PUTI itlog gali si Marcos Jr., nahadlok siya makig-debate one-on-one kay VP Robredo.
“That debate will never happen,” pamat-ud pa sang iya spokesman nga si Vic Rodriguez sa pagpanghangkat nga ini ni VP Robredo.
Ngaa ayhan? Wala nag-elaborate si spokesman. Bal-an ko na. Ina tungod nahibal-an ni Marcos Jr. nga pierdihon gid siya ni VP Robredo sa kon ano man nga isyu nga ila baisan.
Man, mas maalam si VP Robredo sa iya kag ang atubangon nila amo ang mga isyu sa ekonomiya kag track record sa good government, kon diin mahuy-an gid lang siya.
Si VP Robredo nagbaton sing diploma sa kurso nga Economics samtang si Marcos Jr. certificate lang ang iya nabaton sa kurso nga daw amo-amo man sa Economics pero indi gid amo. Si VP Robredo isa man ka abogada kag hanas sa debate sa husgado, samtang si Marcos ginatudluan pa sang iya spokesman kon ano ang pag-argumento, nga indi niya mahimo sa entablado nga sila lang ni VP Robredo ang mag-atubangay.
Si VP Robredo maka-Diyos sa iya pangabuhi kag panghimanwa gani indi katingalahan nga suportado siya sang Simbahan nga makapasalig man sa mga pumuluyo sang iya limpyo nga handom kag kapisan sa panghimanwa. Nga napamatud-an naman gani niya sa mga tinuig nga kongresista kag bise presidente siya.
Suportado man si VP Robredo sang madamo nga mga ekonomista, topnotcher sa bar, health frotnliners, nagapanguna nga mga artista kag entertainers, dalagku nga grupo sang mangunguma kag mangingisda, mga retirado nga AFP Chiefs of Staff, etc.
Ining pagsuporta sa Leni-Kiko tandem sining mga “influencers” ginpamatud-an man sang dalagku kag wala ginabayaran nga mga rally sang Leni-Kiko tandem bisan sa mga lugar pa sang mga kasumpong nila sa eleksyon.
Gapadumdum ini sa aton sang maisug kag hilway nga pagtipon sang minilyon nga mga pumuluyo agud iduso ang “bloodless” Edsa Revolution sadtong 1986 nga nagpalayas sang Marcos martial law regime.
Ang mga estudyante sang dalagku nga unibersidad sa pungsod nagpakita man sang ila daku nga pag-suporta sa Leni-Kiko tandem sa isa ka mock election nga na-release sadtong Abril 22. Ninety-three percent (93%) ang naghatag sang ila boto kay VP Robredo, kag 84% kay Kiko. Wala kitaa si Marcos Jr. diri!
Ikumparar sa sining naga-endorso sa Leni-Kiko tandem daw murto lang ang survey ni Marcos Jr. Ini sila nagpakita sang ila “representative” nga sentimiento sa palareho nila nga interes nga wala sa survey ni Marcos Jr.
In other words, mas credible ang ining mga endorsement sa Leni-Kiko tandem kay “representative” ini sang “common concern” sang mga grupo. On the other hand, wala sing kasubong nga “common concern” ang survey ni Marcos Jr., gani indi masaligan ini.
***
Aba, may mga puti itlog man gali nga mga kandidato sa probinsya sang Antique!
Sang Abril 28 nagtukod ang Antique Capitol kag PNP Press corps sang isa ka debate sang mga kandidato para Congressman sang Lone District of Antique. Sus, isa lang ang nagtindug agud makig-debate. Ang duha naaluminaw nga daw bula.
Ining nagaishanon nga nagbaton sang panghangkat sa pag-debate amo si Atty. Ade Santillan Fajardo. Ka-partido ini siya ni VP Robredo kag Kiko Pangilinan sang Liberal Party.
May bagay nga kinaalam, gina-respeto ang liderato kag may kaisug agud tindugan ang kinamatarong sang mga pumuluyo sa kawsa sang Kahilwayan, Hustisya kag oportunidad sang tanan para sa isa mabungahon nga pagpangabuhi.
Luas sa ginadala nga Angat Buhay nga programa sang Leni-Kiko tandem, ginaduso man ni Atty. Fajardo nga himuon duha ka legislative district ang Antique agud dugang mapauswag ang Antique sang duha ka kongresista.
Tapos si Atty. Fajardo sing abogasya kag Economics katulad ni VP Robredo sa UP Diliman. Gina-respeto sang iya kabaro bilang maisug nga anay presidente sang Integrated Bar of the Philippines.
May experyensya man siya sa Legislature bilang legal assistant ni anay Senador Blas Ople. Tsirman man sang Panay News, ang No. 1 nga pamantalaan sa rehiyon nga kilala sa kaisug sa pagpangapin sa Hilway nga Pamamahayag, Kamatuoran, kag sang manga ginadaug-daug.
Wala ini nga kapinsahe sa iya mga kasumpong, nga sunu kay Pedro sunod-sunuran lang sa ila mga boss.
Si Atty. Fajardo iya may kaugalingon nga panindugan nga ang nagadikta lang amo ang kawsa sang mga pumuluyo sa ila pangabuhian kag kinamatarong sa isa ka Hilway kag may Hustisya nga komunidad./PN
