na gani sa paglagas kag pagpanakop sang mga ilegalista nga ini upod man ang volunteer group nga Visayan Sea Squadron (VSS) nga gintukud sang 2005 kag ginpangunahan sang bantugon nga environmentalist nga si Atty. Antonio Oposa.
Siling gani ni Atty. Hector Teodosio, nga gabulig man panguna sa VSS, ang illegal fishing sa Carles mas lala pa sa karon nga administrasyon ni Presidente Rodrigo Duterte.
Ang pagtan-aw niya sa problema, labi na gid sa hulbot-hulbot (Danish seine), amo nga ang PNP kag ang LGU wala sang “dedication and competence” sa pagpauntat sang ilegal nga pangisda diri sa Carles.
Ang masakit pa, sunu man kay Jojo Zerrudo Deluso, kay ang hulbot-hulbot nagahalit sang bisan mga magagmay nga mangingisda, katulad sang mga naga-pangasag gamit ang crab trap sa idalom sang tubig, samtang nagapagusto gid lang ang mga commercial fishing outfits.
Labay man ang akon, may ordinansa ang Iloilo Province, Ordinance No. 2012-093, kag subong man ang probinsya sang Negros Occidental nga naga-prohibir sa pagdakop sang mga magagmay kag naga-pangitlog nga kasag (crab) sa ila hurisdiksyon.
Masakit ang agi sang hulbot-hulbot, hambalon pa. Man nagapakaras gid ini sa kadadalman sang dagat kag nagaguba sang mga corals kag iban pa nga ilistaran sang mga isda kag iban pa nga marine life didto sa idalom.
Ang hulbot-hulbot gin-ban na gani sang Bureau of Fisheries and Aquatic Resources (BFAR) sa idalom sang FAO 246, apang gin-petisyonan ini sang mga commercial fishing operators. Ugaling, gin-suportahan ini sang Korte Suprema.
Sang sini lang gani, ang mayor sang Estancia nga si Mayor Rene Cordero nagreklamo gid kay Governor Arthur Defensor, Sr.
Nagpahangop si mayor nga daw ginapatumbayaan lang sang kapulisan ining mga ilegalista.
Man sadtong Abril 27, 2017 ang Estancia fishing port management nagpahibalo nga dira nayon malapit sa ila nakabati sila sang tatlo ka asud-asod nga lupok sang dinamita.
Aba, kag daw nagapang-garit-garit pa ining mga ilegalista kay bisan sa ingod lang sang fishing port gapalupok pa sila sang dinamita.
Naghatag ini sang malain nga panghuna-huna sa madamo, katulad sang napabutyag na ni Atty. Teodosio sa ibabaw.
May suspetso gani sa Estancia nga sige ang pagluntad sang illegal fishing diri tungod kahimbon ang kapulisan sa sining mga ilegalista. Kon indi, ngaa kuno nga daw wala gid ginahadlukan ining mga ilegalista?
Basi man ang mga pulis mismo ang nahadluk mapatay sang sining mga ilegalista, gani wala sila naga-aksyon.
Sa natandaan ta pa sadtong 2006, ang upod ni Atty. Oposa sa VSS nga si Elpidio de la Victoria, isa ka maisug nga team leader sang Bantay Dagat, ginluthang patay dira lang sa gwa sang iya puluy-an. Ini natabo duha ka adlaw pagkatapos nga ginpangunahan niya ang pagpangdakop sang mga nagpalupok sang dinamita. May mga death threat man gani si Atty. Oposa.
Wala man gani ining mga ilegalista nahadlok sa mga dalagku nga penalidad sa ila violations. Daw may gapasalig gid seguro.
Pero, ambot lang. May ga-suhestyon nga butangan liwat sang isa ka maisug nga team leader ang Bantay Dagat katulad ni de la Victoria. Sin-o ayhan? Si retired “supercop” Leroy Rapiz nga sadto ginakakugmatan man sang katulad sining mga ilegalista? Ugaling, daw ginwahig man siya sadto pahigad sang kon sin-o nga mga pulitiko kag gintapok sa isa ka malinong nga kaharian sa diin ginatuyo ka pirme kay daw wala man aksyon dira./PB
[/av_textblock]
[/av_one_full]
