NATUBLAG ang tanan sang naglanog ang balita nga ginsulod sa iya puluy-an ang gobernador kag ginpaarakan sang luthang.
Kaangay sang balud nga nagsalya sa honasan, nag-ukay sa balas kag nagpalubog sa dagat ang ini nga hitabu.
Nagpukaw ini nga sitwasyon sa tanan, ilabi na sa mga na-eleher nga mga opisyal nga maghugot sang ila seguridad kag nagtukbol man ini sa kapulisan tuhoy sa sahi sang seguridad nga ila ginapatuman sa lugar nga ila nasakupan.
Kaangay nga wala sang kulba ang mga taghimo sang krimen, masupog, mapintas, kag wala sang pagpang-alang-alang nga gintuman ang ila tuyo sa gobernador.
Ginbawian sang kabuhi si Negros Oriental Governor Roel Degamosa ospital takna alas 11:41 sang aga sang Sabado, Marso 4, 2023, matapos paarakan sang luthang sang mga suspek pasado alas 9:00 sang aga sa sulod sang compound sang iya puluy-an sa Barangay 9, Pamplona, Negros Oriental.
Makabulungol ang mensahe sang sini nga hitabu tungod nga sa masanag nga butlak sang adlaw, sa tuman ka damo nga tawo, kag sa sulod mismo sang compound sang puluy-an ginpatay ang pinakamataas nga opisyal sang probinsya.
Kaangay sang isa ka manok nga ginkuot lang sa kurungan kag gingulgulan nga wala gid nakabatu ukon nakatusik man lang agud mapilasan ang nagahingamo sang iya kabuhi.
Sa sini nga hitabu, liwat nga nagtipon ang mga opisyales, nagpanawagan sa kapulisan kag militar nga ipasiguro nga wala na sang may magluntad nga kaangay sini nga insidente sa palaabuton.
Madamo sang natagam kag liwat nga nagalantaw sa kahugot sang ila seguridad agud nga indi mangin biktima. Nagapati ang kalabanan nga may kaantanan ini sa gihapon sa nakalipas nga piniliay. Padayon nga nagasungaw ang pagkadisgusto sang mga nalutos sa piniliay, indi komporme sa resulta sang eleksyon, kag ang nagadabdab nga emosyon nagaduso sa ila sa pghimo sang makahas nga lihok.
Dapat naton talupangdon ang mga hitabu sadto kag tubtob karon, aton basahon ang mensahe sang panahon kag tun-an kon ano ang mangin angay nga proteksyon nga himuon.
Sa natipon nga datus ni Surigao del Norte Rep. Robert Ace Barbers, kapin sa 927 na ang napatay nga elected officials umpisa 2016 tubtob 2021. Ginalakipan ini sang 58 ka mayor, 35 ka vice mayor, 126 ka konsehal, 402 ka kapitan sang barangay kag 306 ka konsehal sang barangay.
Kabay nga indi na madugangan ang numero sang mga nagkalamatay kag mahatagan sang hustisya ang natabu sa ila. Mabudlay man mag-isip san numero kag dumdumon ang ila kadamuon sa tagsa ka may yara naman sang mapatay.
Kinahanglan nga madakpan kag mapasabat sa ila hinimuan ang mga suspek agud nga matagam ang iban pa nga may tuyo nga mahimo sang kaangay sini nga lihok.
Tion naman nga plastaron sang kapulisan ang ila ginahimo nga paghatag sang seguridad sa mga pumuluyo. Dapat ipadayon ang paglagas sa mga nagahupot sang armas-luthang kag bungkagon ang mga armado nga grupo, ilabi na ang mga nagapabayad agud nga magpatay sa ila isig-kapareho.
Sa sini nga hitabu, nagpasar sang resolution ang mga katapo sang 14th Sangguniang Panlalawigan ng Iloilo sa ginhiwat nga 34th Regular Session nga nagakondenar sa pagpatay kay Negros Oriental Governor Roel Degamo.
Nahibaluan nga ang Resolution No. 2023-000 may tigulo “Resolution Condemning In The Strongest Terms The Killing Of Governor Roel Degamo Of The Province Of Negros Oriental.”
Ginduso ini sang sponsor nga si Vice Governor Christine “Tingting” Garin kag gin-updan sang mga katapo sang 14th SP.
Nagapahayag sang kaakig ang Sangguniang Panlalawigan tuhoy sa mapintas nga akto kag nagahingyo sa natungdan nga mga ahensya sang gobyerno para sa madasig nga resolusyon sang kaso agud nga ang taghimo sang makasilidni nga krimen ang mapasabat agud maangkon ang hustisya kag maagom ang kalinong.
Angay nga rebyuhon sang kapulisan ang sitwasyon kag tumuron ang mga armado nga grupo kag bungkagon agud nga wala na sang may kabalak-an pa ang mga na-eleher nga mga opisyal kag mismo mga pumuluyo.
Nagahilapit na naman ang piniliay para sa barangay, mas mainit, mas masingki, kag mas emosyunal kag masami madamo sang nagaluntad nga insidente. Kilalahay, magkasimaryo kag kon kaisa sa isa lang ka alagyan sila nagalabay kag kon magsumalangay diri sila nagasumpakilay.
Dapat masapar na subong pa lang antes magluntad ang mas malala nga hitabu kag may mauyang naman nga kabuhi.
Importante gid nga mapapas ang kalakasan agud wala sang may mahul-an kag kabuhi nga mauyang. (bertladera@gmail.com/PN)
