Pinasahi nga pagdaug ni GM Wesley So

DAKU gid ang aton kalipay – subong man seguro sang iban nga mga Filipino – sa ining ulihi nga kadalag-an ni Chess Grandmaster (GM) Wesley So.

Ina, bisan pa isa na siya ka Filipino-American nga katapo sang United States Chess Federation kag naga-representar na sang Estados Unidos sa iya mga international games sa chess.

Si So karon ang pinaka-una nga tsampyon sang Fischer Random Chess Championship sa ginhiwat nga inaugural competition sini sadtong Nobyembre 3 sa Norway. Ginpatigayon ini mismo sang FIDE International Chess Federation sa nahauna man nga kahigayunan.

In fact, pinasahi man ining pagdaug ni So kay ginlampaso gid niya ang world champion (sa Standard Chess) nga si Magnus Carlsen sa score nga 13.5 batok sa 2.5 lang sang naulihi.

Sa bahin ni Carlsen, daw indi gani makapati ini nga lutoson siya ni So sang subong kapintas. Ginlutos ni Carlsen bisan sa eliminations sang Random Chess ang nagliligad niya nga mga kasumpong sa Standard Chess, apang indi si So. Kag sa daku pa nga pagkalutos!

Well, indi gid man seguro dapat matingala si Carlsen kay si So Rank No. 2 sa iya sa FIDE Elo rating sadtong 2017 pa.

Sa sining kalutosan, daw gintakpan ugaling si Carlsen sang langit nga wala sing mabungat kundi ang pag-congratulate na gid lang kay So.

Nagdaug sa ikatlo ka pwesto si Ian Nepomniachtchi sang Rusya sang ginlutos sini si Fabiano Caruana sang Estados Unidos, 12.5-5.5.

Gindaug ni So ang top prize nga $125,000; $75,000 naman para kay Carlsen; $50,000 kay Nepomniachtchi; kag $40,000 kay Caruana.

***

Ang Fischer Random Chess gin-imbento ni anay world chess champion GM Bobby Fischer sang Estados Unidos nga madasig nangin popular sadtong duha ka tuig nga nagligad.

Indi ini katulad sang Standard Chess. Diri gina-shuffle (wala gapabilin sa kinaandan nga position) ang mga pyesa (chess pieces) sa likod nga pwesto (back rank) nga kaupod sang Hari kag Reyna. Ang mga pawn lang ang yara gihapon sa ila pwesto.

Tungod sini, indi kinahanglan ensyano ka gid sa opening theory kag deep prepared lines agud magdaug. Kinahanglan mo lang diri ang “quick thinking and analysis” sa paghimo sang mga orihinal nga mga hulag (moves).

Siling gani ni GM So nga mas luyag niya hampangon ang Random Chess sangsa Standard Chess tungod “There’s a lot of creativity” diri.

***

Si So natawo sadtong Oktubre 9, 1993 sa Bacoor, Cavite sa mga ginikanan nga sanday William kag Eleanor So.

Sa lamharon pa lang kaayo nga edad nagpakita na siya sang kapinasahi nga abilidad sa chess.

Ginkilala siya bilang pinakabata nga Filipino grandmaster (GM) sadtong Disyembre 2007 sa edad nga 14 anyos kag ikapitu sa pinakabata nga nag-garner sang GM norm sa ina nga panahon.

Gintagaan siya sang isa ka chess scholarship sa Webster University sa Estados Unidos. Nangin myembro siya sang chess team sini, kag naghanas sa idalom ni coach WGM Susan Polgar, ng pila ka beses nangin World Champion sang mga kababayehan sa ahedres (chess).

Masami ugaling gapalya si So sa klase tungod sang huyog niya sa chess. Nangin abyan niya ang isa ka anak nga babaye sang anay artista nga si Lotis Key kag sang bana nga anay man PBA player Renato Kabigting sang Minnesota.

Gin-agda sini si So nga magdayon sa ila agud mahatagan siya sing panahon sa iya handom nga labi palantipon ang iya paghampang. Ginkalipay man ini sang mag-asawa kay nakita nila ang daku nga potential sang kapareho nga Filipino.

Nag-untat na sa pag-eskwela si So kag amat-amat na nagpasakop sa profesional chess sa diin nagaganar ang mga nagadalaug.

Sang Oktubre 2008, ginkilala si So bilang pinakabata nga nag-angkon sang Elo rating nga 2600, breaking the record sang subong nga World Chess Champion nga si Magnus Carlsen sang Norway.

As of  2017, Rank No. 2 na si So sa kalibutan sang chess nga may Elo rating nga 2807, nga indi gid man malayo gid sang iya ni Carlsen nga 2831.

Sa edad nga 23 (sadtong 2017) si So man ang pinakabata sa apat ka humalampang sa chess nga may Elo rating nga 2800 pataas.

Sa liwat, daku gid nga kongrats sa imo, GM Wesley So! (w_mateojr@yahoo.com)/PN

LEAVE A REPLY

Please enter your comment!
Please enter your name here